ក្រុងមូស្គូនិយាយថា អាមេរិកបានហាត់សមការវាយប្រហារនុយក្លេអ៊ែរលើរុស្សីក្នុងខែនេះ
កាលពីថ្ងៃអង្គារ ទី២៣ វិច្ឆិការដ្ឋមន្ត្រីក្រសួងការពារជាតិរុស្សីលោកសឺហ្គេ សូហ្គូបានចោទប្រកាន់យន្តហោះទម្លាក់គ្រាប់បែករបស់សហរដ្ឋអាមេរិកថាបានហាត់សមការវាយប្រហារនុយក្លេអ៊ែរទៅលើរុស្សីពីទិសដៅពីរផ្សេងគ្នាកាលពីដើមខែនេះ ហើយបាននិយាយថាយន្តហោះទាំងនោះបានខិតមកជិតចម្ងាយ ២០ គីឡូម៉ែត្រពីព្រំដែនរបស់រុស្សី។
លោកស៊ូហ្គូបាននិយាយថារុស្សីបានកត់សម្គាល់ការកើនឡើងយ៉ាងធំនៃសកម្មភាពយន្តហោះទម្លាក់គ្រាប់បែកចម្ងាយឆ្ងាយរបស់អាមេរិក ដោយលោកនិយាយថានៅក្នុងខែនេះមានជើងហោះហើរជិតដែនដីរហូតទៅដល់ ៣០ ដែលច្រើនជាង ២,៥ ដងបើធៀបទៅពេលវេលាដដែលកាលពីឆ្នាំមុន។ លោកនិយាយថានៅដើមខែនេះយន្តហោះអាមេរិកចំនួន ១០ គ្រឿងបានហាត់សមវាយប្រហាររុស្សីពីទិសខាងកើត និងទិសខាងលិច។
ប៉ុន្តែក្រសួងការពារជាតិអាមេរិកបាននិយាយថាកាលនោះការសមយុទ្ធរបស់ពួកគេគឺត្រូវបានប្រកាសជាសាធារណៈ ហើយអនុលោមតាមពិធីសារអន្តរជាតិ។ សមយុទ្ធប្រចាំឆ្នាំ «Global Thunder» គឺរៀបចំឡើងដើម្បីសាកល្បង និងបង្ហាញសមត្ថភាពនុយក្លេអ៊ែររបស់អាមេរិក ដោយឆ្នាំនេះមានការផ្ដោតលើការសាកល្បងសមត្ថភាពរបស់យន្តហោះទម្លាក់គ្រាប់បែក B-52។
ការចោទប្រកាន់របស់ក្រុងមូស្គូកើតឡើងចំពេលដែលភាពតានតឹងកំពុងកើនឡើងយ៉ាងខ្លាំងជាមួយក្រុងវ៉ាស៊ីនតោនជុំវិញបញ្ហានៅប្រទេសអ៊ុយក្រែន ដោយមន្ត្រីអាមេរិកមួយចំនួនបានបង្ហាញការព្រួយបារម្ភថារុស្សីគឺកំពុងត្រៀមវាយប្រហារប្រទេសអ៊ុយក្រែន។ រុស្សីបានច្រានចោលការចោទប្រកាន់នេះ។
ជាការឆ្លើយតបរុស្សីបានរិះគន់សហរដ្ឋអាមេរិក អង្គការណាតូ និងអ៊ុយក្រែនចំពោះអាកប្បកិរិយាអុចអាល និងមិនទទួលខុសត្រូវ ដោយចង្អុលទៅសកម្មភាពមួយចំនួនដូចជាការផ្គត់ផ្គង់សព្វាវុធអាមេរិកទៅឱ្យអ៊ុយក្រែន ការប្រើប្រាស់យន្តហោះគ្មានមនុស្សបើកផលិតដោយតួកគីទៅលើក្រុមផ្ដាច់ខ្លួននៅភាគខាងកើតអ៊ុយក្រែន និងការសមយុទ្ធរបស់អង្គការណាតូនៅតំបន់ជិតព្រំដែនរបស់រុស្សី៕
