បណ្ដឹងសុំនៅក្រៅឃុំកូនប្រុសតារាបូលីវូដដ៏ល្បីលោក Shah Rukh Khan ករណីគ្រឿងញៀនត្រូវច្រានចោល
បណ្ដឹងសុំនៅក្រៅឃុំរបស់លោក Aryan Khan ដែលជាកូនប្រុសរបស់តារាភាពយន្តបូលីវូដដ៏ល្បីឈ្មោះលោក Shah Rukh Khan ត្រូវបានបដិសេធ ប្រមាណជា ១៨ ថ្ងៃបន្ទាប់ពីលោកត្រូវបានចាប់ខ្លួនជុំវិញការចោទប្រកាន់ពីបទប្រើប្រាស់គ្រឿងញៀនក្នុងពិធីជប់លៀងមួយ។
លោក Aryan Khan អាយុ ២៣ ត្រូវបានប៉ូលីសចាប់ខ្លួនពីកប៉ាល់ទេសចរណ៍មួយដែលកំពុងធ្វើដំណើរពីទីក្រុងបុមបៃ ទៅរដ្ឋហ្គោនៅថ្ងៃទី២ ខែតុលា។ ការិយាល័យត្រួតពិនិត្យគ្រឿងញៀន (NCB) ចោទប្រកាន់លោកតាមច្បាប់ទាក់ទងនឹងការកាន់កាប់ ការប្រើប្រាស់ និងការលក់សារធាតុនេះខុសច្បាប់ ប៉ុន្តែលោកបដិសេធការចោទប្រកាន់ប្រឆាំងរូបលោក។
មេធាវីរបស់លោកឈ្មោះ Satish Manshinde ប្រាប់តុលាការម្តងហើយម្តងទៀតថា គ្មានភស្តុតាងដែលថាលោកប្រើប្រាស់ ឬកាន់កាប់គ្រឿងញៀននោះទេ។ ប៉ុន្តែតុលាការទីក្រុងបុមបៃកាលពីថ្ងៃពុធ បដិសេធការនៅក្រៅឃុំរបស់លោកជាលើកទីពីរ ក្រោយពីច្រានចោលសំណើរនេះកាលពីថ្ងៃទី ៨ ខែតុលា។
សំណុំរឿងរបស់លោក Aryan Khan កំពុងគ្របដណ្តប់លើចំណងជើងសារព័ត៌មានរបស់ឥណ្ឌា។ ខណៈដែលមិនទាន់មានសេចក្តីថ្លែងការណ៍យ៉ាងណាជាផ្លូវការពីលោក Shah Rukh Khan អ្នកក្នុងវិស័យដូចគ្នាមួយចំនួន បានបង្ហាញការការពាររបស់ខ្លួនចំពោះលោក Aryan Khan ។
ទន្ទឹមនឹងនេះដែរ តារាសម្តែងបូលីវូដ និងតារាទូរទស្សន៍ជាច្រើនផ្សេងទៀត ស្ថិតក្រោមការត្រួតពិនិត្យចាប់តាំងពីឆ្នាំមុន ជុំវិញការស៊ើបអង្កេតពីការរីករាលដាលនៃការប្រើប្រាស់គ្រឿងញៀននៅក្នុងឧស្សាហកម្មភាពយន្តឥណ្ឌា។
ប្រភព៖ BBC
