ក្រុមហ៊ុនរដ្ឋមីយ៉ាន់ម៉ាប្ដឹងតុលាការ ដើម្បីផ្ដាច់ទំនាក់ទំនងជំនួញជាមួយក្រុមហ៊ុនស្រាបៀជប៉ុន
ក្រុមហ៊ុនសេដ្ឋកិច្ចសាធារណៈមីយ៉ាន់ម៉ា (Myanma Economic Holding Limited – MEHL) បានដាក់ពាក្យបណ្ដឹងទៅតុលាការទីក្រុងយ៉ាំងហ្គន ក្នុងន័យផ្ដាច់ទំនាក់ទំនងធុរកិច្ចជាមួយក្រុមហ៊ុនផលិតស្រាបៀជប៉ុនគីរីន (Kirin)។ នេះបើតាមសេចក្ដីប្រកាសជាភាសាមីយ៉ាន់ម៉ារបស់តំណាងរបស់ក្រុមហ៊ុន MEHL នៅកាសែតក្នុងស្រុកមួយនៅមីយ៉ាន់ម៉ា។
MEHL ជាក្រុមហ៊ុនមួយ ក្នុងចំណោមក្រុមហ៊ុនធំៗចំនួន២ ដែលស្ថិតក្រោមការគ្រប់គ្រងរបស់យោធាមីយ៉ាន់ម៉ា។ ក្រុមហ៊ុនមួយទៀតនោះគឺ ក្រុមហ៊ុនសាជីវកម្មសេដ្ឋកិច្ចមីយ៉ាន់ម៉ា (Myanma Economic Corporation – MEC)។
ក្រុមហ៊ុនសេដ្ឋកិច្ចសាធារណៈ ច្រើនតែផ្ដោតលើឧស្សាហកម្មអាហារដូចជា ស្រាបៀ និងថ្នាំជក់ ក៏ដូចជាវិនិយោគផ្នែកធនាគារ ចំណែកឯក្រុមហ៊ុនសាជីវកម្មសេដ្ឋកិច្ចវិញ ច្រើនតែផ្ដោតលើឧស្សាហកម្មផលិតធំៗ។ ក្រុមហ៊ុនទាំងពីរនេះ សុទ្ធតែស្ថិតក្រោមការដាក់ទណ្ឌកម្មរបស់សហរដ្ឋអាមេរិក និងប្រទេសលោកខាងលិចមួយចំនួនទៀត។
ពាក់ព័ន្ធនឹងឧស្សាហកម្មផលិតស្រាបៀ ក្រុមហ៊ុន MEHL មានក្រុមហ៊ុនបុត្រសម្ព័ន្ធរបស់ខ្លួន ដែលមានឈ្មោះថា ក្រុមហ៊ុនផលិតស្រាបៀមីយ៉ាន់ម៉ា ដែលផលិតភេសជ្ជៈស្រាបៀមីយ៉ាន់ម៉ា។ ក្រុមហ៊ុននេះហើយបានធ្វើការបណ្ដាក់ទុនជាមួយក្រុមហ៊ុនស្រាបៀជប៉ុនគីរីន ចាប់តាំងពីឆ្នាំ២០១៥ មក ដោយខាងជប៉ុនកាន់កាប់ ៥១% ហើយ ៤៩% ជារបស់មីយ៉ាន់ម៉ា។
តាមពិតទៅ ខាងគីរីនបានប្រកាសថាខ្លួនផ្ដាច់ទំនាក់ទំនងជាមួយក្រុមហ៊ុន MEHL ចាប់តាំងពីមានព្រឹត្តិការណ៍រដ្ឋប្រហារកាលពីខែកុម្ភៈមកម្ល៉េះ។ យ៉ាងណាមិញ ជាង ១០ខែមកនេះ ដំណើរការក្នុងការកាត់ផ្ដាច់ភាពជាដៃគូក្នុងការរកស៊ីនេះ នៅតែមិនទាន់ដាច់ស្រេចនៅឡើយទេ។
ខាងក្រុមហ៊ុនគីរីន សន្យាថា ខ្លួននឹងដកទុនចេញពីក្រុមហ៊ុនស្រាបៀមីយ៉ាន់ម៉ានៅខែធ្នូនេះ ហើយនៅពេលថ្មីៗនេះ ស្រាប់តែមានដំណឹងថា ក្រុមហ៊ុនមីយ៉ាន់ម៉ាដាក់ពាក្យបណ្ដឹងទៅកាន់តុលាការ ដើម្បីកាត់ផ្ដាច់ទំនាក់ទំនងជំនួញជាមួយក្រុមហ៊ុនគីរីនតែម្ដង។ តុលាការយ៉ាំងហ្គននឹងចេញសេចក្ដីសម្រេចនៅថ្ងៃទី១០ ខែធ្នូ ខាងមុខនេះ។
សារព័ត៌មានជប៉ុន NHK បានចុះផ្សាយថា មូលហេតុដែលក្រុមហ៊ុនគីរីននៅតែបន្តចរចាផ្ដាច់ទំនាក់ទំនងជាមួយក្រុមហ៊ុនយោធាមីយ៉ាន់ម៉ាអស់ជាង ១០ខែនេះ ក៏ព្រោះតែក្រុមហ៊ុនជប៉ុនមួយនេះ នៅតែចង់ជ្រៀតចូលក្នុងទីផ្សារមីយ៉ាន់ម៉ា ដោយចាប់ដៃគូជាមួយក្រុមហ៊ុនផ្សេង ក្រៅពីក្រុមហ៊ុនយោធា។
ការដាក់ពាក្យបណ្ដឹងទៅកាន់តុលាការរបស់ក្រុមហ៊ុនស្រាបៀមីយ៉ាន់ម៉ា អាចជាការបញ្ចប់វត្តមានរបស់ក្រុមហ៊ុនជប៉ុនគីរីន នៅក្នុងទឹកដីមីយ៉ាន់ម៉ា។ នេះបើតាមការចុះផ្សាយរបស់សារព័ត៌មាននីកេ។
បើតាមច្បាប់ក្រុមហ៊ុនរបស់មីយ៉ាន់ម៉ា តុលាការអាចបញ្ឈប់ដំណើររបស់ក្រុមហ៊ុនណាមួយ ប្រសិនបើតុលាការគិតឃើញថា ការរកស៊ីរបស់ក្រុមហ៊ុននោះមិនផ្ដល់ភាពយុត្តិធម៌ និងសមធម៌។
អ្នកនាំពាក្យរបស់ក្រុមហ៊ុនគីរីន បានប្រាប់សារព័ត៌មាននីកេថា ខាងក្រុមហ៊ុនបានជ្រាបច្បាស់ពីដំណឹងក្នុងការដាក់ពាក្យបណ្ដឹងទៅកាន់តុលាការពីសំណាក់ក្រុមហ៊ុនមីយ៉ាន់ម៉ាហើយ តែខ្លួនមិនទាន់ទទួលបានឯកសារផ្លូវច្បាប់លម្អិតណាមួយនោះទេ។
ក្នុងប្រជុំផ្ទៃក្នុងមួយរបស់ក្រុមហ៊ុនគីរីន កាលពីថ្ងៃទី៩ ខែវិច្ឆិកាកន្លងទៅ លោក Toru Yoshimura អ្នកចាត់ការនៃយុទ្ធសាស្ត្ររបស់ក្រុមហ៊ុនគីរីន បានលើកឡើងថា ខាងក្រុមហ៊ុនជប៉ុនមួយនេះ មានបំណងបញ្ចប់ទំនាក់ទំនងជាមួយក្រុមហ៊ុនស្រាបៀមីយ៉ាន់ម៉ាឱ្យបានឆាប់ៗ ហើយក៏ត្រៀមខ្លួនតាមផ្លូវច្បាប់នានាផងដែរ។
កាលពីឆ្នាំ២០១៩កន្លងទៅ ក្រុមហ៊ុនគីរីនអាចរកប្រាក់ចំណូលពីការលក់ស្រាបៀមីយ៉ាន់ម៉ាបានប្រមាណចំនួន ១១៥លានដុល្លារអាមេរិក។ យ៉ាងណាមិញ នៅក្នុងឆ្នាំ២០២១នេះ ជាពិសេសចាប់តាំងពីខែមករា ដល់ខែកញ្ញា ក្រុមហ៊ុននេះបានបាត់បង់ប្រាក់ចំណូលប្រមាណ ៤១% ឬ ប្រហាក់ប្រហែលនឹង ១២៤លានដុល្លារ បើធៀបនឹងឆ្នាំមុន។ ហើយអ្នកអង្កេតយល់ឃើញថា នេះគឺដោយសារតែនៅមីយ៉ាន់ម៉ា មានចលនាមួយធ្វើពហិការការប្រើប្រាស់ផលិតផល ដែលមានទំនាក់ទំនងជាមួយក្រុមយោធា៕
