អង្គការ WHO៖ វីរុសបំប្លែងថ្មី “អូមីក្រុង” ឆ្លងរាតត្បាតដល់ ៥៧ប្រទេសហើយ ខណៈដែលអ្នកជំងឺសម្រាកនៅមន្ទីរពេទ្យរំពឹងនឹងកើនឡើង
បរទេស៖ អង្គការសុខភាពពិភពលោក (WHO) បានបញ្ជាក់ថា វីរុសកូវីដ១៩បំប្លែងថ្មី អូមីក្រុង ត្រូវបានគេរាយការណ៍ពីការរកឃើញក្នុងប្រទេសចំនួន ៥៧ ហើយ ខណៈដែលចំនួនអ្នកជំងឺចូលព្យាបាលនៅមន្ទីរពេទ្យទំនងជានឹងកើនឡើងបន្ថែមទៀត។
នៅក្នុងរបាយការណ៍ជំងឺឆ្លងប្រចាំសប្តាហ៍របស់ខ្លួន អង្គការសុខភាពពិភពលោក (WHO) បានបញ្ជាក់ថា បើទោះជាការឈឺធ្ងន់ធ្ងរស្មើគ្នា ឬមានសក្តានុពលទាបជាងមេរោគ ដែរតា ក៏វីរុស អូមីក្រុង ត្រូវបានគេគិតថា ការចូលព្យាបាលនៅមន្ទីរពេទ្យនឹងកើនឡើង ប្រសិនបើមនុស្សឆ្លងកាន់តែច្រើន ប៉ុន្តែនឹងមានពេលយឹតយ៉ាវរវាងការកើនឡើងនៃករណីឆ្លង និងស្លាប់។ របាយការណ៍បង្ហាញថា ចំនួនឆ្លងជំងឺកូវីដ១៩នៅអាហ្វ្រិកខាងត្បូងបានកើនឡើងទ្វេដងនៅសប្តាហ៍ត្រឹមថ្ងៃទី៥ ខែធ្នូ រហូតដល់ជាង ៦ម៉ឺន២ពាន់នាក់ និងឆ្លងច្រើនបំផុតនៅប្រទេសអេសវ៉ាទីនី ហ្ស៊ីមបាវ៉េ ម៉ូសំប៊ិក ណាមីប៊ី និង ឡេសូតូ។
យោងទៅលើហានិភ័យនៃការឆ្លងឡើងវិញ អង្គការ WHO បានបញ្ជាក់ថា ការវិភាគបឋមបង្ហាញថា ការផ្លាស់ប្តូររូបរាងវីរុសកូវីដ១៩បំប្លែងថ្មី អូមីក្រុង ទំនងជាអាចកាត់បន្ថយសកម្មភាពអង់ទីគ័រ ដែលធ្វើឲ្យថយចុះប្រសិទ្ធភាពការពាររបស់ប្រព័ន្ធភាពស៊ាំ៕ ប្រភព៖ Reuters
