ប៉ូឡូញ៖ កងកម្លាំងប៉ូឡូញបានបាញ់ឧស្ម័នបង្ហូរទឹកភ្នែក និងកាណុងបាញ់ទឹកទៅលើជនចំណាកស្រុកដែលកំពុងព្យាយាមឆ្លងព្រំដែនជាមួយប្រទេសបេឡារុស ដែលនាំឱ្យមានការបង្កើនជម្លោះដែលកំពុងបន្តរវាងប្រទេសទាំងពីរ។

ជនចំណាកស្រុករហូតដល់ ៤ពាន់នាក់ត្រូវបានគេប៉ាន់ស្មានថា កំពុងបោះជំរុំនៅខាងព្រំដែនបេឡារុស។ មានសេចក្តីរាយការណ៍ថា ដុំថ្មត្រូវបានគប់លើឆ្មាំព្រំដែនប៉ូឡូញ ដែលជំរុញឱ្យមានការប្រើប្រាស់កាណុងបាញ់ទឹក បើទោះបីជាមានលក្ខខណ្ឌអាកាសធាតុត្រជាក់ក៏ដោយ។ ក្រសួងការពារជាតិប៉ូឡូញបានបញ្ជាក់ថា ជនចំណាកស្រុកបានវាយប្រហារលើទាហាន និងមន្រ្តីរបស់យើងដោយថ្ម ហើយកំពុងព្យាយាមបំផ្លាញរបង និងឆ្លងចូលទៅក្នុងប្រទេសប៉ូឡូញ។ កងកម្លាំងរបស់យើងបានប្រើឧស្ម័នបង្ហូរទឹកភ្នែក ដើម្បីបំបែកការឈ្លានពានរបស់ជនចំណាកស្រុកទាំងនោះ។

ក្នុងចំណោមទាហានប៉ូឡូញ ១ម៉ឺន៥ពាន់នាក់ ដែលដាក់ពង្រាយនៅតាមព្រំដែន មន្ត្រីបានរាយការណ៍ថា មានប៉ូលិសម្នាក់ ឆ្មាំព្រំដែនម្នាក់ និងទាហានម្នាក់បានរងរបួសនៅក្នុងការប៉ះទង្គិចគ្នានោះ។ ជុំវិញបញ្ហានេះដែរ ខាងភាគីបេឡារុស​បាន​ឆ្លើយ​តប​ដោយ​ចោទប្រកាន់​ប៉ូឡូញ​ថា ​ធ្វើ​ឱ្យ​បញ្ហា​កាន់តែ​ធ្ងន់ធ្ងរ។ ជាមួយគ្នានេះ អ្នកនាំពាក្យក្រសួងការបរទេសបេឡារុស លោក Anatoly Glaz បាននិយាយថា យើងឃើញថ្ងៃនេះពីខាងភាគីប៉ូឡូញដែលការបង្កហេតុដោយផ្ទាល់ និងការធ្វើបាបអមនុស្សធម៌ចំពោះជនពិការ៕ ប្រភព៖ CGTN