រុស្ស៊ីធ្វើតេស្តបាញ់មីស៊ីល រហូតដល់ថ្នាក់កម្ទេចផ្កាយរណបរបស់ខ្លួននៅលើអវកាស
ក្រសួងការពារជាតិរុស្ស៊ីបានប្រកាសកាលពីថ្ងៃអង្គារថា ខ្លួនបានធ្វើតេស្តបាញ់មីស៊ីលប្រឆាំងនឹងផ្កាយរណបបានដោយជោគជ័យ ដោយបានកម្ទេចផ្កាយរណបរបស់ខ្លួនមួយគ្រឿង ដែលបានបង្ហោះតាំងពីឆ្នាំ១៩៨២។
ផ្កាយរណបនេះមានឈ្មោះថា «Tselina-D» ជាផ្កាយរណបចារកម្ម បង្ហោះកាលពីសម័យសហភាពសូវៀត តែវាមិនដំណើរការរយៈពេលរាប់សិបឆ្នាំមកហើយ។
រដ្ឋមន្ត្រីការពារជាតិរុស្ស៊ីក្រោយមកបាននិយាយថា មីស៊ីលដែលបានបាញ់ធ្វើតេស្តនេះជាមីស៊ីលមានសក្ដានុពលមួយ ដែលអាចបាញ់ចំគោលដៅបានល្អ។ លោកក៏បានបន្ថែមថា កម្ទេចកំទីដែលសល់ពីការបាញ់នេះមិនបង្កជាផលប៉ះពាល់ដល់សកម្មភាពអវកាសអន្តរជាតិនោះទេ។
ការលើកឡើងបែបនេះធ្វើឡើងបន្ទាប់ពី មន្ត្រីនៃសហរដ្ឋអាមេរិកបានចោទខាងរុស្ស៊ីថា ការធ្វើតេស្តបាញ់មីស៊ីលនេះបង្កជា «គ្រោះថ្នាក់ និងជាឥរិយាបថខ្វះទំនួលខុសត្រូវ» ដែលបង្កជាការគំរាមកំហែងដល់អវកាសយានិកចំនួន ៧នាក់ ដែលកំពុងធ្វើការនៅស្ថានីយអវកាសអន្តរជាតិ (ISS)៕
ប្រភព៖ The Guardian
