ស្ពៃក្តោបសហគមន៍តំបន់ការពារធម្មជាតិភ្នំទំព័រចាប់ផ្តើមល្បីឈ្មោះលើទីផ្សារថាមានរស់ជាតិឆ្ងាញ់
ខេត្តពោធិ៍សាត់៖ដំណាំស្ពៃក្តោបសហគមន៍តំបន់ការពារធម្មជាតិភូមិទំព័រ ក្នុងដែនជម្រកសត្វព្រៃភ្នំសំកុស ភូមិសាស្រ្តភូមិទំព័រ ក្នុងឃុំប្រម៉ោយ ស្រុកវាលវែង ខេត្តពោធិ៍សាត់ កំពុងមានឈ្មោះបោះសម្លេងថាមានរស់ជាតិស្រួយឆ្ងាញ់ ដែលអ្នកធ្លាប់បរិភោគនៅរាជធានីភ្នំពេញនិងនៅតាមបណ្តាខេត្តនានាបានបង្ហាញការកោតសរសើរ។
ស្ពៃក្តោបភ្នំទំព័រ បានដាំឡើងតាមគោលការណ៍ធម្មជាតិ តាមចំការតូចៗក្បែរផ្ទះប្រជាពលរដ្ឋ។
អ្នកស្រី ប៉េន ស៊ីថុល និងស្វាមី លោក កែវ ពក ជាកសិករអ្នកដាំស្ពៃក្តោបក្នុងសហគមន៍តំបន់ការពារធម្មជាតិភូមិភ្នំទំព័រគឺកំពុងទទួលបានការបញ្ជាទិញពីអតិថិជនជាច្រើនក្នុងមូលដ្ឋាន នៅខេត្តបាត់ដំបង ពោធិ៍សាត់ និងនៅរាជធានីភ្នំពេញ។ បច្ចុប្បន្នទីផ្សារស្ពៃក្តោបរបស់អ្នកស្រីបានលក់ដាច់ រហូតពេលខ្លះផ្តគ់ផ្គង់ទីផ្សារពុំទាន់ថែមទៀត។ វាមានភាពផ្ទុយគ្នាស្រឡៈដែលកាលពីមុននេះអ្នកស្រីនិងស្វាមីរកទីផ្សារសឹងមិនបាន ដោយសារមិនបានផ្សព្វផ្សាយ និងអតិថិជនមិនទាន់បានភ្លក់រស់ជាតិស្ពៃក្តោបនៃសហគមន៍ភូមិទំព័រនៅឡើយ។
អ្នកស្រី ប៉េន ស៊ីថុល បានរៀបរាប់ថាគាត់បានដាំស្ពៃក្តោបក្នុងទំហំដីប្រមាណ ៤០គុណនឹង៤០ម៉ែត្រ (១រ៉ៃ) ដែលដាំក្នុងរោង រយៈពេលពី៧០ទៅ១១០ថ្ងៃ អាចរកប្រាក់ចំណូលបាន១៥លានរៀល។ក្នុងនេះគាត់លក់ក្នុងមួយថ្ងៃបាន៥០គីឡូក្រាម ហើយថ្ងៃខ្លះអតិថិជនបានកុម៉្មង់ច្រើនជាងនេះពួកគាត់មិនអាចផ្គត់ផ្គង់ដល់អតិថិជនតាមតម្រូវការទៀតផង។ គាត់អាចលក់ស្ពៃក្តោបបានតម្លៃ៥០០០ពាន់រៀលក្នុង១ គីឡូក្រាម។ ហើយក្នុងមួយថ្ងៃអ្នកស្រី និងស្វាមីអាចផ្គត់ផ្គង់ឲ្យអតិថិជនបានត្រឹមតែ៥០គីឡូក្រាមប៉ុណ្ណោះ ហើយពេលខ្លះតម្រូវឲ្យអតិថិជនរង់ចាំការបញ្ជាទិញផងដែរ។
ដោយសារតម្រូវការទីផ្សារស្ពៃក្តោបកាន់តែច្រើន នៅថ្ងៃខាងមុខ អ្នកស្រីបានគិតជាមួយស្វាមីមានគម្រោងថានឹងពង្រីកផ្ទៃដីក្នុងការដាំស្ពៃក្តោបលើដីឲ្យបានទំហំ២ហិចតាបន្ថែមទៀតនៅឆ្នាំក្រោយសំដៅធ្វើយ៉ាងផ្គត់ផ្គង់លើទីផ្សារនិងអាចរកប្រាក់ចំណូលកាន់តែច្រើន។
ស្រ្តីកសិករអ្នកដាំស្ពៃក្តោបឈានមុខគេក្នុងសហគមន៍វ័យ៣៣ឆ្នាំ រូបនេះបានឱ្យដឹងបន្ថែមថា កាលពីមុននេះអ្នកស្រីជួបការលំបាកដោយសារការដាំដំណាំបានផលហើយ ពុំមានទីផ្សារ និងពិសេសការលក់ចេញបានតម្លៃថោក ទើបអ្នកស្រីទទួលការសហការពីក្រសួងបរិស្ថាន ក្រសួង ស្ថាប័ន្ធពាក់ព័ន្ធ និងអង្គការជាដៃគូមួយចំនួនជួយផ្សព្វផ្សាយផលិតផលសហគមន៍ភូមិទំព័រ។
សូមបញ្ជាក់ថា សហគមន៍តំបន់ការពារធម្មជាតិភូមិទំព័រ មានសមាជិក១១១គ្រួសារ ក្នុងនោះ សមាជិកចំនួនជាង១០គ្រួសារ បានដាំដុះស្ពៃក្តោបផ្គត់ផ្គង់ទីផ្សារតាមរយៈសហគមន៍។ រដូវដំណាំស្ពៃក្តោមនៅក្នុងសហគមន៍ចាប់ផ្តើមពីខែមិថុនា ហើយចាប់ពីខែតុលាដល់ខែធ្នូជាពេលប្រមូលផល។
លោក កែវពកស្វាមីអ្នកស្រី ប៉េនស៊ីថុលបានឱ្យដឹងថាបច្ចុប្បន្នពួកគាត់បានដាំដំណាំផ្សេងៗដូចជាពោត ចេក ល្ហុង ខ្នុរ ម្ទេសស្វាយលើផ្ទៃដី១ហិកតាកន្លះ ក្នុងនេះអាចរកប្រាក់ចំណូលសម្រាប់ផ្គត់ផ្គង់គ្រួសារ ជាមធ្យម ១២លានរៀល ក្នុងរយៈពេលនៃរដូវក្រៅពីដំណាំស្ពៃក្តោបផងដែរ។
លោក ទេស ថន ប្រធានសហគមន៍តំបន់ការពារធម្មជាតិ ភូមិទំព័របានឱ្យដឹងថាប្រជាកសិករនៅតំបន់នេះមួយចំនួនដែលធ្លាប់ប្រកបរបរ ចូលព្រៃកាប់ឈើ និងបរបាញ់សត្វព្រៃ ហើយដែលបច្ចុប្បន្នបានផ្លាស់ប្តូរ ងាកមកប្រកបរបដាំដំណាំកសិកម្ម ជាពិសេសដាំបន្លែរបែបធម្មជាតិវិញ។ ពួកគាត់មានទឹកចិត្តសប្បាយរីករាយនៅពេលបន្លែរបស់ពួកគាត់ទទួលបានទិន្នផលខ្ពស់ ហើយតម្លៃទីផ្សារល្អ ដែលធ្វើឱ្យជីវភាពគ្រួសារពួកគាត់មានការផ្លាស់ប្តូរ។
លោកថាក្រៅពីដំណាំស្ពៃក្តោប សហគមន៍ភូមិទំព័របានលើកទឹកចិត្តឲ្យសមាជិកចិញ្ចឹមសត្វ និងដាំដំណាំដែលមានទីផ្សារ និងក៏សំណូមពរឲ្យអតិថិជនបញ្ជាទិញផលិតផលសហគមន៍ឲ្យបានច្រើនថែមទៀត។
សូមបញ្ជាក់ថាកន្លងមកសហគមន៍តំបន់ការពារធម្មជាតិភូមិទំព័រទទួលបានការគាំទ្រពីគម្រោងនិរន្តរភាពតំបន់ទេសភាពនិងទេសចរណ៍ធម្មជាតិកម្ពុជានៃក្រសួងបរិស្ថានលើកិច្ចការងារមួយចំនួនរាប់ចាប់ពីការគាំទ្រដំណើរការនៃការរៀបចំឡើងវិញតំបន់ការពារធម្មជាតិ ការរៀបចំស្តារដាំរុក្ខជាតិក្រវាញឡើងវិញនិងការពង្រឹងសមត្ថភាពគណៈកម្មការនិងសមាជិកសហគមន៍ក្នុងកិច្ចការពារគ្រប់គ្រងតំបន់ការពារធម្មជាតិនិងជម្រុញជីវភាពសហគមន៍ឲ្យមានភាពប្រសើរឡើងដោយមានការផ្តល់ជាពូជមាន់និងពូជគោជាដើម៕ ដោយ៖ម៉ាដេប៉ូ
