អ.ស.ប រំលឹកថា ផែរខួងយកឥន្ធនៈហ្វូស៊ីលធ្វើឱ្យប៉ះពាល់ ផែនការកាត់បន្ថយបម្រែបម្រួលអាកាសធាតុ
បើទោះបីជា មេដឹកនាំពិភពលោក ប្តេជ្ញាចាត់វិធានការខ្លាំងក្លាជាងមុន ចំពោះបញ្ហាបម្រែបម្រួលអាកាសធាតុក៏ដោយ ក៏ប្រទេសជាច្រើននៅតែមានគម្រោងបង្កើន ការផលិតប្រេងឧស្ម័ន និងធ្យូងថ្មរបស់ពួកគេយ៉ាងខ្លាំងក្នុងរយៈពេលជាច្រើនទសវត្សខាងមុខ ដែលអាចធ្វើឱ្យប៉ះពាល់ផែនការទាំងអស់នោះ។ នេះបើតាមការផ្សាយដោយសារព័ត៌មាន ញូយ៉កថែមស៍។
របាយការណ៍ពីអង្គការសហប្រជាជាតិបានឱ្យដឹងថាផែនការរុករករ៉ែ និងខួងយកនាពេលអនាគតនៅក្នុងប្រទេសផលិតឥន្ធនៈហ្វូស៊ីលធំៗ ចំនួន១៥ រួមមាន សហរដ្ឋអាមេរិក អារ៉ាប៊ីសាអូឌីត រុស្ស៊ី កាណាដា ចិន ឥណ្ឌា និងន័រវែស។ បច្ចុប្បន្ន ប្រទេសទាំងនោះ មានគម្រោងផលិតប្រេង ឧស្ម័ន និងធ្យូងថ្មទ្វេដងនៅឆ្នាំ ២០៣០ តាមតម្រូវការ ប្រសិនបើរដ្ឋាភិបាល ចង់កំណត់កម្រិតកំដៅមិនឱ្យក្ដៅដល់ ១,៥ អង្សាសេ លើសពីកម្រិតកំដៅមុនមានសកម្មភាពឧស្សាហកម្ម។
អ្នកវិទ្យាសាស្ត្រ និងមេដឹកនាំពិភពលោក សុទ្ធតែអះអាងថា ការឡើងកំដៅផែនដីដល់ ១.៥ អង្សាសេ មានសារៈសំខាន់ណាស់ ប្រសិនបើ មនុស្សជាតិចង់ជៀសផុតពីផលវិបាកដ៏មហន្តរាយបំផុតនៃបញ្ហាបម្រែបម្រួលអាកាសធាតុ ដូចជា រលកកំដៅ ដែលមិនធ្លាប់មានពីមុនមក គ្រោះទឹកជំនន់ទ្រង់ទ្រាយធំ និងការផុតពូជនៃសត្វមួយចំនួន។ ពិភពលោក បានឡើងកំដៅប្រហែល ១,១ អង្សាសេ ចាប់តាំងពីបដិវត្តន៍ឧស្សាហកម្មមក។
ប្រសិនបើ ពិភពលោកនៅតែប្រើប្រាស់ ប្រភពថាមពលចេញពីប្រេង ឧស្ម័ន និងធ្យូងថ្មអស់ជាច្រើនទសវត្សរ៍មកនោះ ប្រទេសជាច្រើន អាចពិបាកក្នុងការផ្លាស់ប្តូរទៅរកការប្រើប្រាស់ប្រភពថាមពលស្អាត។ ក្នុងពេលជាមួយគ្នានេះ អណ្តូងប្រេង និងអណ្តូងរ៉ែ ធ្យូងថ្ម ជាច្រើន ដែលកំពុងត្រូវបានអនុម័ត និងអភិវឌ្ឍន៍ អាចបង្ហាញថា ប្រភពថាមពលទាំងនោះ មិនមានផលចំណេញយ៉ាងខ្លាំង ប្រសិនបើ តម្រូវការឥន្ធនៈហ្វូស៊ីលថយចុះ ដែលនេះអាចនឹងបង្កឱ្យមានការរំខានដល់សេដ្ឋកិច្ច។
របាយការណ៍ បានរកឃើញថា នៅឆ្នាំ ២០៣០ ប្រទេសនៅលើពិភពលោក មានគម្រោងផលិតធ្យូងថ្មបន្ថែម ២៤០ ភាគរយ ប្រេង ៥៧ ភាគរយ និងឧស្ម័នធម្មជាតិ ៧១ ភាគរយបន្ថែមទៀត ដែលចាំបាច់ ដើម្បីកំណត់កំណើនកំដៅតែត្រឹម ១.៥ អង្សាសេ។
ចាប់ពីថ្ងៃទី ៣១ ខែតុលា តទៅ មេដឹកនាំពិភពលោក នឹងបើកកិច្ច កិច្ចប្រជុំកំពូលអាកាសធាតុ ធ្វើឡើងដោយអង្គការសហប្រជាជាតិនៅទីក្រុង Glasgow រយៈពេល ២ សប្តាហ៍ ដើម្បីពិភាក្សាពីវិធីកាត់បន្ថយការបំភាយកំដៅផែនដីរបស់ពួកគេ។ ប៉ុន្តែ អ្នកបរិស្ថាននិយាយថា រដ្ឋាភិបាលក៏ត្រូវផ្តោតលើផែនការនាពេលអនាគតសម្រាប់ការទាញយកថាមពល ប្រេងឥន្ធនៈហ្វូស៊ីល ដើម្បីឱ្យពួកគេអាចសម្របខ្លួនជាបណ្ដើរៗជាមួយងនឹងផែនការប្រើប្រាស់រថយន្តអគ្គិសនីបន្ថែម ឬ ការដំឡើងថាមពលកកើតឡើងវិញបន្ថែមទៀត។
លោកស្រី Inger Andersen នាយកប្រតិបត្តិនៃកម្មវិធីបរិស្ថានរបស់អង្គការសហប្រជាជាតិ បានមានប្រសាសន៍ថា៖ «រដ្ឋាភិបាលនៃប្រទេសក្នុងពិភពលោកត្រូវតែបង្កើនជំហាន ដោយរហ័ស និងបន្ទាន់ ដើម្បីបិទគម្លាតផលិតកម្មឥន្ធនៈហ្វូស៊ីល និងធានាឱ្យមានការផ្លាស់ប្តូរ ដោយយុត្តិធម៌»។
គួរបញ្ជាក់ផងដែរថា ក្នុងរយៈពេលមួយទសវត្សរ៍កន្លងមកនេះ រដ្ឋាភិបាល និងអាជីវកម្ម បានចាប់ផ្តើមងាកឆ្ងាយពីការពឹងផ្អែកយូរអង្វែងលើឥន្ធនៈហ្វូស៊ីលបណ្តើរៗ។ បច្ចុប្បន្ន ប្រទេសជាច្រើនកំ ពុងរៀបចំផែនការ ពង្រីកថាមពលខ្យល់ និងថាមពលព្រះអាទិត្យយ៉ាងសំខាន់ និងលុបចោល គម្រោងសាងសង់រោងចក្រធ្យូងថ្មថ្មី។ ក្រុមហ៊ុនផលិតរថយន្តធំៗ ដូចជា Ford និង General Motors កំពុងវិនិយោគយ៉ាងច្រើនទៅលើរថយន្តអគ្គិសនី និងកំពុងរៀបចំកាត់បន្ថយការលក់រថយន្តប្រើសាំង និងម៉ាស៊ូត។
ទោះយ៉ាងណា ជំហានទាំងនេះ គ្រាន់តែជាការចាប់ផ្តើមប៉ុណ្ណោះ។ ទីភ្នាក់ងារថាមពលអន្តរជាតិនាពេលថ្មីៗនេះ បានពិនិត្យមើលនូវអ្វី ដែលត្រូវការ ដើម្បីទប់កំដៅផែនដីឱ្យកើនត្រឹម ១.៥ អង្សាសេ។ ប្រទេសទាំងអស់នៅលើពិភពលោក នឹងត្រូវកាត់បន្ថយការប្រើប្រាស់ឥន្ធនៈហ្វូស៊ីលរបស់ពួកគេយ៉ាងខ្លាំងក្នុងរយៈពេលបីទសវត្សខាងមុខនេះ រហូតដល់ពួកគេលែងបន្ថែមឧស្ម័នផ្ទះកញ្ចក់ទៅក្នុងបរិយាកាសត្រឹមឆ្នាំ ២០៥០ ដោយសម្រេច បាននូវការបំភាយ «សូន្យសុទ្ធ» ឬ “ net zero” ។
ទីភ្នាក់ងារនេះ បានថន្ថែមថា នៅក្រោមសេណារីយ៉ូនោះ ប្រទេសនៅលើពិភពលោក នឹងមិនយល់ព្រមលើការអភិវឌ្ឍអណ្តូងរ៉ែ ធ្យូងថ្មថ្មី ឬ វាលប្រេង និងឧស្ម័នថ្មីលើសពីអ្វី ដែលបានប្តេជ្ញាចិត្តនាពេលបច្ចុប្បន្ននេះទេ។
ទោះបីជា ប្រទេសដូចជា ចិន និងសហរដ្ឋអាមេរិក កំពុងរំពឹងថា នឹងកាត់បន្ថយការទាញយកធ្យូងថ្មនៅប៉ុន្មានទសវត្សរ៍ខាងមុខ ក៏ដោយ ប៉ុន្តែ ផែនការសម្រាប់ការជីកយករ៉ែថ្មី នៅកន្លែងដូចជា អូស្ត្រាលី ឥណ្ឌា និងរុស្ស៊ី ក៏នៅតែកើតមាន ដែលបណ្ដាលឱ្យក្ដីស្រម៉ៃនៃការកាត់បន្ថយការទាញយកធ្យូងថ្មនៅពេលខាងមុខ ស្ថិតនៅកាន់តែឆ្ងាយ។
របាយការណ៍ដដែល បានរកឃើញថា នៅសហរដ្ឋអាមេរិក ការផលិតប្រេង និងឧស្ម័ន នឹងមានការកើនឡើងគួរឱ្យកត់សម្គាល់នៅឆ្នាំ ២០៣០ ហើយជាងពាក់កណ្តាលនៃការផលិតឥន្ធនៈហ្វូស៊ីលនៅទូទាំងពិភពលោក ត្រូវបានគ្រប់គ្រង ដោយក្រុមហ៊ុនរដ្ឋ ដែលជារឿយៗត្រូវទទួលរង សម្ពាធទីផ្សារ ហើយពេលខ្លះតម្រូវឱ្យមានច្បាប់ ដើម្បីរក្សាផលិតកម្មដើម្បីរក្សាចំណូលពន្ធ។
យ៉ាងណាមិញ នៅក្នុងការអនុវត្តជាក់ស្តែង គេក៏អាចបង្ហាញឱ្យឃើញពីល្បិចកលរបស់រដ្ឋាភិបាលក្នុងការកាត់បន្ថយការផលិតប្រេងឥន្ធនៈហ្វូស៊ីលនៅទូទាំងពិភពលោក។ ទោះបីជាពិភពលោកផ្លាស់ប្តូរទៅជាថាមពលស្អាតក៏ដោយ ក៏នៅតែមានតម្រូវការប្រេង និងឧស្ម័នក្នុងកំឡុងពេលផ្លាស់ប្តូរផងដែរ។
ប្រភព៖ New York Times
