កូនស្រីច្បងលោក ឌុយតឺតេ ឈរឈ្មោះធ្វើអនុប្រធានាធិបតីហ្វីលីពីន
កូនស្រីច្បងលោកប្រធានាធិបតី រ៉ូឌ្រីហ្គោ ឌុយតឺតេ អ្នកស្រី សារ៉ា ឌុយតឺតេ (Sara Duterte) កាលពីថ្ងៃសៅរ៍កន្លងទៅ បានដាក់ពាក្យឈរឈ្មោះធ្វើអនុប្រធានាធិបតីហ្វីលីពីន សម្រាប់ការបោះឆ្នោតថ្នាក់ជាតិ ដែលនឹងប្រព្រឹត្តិទៅនៅខែឧសភា ឆ្នាំ២០២២ ។
ស្ត្រីអ្នកនយោបាយវ័យ ៤៣ឆ្នាំរូបនេះកំពុងតែកាន់តំណែងជាអភិបាលក្រុង ដាវ៉ាវ (Davao) ដែលស្ថិតនៅភាគខាងត្បូងប្រទេសហ្វីលីពីន ហើយជាមូលដ្ឋាននៃអំណាច និងការគាំទ្រចំពោះត្រកូល ឌុយតឺតេ។
អ្នកស្រីឌុយតឺតេ កាលពីខែតុលាកន្លងទៅ ដាក់ពាក្យឈរឈ្មោះបោះឆ្នោត ដើម្បីបន្តតំណែងជាអភិបាលក្រុងទេ តែកាលពីថ្ងៃអង្គារសប្ដាហ៍មុន អ្នកស្រីបានដកបេក្ខភាពនេះចេញ ហើយប្អូនប្រុសអ្នកស្រីគឺ អភិបាលរងក្រុងដាវ៉ាវ លោក សេបាស្ទៀន ឌុយតឺតេ ឡើងមកឈរជំនួសវិញ។
ភ្លាមៗក្រោយពេលដែលអ្នកស្រីឈរឈ្មោះក្នុងតំណែងកំពូលទី២ ក្នុងប្រទេសហ្វីលីពីន បេក្ខភាពប្រធានាធិបតី លោក ហ្វើរឌីណង់ បុងបុង ម៉ាកូស ជូនៀ (Ferdinand “Bongbong” Marcos Jr) បានចេញសេចក្ដីសម្រេចមួយ គាំទ្របេក្ខភាពអនុប្រធានាធិបតីរបស់អ្នកស្រី ហើយជ្រើសរើសអ្នកស្រី ជាដៃគូសម្រាប់ការបោះឆ្នោតឆ្នាំក្រោយ។
លោក ម៉ាកូស ជាសមាជិកព្រឹទ្ធសភាប្រទេសហ្វីលីពីន និងជាកូនប្រុសរបស់លោក ហ្វើរឌីណង់ ម៉ាកូស ដែលជាមេដឹកនាំហ្វីលីពីន កាន់តំណែងអំឡុងទសវត្សឆ្នាំ១៩៦០ រហូតដល់ឆ្នាំ១៩៨៦ ក្រោយពីមានការផ្ដួលរលំតាមរយៈអំណាចប្រជាជន ដែលកក្រើកតំបន់អាស៊ីអាគ្នេយ៍ និងពិភពលោកនៅជំនាន់នោះ។
ត្រកូលម៉ាកូស នៅតែជាត្រកូលមានឥទ្ធិពលនៅក្នុងប្រទេសអាស៊ីអាគ្នេយ៍ដីកោះមួយនេះ ដោយមូលដ្ឋានអំណាចរបស់ត្រកូលនេះស្ថិតក្នុងភាគខាងជើងប្រទេសហ្វីលីពីន។ ខណៈមូលដ្ឋាននៃការគាំទ្ររបស់អ្នកស្រី ឌុយតឺតេ មាននៅភាគខាងត្បូងប្រទេស គេរំពឹងទុកថា ដៃគូមួយនេះ អាចនឹងមានប្រៀបក្នុងការបោះឆ្នោតថ្នាក់ជាតិឆ្នាំ២០២២។
យោងតាមការស្ទង់មតិកាលពីខែមិថុនាកន្លងទៅ បេក្ខភាពអ្នកស្រី ឌុយតឺតេ ឈានមុខគេសម្រាប់ការបោះឆ្នោតជ្រើសរើសប្រធានាធិបតី ចំណែកឯលោក ម៉ាកូស ឈានមុខគេលេខ ៣។
យ៉ាងណាក៏ដោយ ក្រឡេកមកខាងឪពុករបស់អ្នកស្រី ឌុយតឺតេ វិញ មានរបាយការណ៍ជាច្រើននៅក្នុងប្រទេសហ្វីលីពីន បានចុះផ្សាយថា លោកក៏បានគិតគូរក្នុងការឈរឈ្មោះធ្វើជាអនុប្រធានាធិបតីវិញដែរ។
កាលពីថ្ងៃសៅរ៍ គេបានសង្កេតឃើញ លោក ឌុយតឺតេ អមដំណើរមនុស្សជំនិតរបស់លោកគឺ សមាជិកព្រឹទ្ធសភា លោក បុង ហ្គោ (Bong Go) ទៅកាន់គណៈកម្មាធិការរៀបចំការបោះឆ្នោត ដើម្បីផ្លាស់ប្ដូរការឈរឈ្មោះពី បេក្ខភាពអនុប្រធានាធិបតី ទៅកាន់បេក្ខភាពប្រធានាធិបតីវិញ។
លេខារបស់លោក ឌុយតឺតេ ទទួលបន្ទុកលើផ្នែកទំនាក់ទំនងលោក Martin Andanar បានប្រាប់អ្នកកាសែតថា អ្នកនយោបាយវ័យ ៧៦ឆ្នាំរូបនេះ មានបំណងឈរឈ្មោះធ្វើជាអនុប្រធានាធិបតីវិញ ហើយលោកនឹងត្រលប់មកដាក់ពាក្យនៅគណៈកម្មាធិការរៀបចំការបោះឆ្នោតនៅថ្ងៃច័ន្ទនេះ។
តាមពិតទៅ ការឈរឈ្មោះធ្វើជាបេក្ខភាពប្រធានាធិបតី និងអនុប្រធានាធិបតីហ្វីលីពីន បានផុតកំណត់កាលពីខែតុលា ប៉ុន្តែបេក្ខភាពនីមួយៗ ដែលឈរឈ្មោះរួចហើយ អាចមានសិទ្ធិផ្លាស់ប្ដូរជាមួយបេក្ខភាពផ្សេងទៀត ដែលមកពីគណបក្សតែមួយ រហូតដល់ថ្ងៃទី១៥ ខែវិច្ឆិកា។
លោក ឌុយតឺតេ មិនអាចឈរឈ្មោះបន្តធ្វើជាប្រធានាធិបតីហ្វីលីពីនបានទៀតទេ ដោយសារតែរដ្ឋធម្មនុញ្ញក្នុងប្រទេសនេះ កំណត់អាណត្តិប្រធានាធិបតីតែមួយអាណត្តិ ៦ឆ្នាំប៉ុណ្ណោះ។ ចំណែកឯ អនុប្រធានាធិបតីវិញ អាចឡើងកាន់បាន ២អាណត្តិ ដោយមួយអាណត្តិ ៦ឆ្នាំ។
បន្ថែមពីលើនេះទៀត ការបោះឆ្នោតជ្រើសរើសប្រធានាធិបតី និងអនុប្រធានាធិបតីខុសប្លែកពីសហរដ្ឋអាមេរិក ដោយតំណែងទាំងពីរនេះ ទោះបោះឆ្នោតក្នុងពេលតែមួយមែន តែអ្នកបោះឆ្នោតអាចជ្រើសរើសបេក្ខភាពមកពីគណបក្ស ឬ សម្ព័ន្ធមិត្តផ្សេងគ្នា៕
ប្រភព៖ Rappler
