ថវិកាជាតិម៉ាឡេស៊ីឆ្នាំ២០២២កើនឡើង មហាធីរបារម្ភពីរដ្ឋកើនបំណុល ហើយវប្បធម៌អំពើពុករលួយត្រលប់មកវិញ
លោក មហាធីរ មហាម៉ាត់ អតីតនាយករដ្ឋមន្ត្រីម៉ាឡេស៊ី បារម្ភអំពីការកើនឡើងបំណុលជាតិម៉ាឡេស៊ី ស្របពេលដែលថវិកាជាតិសម្រាប់ចំណាយនៅឆ្នាំ២០២២ នៅតែធំ ស្របពេលដែលចំណូលតិចជាង។ បន្ថែមពីនេះលោកក៏ព្រួយថា វប្បធម៌នៃការប្រព្រឹត្តិអំពើពុករលួយនៅម៉ាឡេស៊ីនឹងត្រលប់មកវិញជាថ្មីផងដែរ។ នេះបើតាមការលើកឡើងរបស់លោកនៅក្នុងការជជែកពិភាក្សាក្នុងសភាជាន់ទាបកាលពីថ្ងៃអង្គារ។
ថវិកាសម្រាប់ចំណាយឆ្នាំ២០២២នៅម៉ាឡេស៊ីមានប្រមាណ ៣៣២ប៊ីលានរីងហ្គីត ឬ ៨០ប៊ីលានដុល្លារអាមេរិក ខណៈចំណាយឆ្នាំ២០២១មាន ៧៧ប៊ីលានដុល្លារ ខណៈចំណូលសម្រាប់ឆ្នាំ២០២២ ដែលព្យាករណ៍ទុកមុនមានប្រមាណតែ ៥៦ប៊ីលានដុល្លារប៉ុណ្ណោះ។
សមាជិកសភារូបនេះក៏ទទួលស្គាល់ដែរថា រដ្ឋាភិបាលត្រូវការថវិកាទាំងនេះ ដើម្បីប្រយុទ្ធប្រឆាំងនឹងជំងឺកូវីដ-១៩ តែរដ្ឋាភិបាលគួរតែដកហូតយកលុយ ដែលត្រូវបានកិបកេងដោយអំពើពុករលួយកាលពីជំនាន់លោកនាយករដ្ឋមន្ត្រី ណាជីព រ៉ាហ្សាក់។
លោករ៉ាហ្សាក់ ដែលកាន់តំណែងកាលពីឆ្នាំ២០០៩ ដល់ឆ្នាំ២០១៨ ជាប់ក្នុងរឿងអាស្រូវពុករលួយនៃមូលនិធិវិនិយោគសាធារណៈ 1MDB ដោយកាលនោះ មូលនិធិនេះបាត់លុយប្រមាណ ៤,៥ប៊ីលានដុល្លារ។
បន្ថែមពីនេះទៅទៀត លោក មហាធីរក៏បានចោទប្រកាន់ថា ការបង្កើនខ្ទង់ចំណាយសម្រាប់ឆ្នាំ២០២២ក៏ព្រោះតែ លុយទាំងនេះនឹងប្រើប្រាស់សម្រាប់អំពើពុករលួយផ្នែកនយោបាយ។
«ប្រាកដណាស់ វប្បធម៌នៃអំពើពុករលួយត្រលប់មកវិញហើយ ចំណែកឯបន្ទុកគឺធ្លាក់លើរដ្ឋាភិបាល។ អំពើពុករលួយប្រភេទនេះគឺធ្វើឡើងក្រោមរូបភាពនៃការបង្កើតតំណែងរដ្ឋាភិបាលមិនសូវសំខាន់ជាច្រើន»។ នេះជាការលើកឡើងរបស់អ្នកនយោបាយចំណាស់ ៩៦ឆ្នាំរូបនេះ៕
ប្រភព៖ CNA
