កិច្ចព្រមព្រៀងបទឈប់បាញ់នៅភាគខាងកើតប្រទេសអ៊ុយក្រែនត្រូវយល់ព្រមដោយអ្នកចរចា
ក្រុមអ្នកចរចាមកពីអ៊ុយក្រែន រុស្សី និងអង្គការសន្តិសុខ និងសហប្រតិបត្តិការនៅអឺរ៉ុប (OSCE) បានយល់ព្រមស្ដារកិច្ចព្រមព្រៀងឈប់បាញ់ពេញលេញរវាងកងកម្លាំងរដ្ឋាភិបាលអ៊ុយក្រែន និងក្រុមផ្ដាច់ខ្លួនដែលគាំទ្រដោយរុស្សីនៅភាគខាងកើតអ៊ុយក្រែន នេះបើតាមការប្រកាសរបស់ OSCEកាលពីថ្ងៃពុធ ទី២២ ធ្នូ។
លោកឯកអគ្គរដ្ឋទូតមីកូ គីនណូណេន ដែលជាតំណាងពិសេសរបស់ប្រធាន OSCE បាននិយាយក្នុងសេចក្ដីថ្លែងការណ៍មួយថា៖ «ខ្ញុំមានសេចក្ដីសោមនស្សរីករាយដែលអ្នកចូលរួមសម្តែងការប្តេជ្ញាចិត្តយ៉ាងមុតមាំក្នុងការប្រកាន់ខ្ជាប់យ៉ាងពេញលេញនូវវិធានការពង្រឹងកិច្ចព្រមព្រៀងឈប់បាញ់ថ្ងៃទី ២២ ខែកក្កដា ឆ្នាំ ២០២០»។
លោកបន្ថែមទៀតថា៖ «កិច្ចព្រមព្រៀងថ្មីនេះមានសារៈសំខាន់បំផុតសម្រាប់ប្រជាជនដែលរស់នៅសងខាងនៃខ្សែទំនាក់ទំនង»។
ក្នុងរយៈពេលប៉ុន្មានខែចុងក្រោយនេះ ក្រុងកៀវ និងក្រុងមូស្គូបានចោទប្រកាន់គ្នាទៅវិញទៅមកថាបានរំលោភបំពានកិច្ចព្រមព្រៀងឈប់បាញ់មុន ដែលត្រូវបានព្រមព្រៀងដោយភាគីទាំងពីរកាលពីខែកក្កដាឆ្នាំ ២០២០ និងបានជួយកាត់បន្ថយចំនួនអ្នកស្លាប់ និងរបួសយ៉ាងច្រើននៅសមរភូមិអ៊ុយក្រែនខាងកើយកាលពីឆ្នាំមុន។
ការប្រយុទ្ធគ្នាធំដុំរវាងកងកម្លាំងរដ្ឋាភិបាលអ៊ុយក្រែន និងកងកម្លាំងផ្ដេចខ្លួនគាំទ្រដោយរុស្សី ត្រូវបានបញ្ចប់ដោយកិច្ចព្រមព្រៀងធ្វើឡើងកាលពីឆ្នាំ២០១៥ នៅរដ្ឋធានីមីនស្ក៍ប្រទេសបេឡារូសជាមួយនឹងការសម្រុះសម្រួលរបស់អាល្លឺម៉ង់ និងបារាំង ប៉ុន្តែការប៉ះទង្គិចគ្នាបានកើតឡើងជាបន្តបន្ទាប់ ហើយនៅតែសម្លាប់ជនស៊ីវិល និងទាហាន៕
