ស៊ី ជីនភីង ប្រាប់ប្រទេសអាស៊ានថា ចិនប្រឆាំងដាច់ខាតនឹងអនុត្តរភាព និងការប្រកួតប្រជែងអំណាច
ប្រធានាធិបតីចិន លោក ស៊ី ជីនភីង បានប្រាប់អស់លោកមេដឹកនាំប្រទេសអាស៊ានទាំង ១០ថា ប្រទេសចិន «ប្រឆាំងដាច់ខាតនឹងអនុត្តរភាព និងការប្រកួតប្រជែងអំណាច»។ នេះបើតាមការលើកឡើងរបស់លោក អំឡុងពេលកិច្ចប្រជុំកំពូលពិសេសអាស៊ាន-ចិន ដើម្បីប្រារព្ធខួប ៣០ឆ្នាំការភ្ជាប់ទំនាក់ទំនងរវាងភាគីទាំងពីរ។
លោកបានលើកឡើងថា៖ «យើង [អាស៊ាន និងចិន] ត្រូវតែកសាងផ្ទះនៃសន្តិភាពរួមគ្នា»។ បន្ថែមពីនេះទៀត លោកនៅតែបន្តបញ្ជាក់ពីគោលជំហរក្នុងការដោះស្រាយជម្លោះ និងបញ្ហានានាតាមរយៈការសន្ទនាគ្នា ដោយផ្អែកតាមប្រព័ន្ធពហុភាគីនិយម។
អ្វីដែលគួរឱ្យចាប់អារម្មណ៍ទៅទៀតនោះគឺ ចិនត្រៀមខ្លួនក្នុងការចុះពិធីសារនៃសន្ធិសញ្ញាតំបន់អាស៊ីអាគ្នេយ៍ ដែលគ្មានអាវុធនុយក្លេអ៊ែរ ឱ្យបាននាពេលឆាប់ៗនេះ។
ការលើកឡើងបែបនេះធ្វើឡើងក្រោយពេលដែល អូស្ត្រាលី អង់គ្លេស និងសហរដ្ឋអាមេរិកបានរួមគ្នាបង្កើតជាសម្ព័ន្ធភាពជាដៃគូ AUKUS ដោយផ្ដល់បច្ចេកវិទ្យាទៅកាន់អូស្ត្រាលី ហើយជាពិសេសទៅទៀតនោះគឺ ការផ្ដល់នាវាមុជទឹកដើរដោយថាមពលនុយក្លេអ៊ែរ។ AUKUS នេះហើយ ធ្វើឱ្យបណ្ដាប្រទេសអាស៊ីអាគ្នេយ៍ បារម្ភអំពីការប្រកួតប្រជែងសព្វាវុធនៅក្នុងតំបន់។
អំឡុងកិច្ចប្រជុំអាស៊ាន-ចិនពិសេសកាលពីថ្ងៃច័ន្ទនេះ ចិន និងអាស៊ានបានព្រមព្រៀងគ្នាក្នុងការដំឡើងស្ថានភាពទំនាក់ទំនងរវាងគ្នា និងគ្នាពី ដៃគូជាយុទ្ធសាស្ត្រ ទៅជាដៃគូជាយុទ្ធសាស្ត្រគ្រប់ជ្រុងជ្រោយ ដែលជាទំនាក់ទំនងខ្ពស់ជាងគេនៅក្នុងវិស័យការទូត៕
