ជនអន្តោប្រវេសន៍ដែលជាប់គាំងត្រឹមព្រំដែនបេឡារុស-ប៉ូឡូញទាំងគ្មានអាហារ ត្រដររស់ដោយប្រឈមមុខកាន់តែធ្ងន់នឹងអាកាសធាតុត្រជាក់
ពេលលោក Yousef ដែលជាគ្រូបង្រៀនក្នុងក្រុងដាម៉ាសរបស់ស៊ីរីឮគេនិយាយតៗគ្នាថាជនអន្តោប្រវេសន៍អាចឆ្លងទៅសហភាពអឺរ៉ុបតាមព្រំដែនបេឡារុស-ប៉ូឡូញបានដោយសុវត្ថិភាព លោកក៏ចាប់យកឱកាសដោយកក់សំបុត្រយន្តហោះទៅកាន់រដ្ឋធានីមីនស្ក៍ភ្លាមៗ។ លោកគិតថា វានឹងក្លាយជាឱកាសរកលុយចិញ្ចឹមគ្រួសារដែលមានសមាជិក ៤ នាក់របស់លោកឱ្យល្អប្រសើរ ដោយសារតែប្រាក់ខែគ្រូបង្រៀនដែលរដ្ឋឱ្យមានត្រឹមតែ ៣០ ដុល្លារអាមេរិក ដែលពិបាកសូម្បីតែទិញអង្ករច្រកឆ្នាំង។
បុរសវ័យ ៤៨ ឆ្នាំរូបនេះនិយាយប្រាប់ Al Jazeera ថា លោកធ្វើចេញដំណើរពីស៊ីរីឆ្ពោះទៅក្រុងមីនស្ក៍ក្នុងខែតុលាជាមួយនឹងមិត្តភក្តិ៤នាក់ទៀតរបស់លោក តាមជើងហោះហើរក្នុងរដ្ឋធានីបេរូតប្រទេសលីបង់។ ដំបូងៗ អ្វីៗហាក់ដូចជាប្រកបទៅដោយរលូន ដោយអ្នកទាំង ៥ ធ្វើដំណើររហូតដល់ព្រំដែនបេឡារុស-ប៉ូឡូញ។
ប៉ុន្តែក្រោយមករឿងហួសការរំពឹងទុកក៏ចូលមកដល់ ពេលក្រុមរបស់លោកបានជួបនឹងឆ្មាំព្រំដែនបេឡារុស ហើយរងការវាយដំមុននឹងបង្ខំពួកលោកឱ្យទៅក្រោមរបងព្រំដែនលួសបន្លាចូលទៅក្នុងប្រទេសប៉ូឡូញ។ លោក Yousef និយាយថា៖ «គេវាយយើង។ មិត្តខ្ញុំត្រូវគេវាយបាក់ក្ដោងច្រមុះ។ គេយកលុយ លិខិតឆ្លងដែនយើង គេយកគ្រប់យ៉ាងពីយើង»។
នៅក្នុងភាពចលាចល លោក Yousef ត្រូវបានបំបែកចេញពីមិត្តភ័ក្ត ហើយនៅតែម្នាក់ឯងក្នុងតំបន់ព្រៃបេតិកភណ្ឌពិភពលោក Białowieża ក្នុងសីតុណ្ហភាពដ៏ត្រជាក់ធ្លាក់ចុះក្រោមសូន្យអង្សាសេ។ មិនយូរប៉ុន្មាន លោកក៏ជួបជនភៀសខ្លួន និងជនអន្តោប្រវេសន៍ផ្សេងទៀតក្នុងតំបន់មិនរាប់បញ្ចូលមួយតាមព្រំដែន។
គេប៉ាន់ស្មានថា មនុស្សប្រមាណពី ៣ 000 ទៅ ៤ 000 នាក់ត្រូវជាប់គាំងក្នុងតំបន់នេះ ប៉ុន្តែតួរលេខនេះមិនច្បាស់លាស់ទេដោយសារក្រុមសិទ្ធិមនុស្ស អ្នកកាសែត និងប្រជាពលរដ្ឋដែលមិនមានមូលដ្ឋាននៅតំបន់ព្រំដែនត្រូវបានហាមឃាត់មិនឱ្យចូល។
លោក Yousef រត់ចេញពីតំបន់នេះចូលទៅក្នុងព្រៃដោយផឹកទឹកទន្លេ និងបោះផ្លែឈើក្នុងព្រៃដែលលោកឃើញបរិភោគ រហូតជួបនឹងជនជាតិស៊ីរីប្រហែលជាបីនាក់ផ្សេងទៀត។ ទីបំផុត បន្ទាប់ពីរយៈពេលប្រាំថ្ងៃនៅក្នុងព្រៃ លោកក៏បានឃើញប៉ូលីសប៉ូឡូញពីរនាក់ ដែលអនុញ្ញាតឱ្យលោកទូរស័ព្ទទៅសេវាសង្គ្រោះបន្ទាន់ បន្ទាប់ពីលោកពន្យល់ថាលោកមានជម្ងឺលើសឈាម។
ឥឡូវនេះ លោក Yousef កំពុងស្នាក់នៅមន្ទីរពេទ្យ Hajnówka ភាគខាងកើតប្រទេសប៉ូឡូញ ទាំងសង្វេកចង់ត្រឡប់ទៅផ្ទះជួបប្រពន្ធ និងកូនពីរនាក់របស់លោកនៅឯស្រុកវិញ។ លោកនិយាយទាំងទឹកភ្នែកថា៖ «ខ្ញុំចង់ទៅស៊ីរី។ ខ្ញុំចង់ទៅព្រលានយន្តហោះ ខ្ញុំចង់ទៅផ្ទះ»។
លោកបន្តថា៖ «ប្រាប់ទៅអ្នករាល់គ្នា ប្រសិនបើនរណាចង់មកទីនេះ សូមកុំមក ជាពិសេសឥឡូវនេះសូម្បីតែអាកាសធាតុក៏អាក្រក់។ មនុស្សកំពុងតែស្លាប់ក្នុងព្រៃ»។ លោក Yousef និយាយថា ទោះបីលោកមកដល់មន្ទីរពេទ្យហើយក្ដី លោកក៏ស្ថិតក្រោមការឃ្លាំមើលរបស់ប៉ូលីសប៉ូឡូញដែរ។
ជនអន្តោប្រវេសន៍ម្នាក់ឈ្មោះ Sozan និយាយទាំងសុំមិនបញ្ចេញឈ្មោះពេញពីក្នុងមន្ទីរពេទ្យ Hajnówka ដូចលោក Yousef ដែរថា នាងមិនចង់ត្រឡប់ទៅតំបន់មិនរាប់បញ្ចូលវិញទេ។ នាងនិយាយថា៖ «នៅទីនោះ ខ្ញុំផឹកទឹកកខ្វក់ ហើយគ្មានអ្វីហូប វាធ្វើឱ្យខ្ញុំភ័យខ្លាច។ ខ្ញុំសុខចិត្តស្លាប់ បើឱ្យខ្ញុំទៅកន្លែងហ្នុងវិញ»។
រយៈពេលប៉ុន្មានខែចុងក្រោយនេះ ជនអន្តោប្រវេសន៍ និងជនភៀសខ្លួនរាប់ពាន់នាក់ព្យាយាមចូលប្រទេសប៉ូឡូញតាមព្រំដែនបេឡារុស។ សហភាពអឺរ៉ុប អង្គការណាតូ និងសហរដ្ឋអាមេរិក ចោទប្រកាន់មេដឹកនាំបេឡារុសលោក Alexander Lukashenko ពីការរៀបចំវិបត្តិដោយគៀរគរជនអន្ដោប្រវេសន៍ និងជនភៀសខ្លួនឱ្យចូលទៅក្នុងសហភាពអឺរ៉ុបតាមព្រំដែនរបស់ខ្លួន ដើម្បីសងសឹកចំពោះទណ្ឌកម្មរបស់សហភាពអឺរ៉ុប។
គណៈកម្មការអឺរ៉ុបពិពណ៌នាអំពីយុទ្ធសាស្ត្ររបស់លោក Lukashenko ក្នុងការទាក់ទាញជនអន្ដោប្រវេសន៍ និងជនភៀសខ្លួនទៅកាន់ព្រំដែនថាជា «វិធីសាស្រ្តអមនុស្សធម៌ និងបែបក្មេងទំនើង»។ ទំនាក់ទំនងការទូតរវាងបេឡារុស និងប៉ូឡូញកាន់តែអាក្រក់ទៅៗកាលពីឆ្នាំមុន បន្ទាប់ពីអ្នកប្រឆាំងរបបរបស់លោក Lukashenko ភៀសខ្លួនទៅប៉ូឡូញ។
រដ្ឋាភិបាលលោក Lukashenko បដិសេធការចោទប្រកាន់នានា រួមទាំងពីសហរដ្ឋអាមេរិក ដែលថាខ្លួនបង្កើតវិបត្តិ និងកំពុងដឹកនាំចលនាជនអន្តោប្រវេសន៍។
តាមការចុះផ្សាយរបស់ Al Jazeera ជនអន្ដោប្រវេសន៍ និងជនភៀសខ្លួនជាច្រើនទទួលបានព័ត៌មានមិនពិតតាមរយៈការផ្សាយពាណិជ្ជកម្ម តាមប្រព័ន្ធផ្សព្វផ្សាយសង្គម ឬដោយផ្ទាល់ពីអ្នករត់គេចពន្ធ ដែលសន្យាថាពួកគេអាចធ្វើដំណើរប្រកបដោយសុវត្ថិភាព និងរហ័សឆ្លងកាត់ព្រៃ។
មកទល់ពេលនេះ មនុស្សយ៉ាងហោចណាស់ ៩ នាក់ស្លាប់ក្នុងវិបត្តិព្រំដែន ប៉ុន្តែចំនួនទំនងជាខ្ពស់ជាងនេះបើយោងតាមបុគ្គលិកមនុស្សធម៌។ ខណៈដែលការប្រឈមមុខគ្នាខាងនយោបាយនៅតែបន្ត ស្ត្រី កុមារ និងបុរសរាប់ពាន់នាក់ត្រូវជាប់គាំងនៅព្រំដែនក្នុងតំបន់មិនរាប់បញ្ចូល។ Border Group ដែលជាបណ្តុំនៃអង្គការក្រៅរដ្ឋាភិបាលដែលផ្តល់ការគាំទ្រដល់ជនអន្តោប្រវេសន៍ និងជនភៀសខ្លួនដែលជាប់គាំងនៅតាមព្រំដែន ទទួលសំណើប្រហែល ១០០០ ក្នុងមួយសប្តាហ៍។
នៅផ្នែកម្ខាងនៃតំបន់មិនរាប់បញ្ចូល គឺជារបងដែលមានលួសឡាមនៃព្រំដែនផ្លូវការ ហើយនៅម្ខាងទៀតមានខ្សែបន្ទាត់ព្រំដែនជាក់ស្តែងដែលពោរពេញទៅដោយប៉ុស្តិ៍ត្រួតពិនិត្យ និងការពារដោយឆ្មាំព្រំដែនប៉ូឡូញ ប៉ូលីស និងយោធា។ ជនចំណាកស្រុក និងជនភៀសខ្លួនដែលជាប់ក្នុងតំបន់មកពីប្រទេសផ្សេងៗរួមទាំងអ៊ីរ៉ាក់ ស៊ីរី អាហ្វហ្គានីស្ថាន យេម៉ែន តួកគី ស៊ូដង់ លីបង់ ប៉ាឡេស្ទីន អេហ្ស៊ីប សេណេហ្គាល់ អេត្យូពី និងហ្គីណេ។
លោក Michał Mikołajczyk សមាជិកក្រុមប្រឹក្សាប្រតិបត្តិនៅកាកបាទក្រហមប៉ូឡូញ ហៅស្ថានភាពនេះថាមិនធ្ងន់រហូតដល់វិបត្តិមនុស្សធម៌ទេ។ ទោះបីជាយ៉ាងណាក៏ដោយ ដោយសារករណីជំងឺកូវីដ-១៩នៅប៉ូឡូញកើនឡើង ហើយសីតុណ្ហភាពក៏ធ្លាក់ចុះក្រោមសូន្យអង្សាសេ លោកទទួលស្គាល់ថា «ស្ថានភាពនឹងកាន់តែអាក្រក់ទៅៗ»។
វោហាសាស្ត្ររបស់រដ្ឋាភិបាលប៉ូឡូញស្តាំនិយម ជុំវិញការលុបបំបាត់ជនអន្តោប្រវេសន៍ និងជនភៀសខ្លួន ត្រូវបានអ្នកនយោបាយប្រឆាំង និងផ្នែកធំនៃបណ្តាញផ្សព្វផ្សាយប៉ូឡូញដាក់ឈ្មោះថាជាវោហាសាស្ត្រស្អប់ខ្ពើមអ៊ិស្លាម និងការស្អប់ខ្ពើមជនជាតិដទៃ។ យោងតាមលោក Marta Górczyńska មេធាវីសិទ្ធិមនុស្សដែលមានមូលដ្ឋាននៅទីក្រុងវ៉ាសូវី ការមិនអើពើនឹងសំណើសុំសិទ្ធិជ្រកកោន និងការបញ្ជូនមនុស្សត្រឡប់ទៅប្រទេសដែលពួកគេប្រឈមមុខនឹងគ្រោះថ្នាក់ ឬអំពើអមនុស្សធម៌ បំពានទាំងច្បាប់សហភាពអឺរ៉ុប និងប៉ូឡូញ។
លោក Rekar Hamid អាយុ ៣២ ឆ្នាំជនជាតិឃឺដមកពីអ៊ីរ៉ាក់ដែលចំណាយប្រាក់ប្រហែល ១០ ០០០ ដុល្លារដើម្បីយកខ្លួនឯង ប្រពន្ធ និងកូនប្រុសអាយុ ២ ឆ្នាំរបស់លោកនិយាយថា៖ «ខ្ញុំសុខចិត្តស្លាប់នៅទីនេះក្នុងភាពត្រជាក់ ជាជាងត្រឡប់ទៅប្រទេសអ៊ីរ៉ាក់វិញ។
ប្រភព៖ Aljazeera
