លោក ចូ បៃដិន រិះគន់ចំៗលើចិន និងរុស្ស៊ីចំពោះការខកខានចូលរួមក្នុងកិច្ចប្រជុំកំពូលស្ដីពីអាកាសធាតុ COP26 របស់អង្គការសហប្រជាជាតិ
ក្លាសហ្គូវ៖ ប្រធានាធិបតីអាមេរិក ចូ បៃឌិន បានថ្លែងរិះគន់ចិន និងរុស្ស៊ីចំពោះការបរាជ័យដែលចង់ដើរតួជាអ្នកដឹកនាំ ក្នុងការដោះស្រាយបញ្ហាប្រែប្រួលអាកាសធាតុ ខណៈដែលមេដឹកនាំប្រទេសទាំងពីរអវត្តមានក្នុងសន្និសីទស្តីពីអាកាសធាតុលើកទី២៦ របស់អង្គការសហប្រជាជាតិ (COP26) ដែលធ្វើនៅទីក្រុងក្លាសហ្គូវ ប្រទេសស្កុតលែន។
លោក បៃដិន បានបរិហារចិន និងរុស្ស៊ីនៅក្នុងសន្និសីទសារព័ត៌មានមួយថា នេះជាបញ្ហាដ៏ធំមួយ តែពួកគេ (ចិន និងរុស្ស៊ី) បែរជាដើរចេញទៅវិញ។ តើអ្នកគួរធ្វើយ៉ាងណា ដើម្បីបង្ហាញថា អ្នកមានភាពជាអ្នកដឹកនាំ? នេះជាកំហុសដ៏ធំមួយដែលចិនមិនបង្ហាញខ្លួន ព្រោះពិភពលោកទាំងមូលកំពុងសម្លឹងមើលការខិតខំរបស់ចិនក្នុងការដោះស្រាយរឿងនេះ។ ចំពោះរុស្ស៊ីវិញ លោក បៃដិន បានវាយប្រហារថា រុស្ស៊ីកំពុងតែជួបប្រទះនឹងបញ្ហាគ្រោះធម្មជាតិយ៉ាងធ្ងន់ធ្ងរ ដូចជាភ្លើងឆេះព្រៃដែលកើតក្រោយរលកកម្តៅនៅតំបន់ស៊ីបេរីជាដើម។ ក៏ប៉ុន្តែរុស្ស៊ីបែរជាស្ងាត់ស្ងៀមមិនលើកយករឿងទាំងនោះមកដោះស្រាយសោះ។ ចិនជាប្រទេសបញ្ចេញកាបូនឌីអុកស៊ីតធំជាងគេលើពិភពលោក បន្ទាប់មកគឺសហរដ្ឋអាមេរិក ខណៈរុស្ស៊ីជាប្រទេសធំទី ៥ បន្ទាប់ពីសហភាពអឺរ៉ុប និងឥណ្ឌា។
សូមជម្រាបថា រដ្ឋបាលលោក បៃដិន កំពុងព្យាយាមស្ដារទំនុកចិត្តរបស់ពិភពលោកមកលើសហរដ្ឋអាមេរិកឡើងវិញ បន្ទាប់ពីអតីតរដ្ឋបាលលោក ដូណាល់ ត្រាំ បានដកអាមេរិកចេញពីកិច្ចព្រមព្រៀងអាកាសធាតុទីក្រុងប៉ារីស។ អាមេរិកក៏បានប្ដេជ្ញាចិត្តសម្រេចគោលដៅអព្យាក្រឹត្យកាបូននៅត្រឹមឆ្នាំ ២០៥០ ផងដែរ៕ ប្រភព៖ CNA
