លោក ស៊ី ជីនពីង អំពាវនាវឱ្យមានការទទួលស្គាល់វ៉ាក់សាំងជំងឺកូវីដ-១៩ទៅវិញទៅមក
កាលពីថ្ងៃសៅរ៍ សប្ដាហ៌មុន ប្រធានាធិបតីចិនលោកស៊ី ជីនពីងបានអំពាវនាវឱ្យមានការទទួលស្គាល់វ៉ាក់សាំងជំងឺកូវីដ-១៩ ដោយផ្អែកទៅលើបញ្ជីប្រើប្រាស់ក្នុងគ្រាមានអាសន្នរបស់អង្គការសុខភាពពិភពលោក នេះបើតាមការរាយការណ៍របស់ភ្នាក់ងារសារព័ត៌មានរដ្ឋចិន Xinhua។
ក្នុងការថ្លែងសុន្ទរកថាទៅកាន់កិច្ចប្រជុំកំពូលលើកទី១៦ របស់មេដឹកនាំក្រុមប្រទេសអ្នកមាន G20 លោកស៊ីបាននិយាយថាប្រទេសចិនបានផ្គត់ផ្គង់វ៉ាក់សាំងកូវីដ-១៩ជាង ១,៦ ពាន់លានដូសទៅកាន់ពិភពលោក ហើយកំពុងធ្វើការជាមួយប្រទេសចំនួន ១៦ ផ្សេងទៀតដើម្បីពង្រីកផលិតកម្មបន្ថែមទៀត។ លោកក៏បានលើកឡើងថាលើកឡើងថាប្រទេសចិនសម្រេចបានគោលដៅពង្រីកសមត្ថភាពផលិតប្រចាំឆ្នាំរហូតដល់ ៧ពាន់លានដូស។
ក្នុងកិច្ចប្រជុំនេះប្រទេសរុស្សីក៏បានត្អូញត្អែរអំពីការខ្វះខាតការទទួលស្គាល់ជាអន្តរជាតិសម្រាប់វ៉ាក់សាំង Sputnik V របស់ខ្លួន ដោយលោកប្រធានាធិបតីវ៉្លាឌីមៀរ ពូទីនលើកឡើងថាមានកង្វះវ៉ាក់សាំងនៅប្រទេសកំពុងអភិវឌ្ឍ គឺដោយសារប្រទេសខ្លះបានធ្វើការប្រកួតប្រជែងមិនស្មោះត្រង់ ការរារាំងការប្រកួតប្រជែងពីបរទេស និងមិនទទួលស្គាល់វ៉ាក់សាំងទៅវិញទៅមក។
យ៉ាងណាមិញមានការរាយការណ៍ថាមេដឹកនាំនៃក្រុមប្រទេស G20 បានយល់ព្រមធ្វើការប្ដេជ្ញាបំពេញគោលដៅចាក់វ៉ាក់សាំងជូន ៧០ ភាគរយនៃប្រជាជនពិភពលោកត្រឹមឆ្នាំ២០២២ ខណៈពេលដែលគោលដៅ ៤០ ភាគរយត្រឹមឆ្នាំនេះរបស់អង្គការសុខភាពពិភពលោកជិតបានសម្រេចហើយ៕
ប្រភព៖ CNA
