រុស្សីបិទបេសកកម្មការទូតទៅអង្គការណាតូ បន្ទាប់ពីមានជម្លោះចារកម្ម
កាលពីថ្ងៃចន្ទនេះ រដ្ឋាភិបាលរុស្សីបានប្រកាសបញ្ឈប់បេសកកម្មការទូតរបស់ខ្លួនទៅកាន់អង្គការណាតូ បន្ទាប់ពីអង្គការសម្ព័ន្ធភាពយោធានេះបានបណ្ដេញមន្ត្រីការទូតរុស្សីប្រាំបីនាក់ ដោយនិយាយពួកគេគឺជាភ្នាក់ងារចារកម្ម។
រដ្ឋមន្ត្រីការបរទេសរុស្សីលោកស៊ែហ្គី ឡាវរ៉ូវបាននិយាយថារុស្សីនឹងដកហូតសារតាំងបេសកកម្មការទូតរបស់ណាតូប្រចាំក្រុងមូស្គូនៅថ្ងៃទី១ ខែវិច្ឆិកា ហើយការិយាល័យព័ត៌មានរបស់អង្គការនេះនៅរដ្ឋធានីរុស្សីនឹងត្រូវបានបិទ។ លោកឡាវរ៉ូវនិយាយថាប្រសិនបើណាតូមានបញ្ហាបន្ទាន់ណាមួយ ពួកគេអាចទាក់ទងតាមឯកអគ្គរដ្ឋទូតរុស្សីប្រចាំប្រទេសបែលហ្សិក។
កាលពីថ្ងៃទី ៦ តុលាអង្គការណាតូបានបណ្ដេញសមាជិកបេសកកម្មការទូតរបស់រុស្សីចំនួនប្រាំបីរូបដោយនិយាយថាពួកគេជា «មន្ត្រីចារកម្មរុស្ស៊ីដែលមិនបានប្រកាស»។ កាលនោះក្រុងមូស្គូបាននិយាយថាការបណ្ដេញចេញនេះបានធ្វើឱ្យខូចក្តីសង្ឃឹមថាទំនាក់ទំនងជាមួយសម្ព័ន្ធភាពដឹកនាំដោយសហរដ្ឋអាមេរិកអាចនឹងមានលក្ខណៈធម្មតាឡើងវិញ។
ជម្លោះនេះកើតឡើងចំពេលដែលទំនាក់ទំនងរវាងប្រទេសរុស្សី និងលោកខាងលិចធ្លាក់ដល់កម្រិតទាបបំផុតចាប់តាំងពីចុងបញ្ចប់នៃសង្គ្រាមត្រជាក់។ រុស្ស៊ីបានចោទអង្គការណាតូថាបានធ្វើសកម្មភាពបង្កហេតុនៅជិតព្រំដែនរបស់ខ្លួន ហើយបានធ្វើសមយុទ្ធធំៗ របស់ខ្លួននៅខែកញ្ញា។ ណាតូបានប្ដេជ្ញាពង្រឹងសន្តិសុខរបស់ប្រទេសជាសមាជិកមានព្រំដែនជាប់ជាមួយនឹងរុស្សី៕
ប្រភព៖ Reuters
