ប៉េកាំង៖ រដ្ឋមន្រ្តីការបរទេស និងជាក្រុមប្រឹក្សារដ្ឋចិន លោក វ៉ាង យី នឹងចូលរួមក្នុងកិច្ចប្រជុំថ្នាក់រដ្ឋមន្រ្តីការបរទេសលើកទី ១៨ ជាមួយសមភាគីរបស់លោក មកពីរុស្ស៊ី និងឥណ្ឌានៅក្នុងថ្ងៃ សុក្រ សប្តាហ៍នេះ។ នេះបើតាមការប្រកាសរបស់ក្រសួងការបរទេសចិន។

កិច្ចប្រជុំត្រីភាគីតាមវីដេអូនេះ រដ្ឋមន្រ្តីការបរទេសឥណ្ឌាលោក ស៊ូប្រាម៉ានយ៉ាំ ចៃហ្សានកា ជាប្រធាននៃកិច្ចប្រជុំ រដ្ឋមន្រ្តីការបរទេសរុស្ស៊ីលោក សឺហ្គេ ឡាវរូវ ព្រមទាំងរដ្ឋមន្រ្តីការបរទេសចិនលោក វ៉ាង យី ដែលហៅកាត់ថា (RIC)។ រដ្ឋមន្ត្រីការបរទេសទាំងបីត្រូវបានគេរំពឹងថា នឹងមានធ្វើកិច្ចពិភាក្សាគ្នាទៅលើបញ្ហាក្នុងតំបន់ដែលមានផលប្រយោជន៍ទៅវិញទៅមក រួមទាំងស្ថានការណ៍នៅអាហ្វហ្គានីស្ថានផងដែរ។ បើតាមសេចក្តីថ្លែងការណ៍របស់ក្រសួងការបរទេសឥណ្ឌា ប្រមុខការទូតទាំងបីក៏ត្រូវបានគេរំពឹងដែរថា នឹងពិភាក្សាអំពីការពង្រឹងបន្ថែមទៀត នូវកិច្ចសហប្រតិបត្តិការត្រីភាគី រួមទាំងការផ្លាស់ប្តូរទស្សនៈលើបញ្ហាតំបន់ និងអន្តរជាតិដែលមានសារៈសំខាន់ផ្សេងៗទៀត។

គួរបញ្ជាក់ថា ប្រទេសឥណ្ឌាបានកាន់តំណែងជាប្រធាននៃកិច្ចប្រជុំ RIC បន្ទាប់ពីកិច្ចប្រជុំត្រីភាគីលើកចុងក្រោយនៅទីក្រុងម៉ូស្គូ កាលពីខែកញ្ញា ឆ្នាំមុន។ ហើយបន្ទាប់ពីកិច្ចប្រជុំត្រីភាគី នៅក្នុងថ្ងៃ សុក្រ សប្តាហ៍នេះ លោក ចៃហ្សានកា នឹងប្រគល់តួនាទីជាប្រធាននៃ RIC ទៅឱ្យរដ្ឋមន្ត្រីការបរទេសចិនវិញ សម្រាប់រយៈពេលមួយឆ្នាំបន្ទាប់៕ ប្រភព៖ CGTN និង livemint