ព្រៃវែង៖ ព្រឹកថ្ងៃទី១០ ខែធ្នូ ឆ្នាំ២០២១ នៅសាលាបឋមសិក្សាព្រហារស្ថិតនៅក្នុងភូមិទ័ពស្តេច ឃុំច្រេស ស្រុកមេសាង ខេត្តព្រៃវែង មានរៀបចំកម្មវិធីដាក់ឱ្យដំណើរការបណ្ណាល័យមេគង្គ-ឡានឆាង ដែលជាជំនួយឧបត្ថម្ភរបស់មជ្ឈមណ្ឌលប្រទេសចិនសម្រាប់បោះពុម្ពនិងចែកផ្សាយសៀវភៅទៅកាន់បរទេស និង មូលនិធិសប្បុរសធម៌សុខភាពសាធារណៈប៉េកាំង តាមរយៈសមាគមអ្នកស្រាវជ្រាវវឌ្ឍនភាពកម្ពុជា-ចិន។

លោកជំទាវបណ្ឌិតសភាចារ្យ ខ្លូត ធីតា ទីប្រឹក្សាផ្ទាល់សម្តេចតេជោនាយករដ្ឋមន្ត្រីបានថ្លែងនូវការកោតសរសើរចំពោះកិច្ចខិតខំរបស់លោកស្រី ឈិន សឺ នាយិកាមជ្ឈមណ្ឌលប្រទេសចិនសម្រាប់បោះពុម្ពនិងចែកផ្សាយសៀវភៅទៅកាន់បរទេស និងជាប្រធានកិត្តិយសនៃក្រុមប្រឹក្សាភិបាលនៃមូលនិធិសប្បុរសធម៌សុខភាពសាធារណៈប៉េកាំង លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន និង ព្រះតេជគុណ Zhao Xin សមាគមពុទ្ធសាសនិកកម្ពុជា-ចិនដែលបានកៀងគរជំនួយឧបត្ថម្ភនានាក្នុងការចូលរួមកែលម្អបណ្ណាល័យនេះ ដើម្បីជាប្រយោជន៍សាធារណៈក្នុងការបង្កើនបរិមាណអ្នកអានជាមួយនឹងបរិមាណដ៏ច្រើននៃសៀវភៅអានទាំងខេមរភាសា ភាសាចិន និងភាសាបរទេសជាច្រើនទៀត។

លោកជំទាវក៏បានរំលេចផងដែរពីទំនាក់ទំនងជាប្រពៃណីរវាងប្រជាជាតិយើងទាំងពីរ កម្ពុជានិងចិន ដែលបណ្ណាល័យមេគង្គ-ឡានឆាងនឹងក្លាយជាមជ្ឈមណ្ឌលតភ្ជាប់ដួងចិត្តរវាងប្រជាជននិងប្រជាជនរបស់យើងថែមមួយកម្រិតទៀត។ តាមរយៈលោក QUAN YANGANG ប្រធានមជ្ឈមណ្ឌលវប្បធម៌ចិនប្រចាំកម្ពុជា ឯកឧត្តម Wang Wentian ឯកអគ្គរដ្ឋទូតចិនប្រចាំកម្ពុជាបានផ្ញើសារលិខិតអបអរសាទរដោយបានរំលេចពីគុណតម្លៃរបស់បណ្ណាល័យនេះថាជាមជ្ឈមណ្ឌលតម្កល់ឯកសារអាន សម្រាប់បង្កើនពុទ្ធិដល់កុមារកម្ពុជាកាន់តែច្រើន។

ថ្លែងទៅកាន់អង្គពិធីដែលមានអ្នកចូលរួមប្រមាណជិត៦០០នាក់ដែលពោរពេញដោយក្តីរំភើបរីករាយ លោក បឿន ធាក នាយកសាលាបឋមសិក្សាព្រហារបានថ្លែងអំណរគុណដល់ម្ចាស់អំណោយ ជាពិសេសមិត្តចិនដែលបានចូលរួមនៅក្នុងការកែលម្អសោភណភាពនិងធ្វើទំនើបកម្មបណ្ណាល័យ ផ្តល់កុំព្យូទ័រ ព្រីនធឺ សៀវភៅអានជាខេមរភាសានិងភាសាចិនចំនួន៨០០ក្បាល ព្រមទាំងបានផ្តល់នូវសម្ភារៈសិក្សាជាច្រើនដល់សិស្សានុសិស្ស៤៧៥នាក់ ដោយសរុបថវិការួមប្រមាណ៣៥លានរៀល៕