អគ្គលេខាធិការណាតូ៖ សម្ព័ន្ធភាពនឹងផ្ដោតអារម្មណ៍ដើម្បីប្រឆាំងការគំរាមកំហែងពីចិន
ការប្រឆាំងការគំរាមកំហែងសន្តិសុខពីការកើនឡើងនៃប្រទេសចិននឹងក្លាយជាផ្នែកមួយដ៏សំខាន់នៃគោលការណ៍អនាគតរបស់អង្គការណាតូ នេះបើតាមអគ្គលេខាធិការសម្ព័ន្ធភាពយោធានេះ ដែលជាសញ្ញាបញ្ជាក់ពីការគិតឡើងវិញដ៏ធំមួយនៃគោលដៅរបស់ក្រុមលោកខាងលិចនេះ ដើម្បីឆ្លុះបញ្ចាំងការផ្លាស់ប្ដូរយុទ្ធសាស្ត្រភូមិសាស្ត្រនយោបាយរបស់អាមេរិកមកផ្ដោតលើតំបន់អាស៊ីប៉ាស៊ីហ្វិកវិញ។
នៅក្នុងបទសម្ភាសន៍ជាមួយកាសែត Financial Times អគ្គលេខាធិការអង្គការណាតូលោកជេន ស្តូលេនប៊ឺក និយាយថាខណៈពេលដែលប្រទេសចិនធ្វើខ្លួនមិនមែនជា «សត្រូវ» ប្រទេសនេះបានបង្កការគំរាមកំហែងយ៉ាងខ្លាំងដល់សន្តិសុខអឺរ៉ុប តាមរយៈសមត្ថភាពវាយប្រហារតាមអ៊ីនធឺណិតបច្ចេកវិទ្យាថ្មី និងមីស៊ីលចម្ងាយឆ្ងាយ។ លោកបាននិយាយថារបៀបការពារសម្ព័ន្ធមិត្តណាតូពីការគំរាមកំហែងទាំងនោះនឹងត្រូវបានរៀបចំ «យ៉ាងហ្មត់ចត់» នៅក្នុងគោលលទ្ធិថ្មីរបស់សម្ព័ន្ធភាពសម្រាប់ទសវត្សខាងមុខនេះ។
ចាប់តាំងពីការបង្កើតនៅឆ្នាំ ១៩៤៩ សម្ព័ន្ធភាពយោធានេះបានចំណាយពេលជាច្រើនទសវត្សដើម្បីប្រឆាំងសហភាពសូវៀត ហើយក្រោយមកនៅឆ្នាំ ២០០១ បន្ថែមបេសកម្មខ្លួនប្រឆាំងនឹងអំពើភេរវកម្មទៀត។ ការផ្ដោតអារម្មណ៍ថ្មីទៅលើប្រទេសចិនកើតឡើងចំពេលមានការផ្លាស់ប្ដូរយ៉ាងសកម្មនៅក្នុងការតម្រង់ទិសភូមិសាស្ត្រនយោបាយរបស់អាមេរិក ចេញពីទ្វីបអឺរ៉ុបបែរមកជម្លោះឥទ្ធិពលជាមួយទីក្រុងប៉េកាំងវិញ។
«ណាតូគឺជាសម្ព័ន្ធភាពនៃអាមេរិកខាងជើង និងអឺរ៉ុប។ តំបន់នេះប្រឈមមុខនឹងបញ្ហាសកលដូចជាភេរវកម្ម ឧក្រិដ្ឋកម្មតាមអ៊ីនធឺណិត ប៉ុន្តែក៏រួមមានការកើនឡើងរបស់ចិនផងដែរ។ដូច្នេះនៅពេលនិយាយអំពីការពង្រឹងការការពាររួមរបស់យើង វាក៏រួមមានវិធីឆ្លើយតបនឹងការកើនឡើងរបស់ចិនផងដែរ» លោកស្តូលេនប៊ឺកនិយាយបែបនេះហើយបន្តទៀតថា៖ «អ្វីដែលយើងអាចទាយទុកជាមុនបានគឺការកើនឡើងរបស់ចិននឹងប៉ះពាល់ដល់សន្តិសុខរបស់យើង។ វាបានប៉ះពាល់រួចទៅហើយ»។
ណាតូនឹងអនុម័តគោលការណ៍យុទ្ធសាស្ត្រថ្មីរបស់ពួកគេនៅឆ្នាំក្រោយ ដែលនឹងគោលបំណងរបស់សម្ព័ន្ធមិត្តនេះសម្រាប់រយៈពេល ១០ ឆ្នាំខាងមុខទៀត។ គោលការណ៍យុទ្ធសាស្ត្របច្ចុប្បន្នរបស់ណាតូគឺត្រូវបានអនុម័តកាលពីឆ្នាំ ២០១០ ហើយមិនបាននិយាយអ្វីអំពីប្រទេសចិនទេ។
ណាតូគឺកំពុងស្វែងរកទិសដៅថ្មីបន្ទាប់ការបញ្ចប់សង្គ្រាមរយៈពេល ២០ ឆ្នាំនៅប្រទេសអាហ្វហ្គានីស្ថាន ខណៈពេលដែលការពិភាក្សាអំពីអនាគតនៃវត្តមានយោធាអាមេរិកនៅអឺរ៉ុបគឺនៅកំពុងបន្ត។
លោកស្តូលេនប៊ឺក គ្រោងចាកចេញពីតំណែងនៅឆ្នាំក្រោយបន្ទាប់ការដឹកនាំប្រាំបីឆ្នាំ បាននិយាយថាសមាជិកណាតូគឺកំពុងព្យាយាមបន្ថយសកម្មភាពនៅខាងក្រៅព្រំដែន ហើយមកបង្កើនភាពធន់នៃប្រព័ន្ធការពារផ្ទៃក្នុងរបស់ពួកគេដើម្បីទប់ទល់នឹងការគំរាមកំហែងពីខាងក្រៅ។
លោកនិយាយថា៖ «ប្រទេសចិនកាន់តែខិតជិតមករកយើង។ យើងឃើញពួកគេនៅតំបន់អាក់ទិក។ យើងឃើញពួកគេនៅក្នុងផ្ទៃអ៊ីនធឺណិត។ យើងឃើញពួកគេវិនិយោគយ៉ាងច្រើនទៅលើហេដ្ឋារចនាសម្ព័ន្ធសំខាន់ៗ នៅក្នុងប្រទេសរបស់យើងហើយជាការពិតពួកគេមានអាវុធចម្ងាយឆ្ងាយកាន់តែច្រើន ដែលអាចប្រទេសសម្ព័ន្ធមិត្តណាតូទាំងអស់។ ពួកគេកំពុងសាងសង់រណ្ដៅស៊ីឡូជាច្រើនសម្រាប់មីស៊ីលអន្តរទ្វីបរយៈចម្ងាយឆ្ងាយ»។
ប៉ុន្តែការស្នើណាមួយដើម្បីបង្វែរពីរុស្សី ទៅចិន នឹងទាក់ទាញការប្រឆាំងយ៉ាងខ្លាំងពីសមាជិកនៅអឺរ៉ុបខាងកើត ដែលមានការព្រួយបារម្ភអំពីការគំរាមកំហែងពីរុស្សី ហើយណាតូគឺជាអ្នកធានាសន្តិសុខតែមួយគត់របស់ពួកគេ។
ជាមូលហេតុដែលលោកស្តូលេនប៊ឺកបានលើកឡើងថារុស្សី និងចិន គឺជាសម្ព័ន្ធមិត្តជិតស្និត និងជាការគំរាមកំហែងតែមួយ ហើយអង្កការណាតូគួរតែចាត់ទុកតំបន់អាស៊ី និងអឺរ៉ុបជាតំបន់សន្តិសុខតែមួយ និងត្រៀមខ្លួនឆ្លើយតបសម្រាប់ការគំរាមកំហែងទាំងអស់៕
ប្រភព៖ FT
