ក្រុមប្រឹក្សាសន្តិសុខអ.ស.ប អនុម័តសេចក្ដីសម្រេចផ្ដល់ជំនួយដល់អាហ្វហ្គានីស្ថាន
ក្រុមប្រឹក្សាសន្តិសុខអង្គការសហប្រជាជាតិបានអនុម័តជាឯកច្ឆន្ទ នូវសេចក្ដីសម្រេចមួយដែលស្នើរឡើងដោយសហរដ្ឋអាមេរិក ដើម្បីសម្របសម្រួលការផ្ដល់ជំនួយមនុស្សធម៌ទៅឱ្យប្រជាជនអាហ្វហ្គានីស្ថាន ដោយជៀសវាងការផ្ដល់ថវិកាឱ្យរដ្ឋាភិបាលតាលីបង់។
សេចក្ដីសម្រេចអនុម័តកាលពីថ្ងៃពុធ ទី២២ ធ្នូបានចែងថា៖ «ការទូទាត់មូលនិធិ ទ្រព្យសម្បត្តិហិរញ្ញវត្ថុផ្សេងទៀត ឬធនធានសេដ្ឋកិច្ច និងការផ្ដល់ទំនិញ និងសេវាកម្មចាំបាច់ ដើម្បីធានាថាការផ្តល់ជំនួយទាន់ពេលវេលា ឬគាំទ្រសកម្មភាពបែបនេះត្រូវបានអនុញ្ញាត»។ ជំនួយបែបនេះគាំទ្រ «តម្រូវការមូលដ្ឋានរបស់មនុស្សក្នុងប្រទេសអាហ្វហ្គានីស្ថាន» ហើយវា «មិនមែនជាការរំលោភ» លើទណ្ឌកម្មដែលដាក់លើបុគ្គល ឬនីតិបុគ្គលដែលមានទំនាក់ទំនងជាមួយក្រុមតាលីបង់នោះទេ។
ការសម្រេចចិត្តកំណត់សុពលភាពនៃសេចក្ដីសម្រេចនេះត្រឹមមួយឆ្នាំ ដែលមិនមានក្នុងសេចក្ដីព្រាងដំបូង ត្រូវបានធ្វើឡើងដើម្បីបំពេញចិត្តរបស់អឺរ៉ុប និងឥណ្ឌាដែលបានរិះគន់អំពីកង្វះនៃការកំណត់សុពលភាព និងបានទាមទារការត្រួតពិនិត្យ និងឃ្លាំមើលយ៉ាងតឹងរ៉ឹងទៅលើការផ្ទេរ និងការប្រើប្រាស់ជំនួយ។
សហគមន៍អន្តរជាតិមានភាពស្ទាក់ស្ទើរក្នុងការផ្ដល់ជំនួយទៅឱ្យប្រទេសអាហ្វហ្គានីស្ថាន ដើម្បីជួយជៀសវាងការដួលរលំសេដ្ឋកិច្ច និងគ្រោះទុរ្ភិក្ស បន្ទាប់ការចូលកាន់អំណាចរបស់ក្រុមតាលីបង់កាលពីខែសីហា។
ក្រុមតាលីបង់ស្វាគមន៍សេចក្ដីសម្រេចនេះ ហើយបានជំរុញឱ្យមានការដកទណ្ឌកម្មទៅលើសមាជិកជាន់ខ្ពស់របស់ខ្លួន។
មុននេះអាមេរិកបានស្នើសេចក្ដីសម្រេចមួយដើម្បីលើកលែងការដាក់ទណ្ឌកម្មតាមករណីនីមួយៗ ប៉ុន្តែត្រូវបានរារាំងដោយប្រទេសចិន និងរុស្សី ដែលមានសិទ្ធវេតូជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។
