ប្រជាជនថៃរាប់ពាន់នាក់ធ្វើបាតុកម្មទាមទារឱ្យធ្វើការកំណែទម្រង់ស្ថាប័នព្រះមហាក្សត្រ
កាលពីថ្ងៃអាទិត្យកន្លងទៅ ពលរដ្ឋថៃរាប់ពាន់នាក់ធ្វើបាតុកម្មតាមដងផ្លូវ ដោយធ្វើការទាមទារឱ្យធ្វើការកំណែទម្រង់ស្ថាប័នព្រះមហាក្សត្រ ទោះបីជាតុលាការធម្មនុញ្ញថៃ ប្រកាសកាលពីសប្ដាហ៍មុនថា ការទាមទារបែបនេះមិនមានធម្មនុញ្ញភាពទេ។
បាតុកម្មបែបនេះបានដឹកនាំដោយក្រុមយុវជន ហើយទន្ទឹមនឹងការទាមទារឱ្យស្ថាប័នកំពូលនៅថៃកែទម្រង់ ពួកគេក៏ទាមទារឱ្យលោក ប្រាយុទ្ធ ចាន់អូឆា នាយករដ្ឋមន្ត្រីថៃ ចុះចេញពីតំណែងផងដែរ។
ក្រុមបាតុករបានលើកបដា សរសេរថា៖ «គ្មានទេរបបរាជាធិបតេយ្យផ្ដាច់ការ» និង «កំណែទម្រង់មិនមែនជាការរំលាយនោះទេ»។
បាតុករម្នាក់បានអានសុន្ទរកថានៅពីមុខស្ថានទូតអាល្លឺម៉ង់ប្រចាំរាជធានីបាងកកថា៖ «ការកើនឡើងអំណាចរបស់ស្ដេចនៅប៉ុន្មានឆ្នាំចុងក្រោយនេះ ធ្វើឱ្យថៃងាកចេញពីលទ្ធិប្រជាធិបតេយ្យ ហើយត្រលប់ទៅកាន់របបរាជាធិបតេយ្យផ្ដាច់ការ»។
នៅថៃ ការប្រមាថព្រះមហាក្សត្រអាចប្រឈមមុខនឹងពន្ធនាគាររយៈពេល ១៥ឆ្នាំ។ ចាប់តាំងពីមានការធ្វើបាតុកម្មទាមទារឱ្យកែទម្រង់ស្ថាប័នព្រះមហាក្សត្រកាលពីឆ្នាំមុនមក មនុស្សយ៉ាងតិច ១៥៧ត្រូវបានចាប់ខ្លួន ក្រោមបទល្មើសមួយនេះ៕
ប្រភព៖ Reuters
