អ្នកជំនាញជាន់ខ្ពស់អាមេរិក អំពាវនាវអោយពលរដ្ឋខ្លួន ប្រញាប់ទៅចាក់វ៉ាក់សាំង Covid-19 ដូសជំរុញបន្ថែម
ញូយ៉ក៖ អ្នកជំនាញជាន់ខ្ពស់ផ្នែកជំងឺរបស់អាមេរិក លោកវេជ្ជបណ្ឌិត អាន់ថូនី ហ្វាវស៊ី បានគូសបញ្ជាក់ថា ភាគច្រើននៃពលរដ្ឋអាមេរិកដែលបានទទួលការចាក់វ៉ាក់សាំងប្រឆាំងជំងឺកូវីដ១៩ពេញលេញហើយនោះ គួរតែទៅទទួលការចាក់ដូសជំរុញបន្ថែមទៀត និងថា ជំរុញនេះអាចនឹងក្លាយជាស្តង់ដារថ្មីសម្រាប់ប្រទេសនេះ ក្នុងការកំណត់អំពីអ្នកដែលបានចាក់វ៉ាក់សាំងពេញលេញ។
ការអំពាវនាវរបស់លោក ហ្វាវស៊ី ខាងលើនេះ ត្រូវបានធ្វើឡើងស្របពេលមានការព្រួយបារម្ភកាន់តែរីកធំឡើងៗ ចំពោះលទ្ធភាពនៃការផ្ទុះករណីឆ្លង និងស្លាប់ដោយសារជំងឺកូវីដ១៩កាន់តែខ្លាំង ដោយសារតែរដូវរងា និងពិធីជួបជុំធំៗ ជាពិសេសគឺបុណ្យប្រពៃណី Thanksgiving របស់សហរដ្ឋអាមេរិក។ បើតាមអ្នកជំនាញជាន់ខ្ពស់ផ្នែកជំងឺរបស់អាមេរិករូបនេះយោងតាមការសិក្សានៅអ៊ីស្រាអែល និងបណ្តាប្រទេសមួយចំនួនទៀតបានបង្ហាញថា ការការពាររបស់វ៉ាក់សាំង នឹងថយចុះទៅតាមពេលវេលា។
ខណៈដែលទិន្នន័យដំបូងបានឲ្យយើងដឹងថា ភាគច្រើនបញ្ហានេះបានកើតឡើងចំពោះមនុស្សចាស់នោះ មានភស្តុតាងថ្មីជាងនេះដែលបង្ហាញថា វាកើតឡើងក្នុងចំណោមក្រុមអាយុទាំងអស់ មិនថា ក្មេង ឬចាស់នោះឡើយ។ ហេតុដូច្នេះទើបលោក ហ្វាវស៊ី ជំរុញអោយប្រជាជននានារួសរាន់ទៅចាក់វ៉ាក់សាំងដូសជំរុញបន្ថែម នៅពេលពួកគេគ្រប់លក្ខខណ្ឌ៕ ប្រភព៖ CNA
