ប្រធានាធិបតីហុងឌុយរ៉ាស់ថា «យើងជាមិត្តពិត» ក្នុងដំណើរទស្សនកិច្ចនៅកោះតៃវ៉ាន់
កាលពីថ្ងៃសៅរ៍ ទី១៣ វិច្ឆិកាប្រធានាធិបតីហុងឌុយរ៉ាស់គឺលោកហ្វាន អ័រឡង់ដូ ហឺណាន់ដេសក្នុងដំណើរទស្សនកិច្ចទៅកោះតៃវ៉ាន់ បាននិយាយថាប្រទេសរបស់លោក និងកោះនេះគឺ «ជាមិត្តពិត» ខណៈក្រុងតៃប៉ិព្យាយាមរក្សាទំនាក់ទំនងជាមួយប្រទេសអាមេរិកកណ្ដាលនេះក្នុងការប្រកួតប្រជែងការទូតជាមួយក្រុងប៉េកាំង។
ហុងឌុយរ៉ាស់ គឺជាប្រទេសមួយក្នុងចំណោមប្រទេសចំនួន ១៥ប៉ុណ្ណោះ ដែលរក្សាទំនាក់ទំនងការទូតផ្លូវការជាមួយកោះតៃវ៉ាន់។យ៉ាងណាមិញ ប្រទេសចិនចាត់ទុកកោះនេះជាដែនដីរបស់ខ្លួន តែគ្មានសិទ្ធក្នុងការធ្វើទំនាក់ទំនងការទូតរដ្ឋទៅរដ្ឋ។
គណបក្សកាន់អំណាចរបស់លោកហឺណាន់ដេសគឺកំពុងប្រឈមនឹងការប្រកួតប្រជែងយ៉ាងខ្លាំងសម្រាប់ការបោះឆ្នោតនៅចុងខែនេះ ដោយការស្ទង់មតិសាធារណៈបានរកឃើញថាគណបក្សប្រឆាំងគឺកំពុងនាំមុខសំឡេង។ ប្រសិនបើជាប់ឆ្នោត បេក្ខជនប្រធានាធិបតីបក្សប្រឆាំងអ្នកស្រីស៊ីអូម៉ារ៉ា កាស្ត្រូបានប្ដេជ្ញាថាអ្នកស្រីនឹងធ្វើកំណែទម្រង់ជាច្រើនដែលរួមទាំងការបង្កើតទំនាក់ទំនងការទូតជាផ្លូវការជាមួយប្រទេសចិនវិញ។
កោះតៃវ៉ាន់ ដែលជានិច្ចកាលលើកឡើងថាខ្លួនជាប្រទេសឯករាជ្យ ចោទប្រកាន់ប្រទេសចិនថាកំពុងប្រើប្រាស់ការបោះឆ្នោតនៅប្រទេសហុងឌុយរ៉ាស់ដើម្បី «បង្កើតភាពចម្រូងចម្រាស់» ហើយបានប្រាប់ ហុងឌុយរ៉ាស់ឱ្យប្រុងប្រយ័ត កុំឱ្យទាក់ទាញដោយការសន្យា «ភ្លឺផ្លេក និងមិនពិត» របស់ក្រុងប៉េកាំង។ ប្រទេសចិន និងកោះតៃវ៉ាន់ បានធ្វើការចោទប្រកាន់ទៅវិញទៅមកជុំវិញ «ការទូតដុល្លារ» ដែលជាការផ្ដល់ជំនួយទៅប្រទេសក្រីក្រជាថ្នូរនឹងការទទួលស្គាល់ការទូតផ្លូវការ៕
ប្រភព៖ Reuters
