ខេត្តកំពង់ស្ពឺបានបើកទ្វារទឹករលាំងជ្រៃចំនួន៥ បង្ហៀរតាមស្ទឹងព្រែកត្នោត ខណៈពលរដ្ឋតាមស្ទឹងកំពុងតែ ប្រឈមនឹងការជន់លិច។ ការសម្រេចបើកទ្វារទឹកនេះ បានធ្វើឡើងថ្ងៃទី២៦ ខែតុលាបន្ទាប់ពី អភិបាលខេត្ត កំពង់ស្ពឺលោក វ៉ី សំណាង បានចុះត្រួតពិនិត្យស្ថានភាពទំនប់ទឹក និងទ្វាទឹករលាំងជ្រៃ ដែលស្ថិតនៅក្នុងឃុំ កាហែង នៃស្រុកសំរោងទង។

អភិបាលខេត្តកំពង់ស្ពឺលោក វ៉ី សំណាង បានថ្លែងបើលោកមិនចាត់វិធានការ បើក ទ្វាទឹកនេះទេ, ការភ្លាំងភ្លាត់ណាមួយដែលបង្កការបាក់ទំនប់ នឹងអាចធ្វើឲ្យអន្តរាយដល់ជីវិតប្រជាពលរដ្ឋ។ អភិ បាលខេត្តកំពង់ស្ពឺ បានពន្យល់ជុំវិញមូលហេតុនៃការបើកទ្វាទឹករលាំងជ្រៃនេះ និងលោកបានស្វែងរកការ យោគ យល់ពីពលរដ្ឋដែលស្ថិតក្នុងតំបន់ខាងក្រោម ។

សេចក្តីរាយការណ៍ចុងក្រោយបានឲ្យដឹងថាការបើកទ្វារទឹក បានកើនដល់៦ទ្វារហើយដោយសារតែទឹកបានលិច តាមតំបន់មួយចំនួនក្នុងនោះរួមទាំងនៅក្នុងសង្កាត់ស្វាយក្រវាន់នៃក្រុងច្បារមននិងឃុំរលាំងគ្រើលនៃស្រុកសំ រោងទងផងដែរ។ តំបន់ដទៃទៀតក្នុងក្រុងច្បារមនក្នុងសង្កាត់កណ្តោលដុំនិងតំបន់ខ្លះក្នុងស្រុកបសេដ្ឋនិងស្រុក គងពិសី ក៏ត្រូវគេរាយការណ៍ជុំវិញការជន់លិចនេះផងដែរ។

ជំនន់ទឹកហូរមកពីផ្នែកខាងលើ បានធ្វើឲ្យផ្នែកខាងក្រោមនៃតំបន់ជាយរាជធានី បានរងនឹងការលិច។ នាពេល នេះ, ខណ្ឌដង្កោរាជធានីភ្នំពេញ និងតំបន់ខ្លះក្នុងខេត្តកណ្តាលបានរងការជន់លិច និងកំណាត់ផ្លូវជាតិមួយចំនួន ដូចជាផ្លូវលេខ២០ និងផ្លូវលេខ១២០, កំណាត់ផ្លូវមួយចំនួនតាមផ្លូវជាតិលេខ៣និងផ្លូវជាតិលេខ៤ក្នុងភូមិសាស្ត្រ ខេត្តកណ្តាល ត្រូវបានបិទការធ្វើចរាចរណ៍បណ្តោះអាសន្ន។

អភិបាលរាជធានីភ្នំពេញលោក ឃួង ស្រេង បាន បញ្ជាក់នៅថ្ងៃទី២៦តុលានេះថា គិតមកដល់រសៀលថ្ងៃនេះ ស្ថានភាពទឹកនៅកំពង់ស្ពឺ បានស្រកចុះចំនួន២ ហ៊ុនហើយ, ដោយឡែកសម្រាប់នៅរាជធានីភ្នំពេញវិញ ស្ថានភាពទឹកមានភាពនឹងគួរឲ្យកត់សម្គាល់។

ទោះជាយ៉ាងណាក៏ដោយ, រដ្ឋបាលរាជធានី បានបន្តប្រកាសប្រាប់ប្រជាពលរដ្ឋរស់នៅជាប់សណ្តស្ទឹងព្រែកត្នោត ក្នុងនោះមានយ៉ាងហោចសង្កាត់ចំនួន១០ ដែលស្ថិតនៅជាប់នឹងសណ្តស្ទឹង សូមអោយមានការប្រុងប្រយ័ត្ន ចំពោះជំនន់ទឹកភ្លៀងហូរមកពីខាងលើនេះ។ សង្កាត់ទាំងនោះរួមមាន សង្កាត់ដង្កោ, សង្កាត់ព្រៃស, សង្កាត់ព្រៃ វែង ,សង្កាត់ក្រាំងពង្រ, សង្កាត់ស្ពានថ្ម, សង្កាត់ទៀន, សង្កាត់សាក់សំពៅ ,សង្កាត់ជើងឯក, សង្កាត់ព្រែកកំពឹស និងសង្កាត់គងនយ៕