ក្រុមហ៊ុនបច្ចេកវិទ្យាស.រ.អា Intel សុំទោសចិន ក្រោយខ្លួនចេញសេចក្ដីថ្លែងការណ៍ពាក់ព័ន្ធស៊ីនជាំង
ក្រុមហ៊ុនបច្ចេកវិទ្យាអាមេរិកធំមួយ Intel បានចេញសេចក្ដីថ្លែងការណ៍សុំទោសអតិថិជនរបស់ចិនកាលពីថ្ងៃព្រហស្បតិ៍កន្លងទៅ ក្រោយពេលដែលខ្លួនបានចេញលិខិតមួយប្រាប់អ្នកផ្គត់ផ្គង់របស់ខ្លួនថា មិនឱ្យប្រើប្រាស់កម្លាំងពលកម្ម ឬ វត្ថុធាតុដើមនៅតំបន់ស្វយ័តស៊ីនជាំងរបស់ចិននោះឡើយ។
ក្នុងលិខិតដែលចុះខែធ្នូនេះ ក្រុមហ៊ុន Intel បានលើកឡើងថា ខ្លួនត្រូវការ «ធានាថា សង្វាក់ពលកម្មរបស់ក្រុមហ៊ុនមិនមានប្រើប្រាស់កម្លាំងពលកម្ម ឬ ទំនិញ ឬ សេវាកម្មមកពីតំបន់ស៊ីនជាំងនោះឡើយ» បន្ទាប់ពីមានការដាក់បម្រាមពីរដ្ឋាភិបាលជាច្រើន។
រដ្ឋាភិបាលប្រទេសលោកខាងលិចមួយចំនួនជាពិសេស សហរដ្ឋអាមេរិកបានធ្វើការដាក់ទណ្ឌកម្ម ឬ ដាក់បម្រាមចុះឡើង ដោយហាមប្រាមមិនឱ្យក្រុមហ៊ុនរបស់ខ្លួនប្រើប្រាស់វត្ថុធាតុដើម ឬ កម្លាំងពលកម្មនានានៅក្នុងតំបន់ស៊ីនជាំង ដោយយោងលើហេតុផលថា ចិនបានធ្វើការរំលោភសិទ្ធិមនុស្សទៅកាន់ជនជាតិអ៊ុយហ្គ័រ ដែលរស់នៅតំបន់នោះ។
ក្រោយពី Intel ចេញលិខិតនេះហើយ ខាងចិនបានធ្វើការប្រតិកម្មយ៉ាងខ្លាំង ដោយអ្នកប្រើប្រាស់បណ្ដាញសង្គមនៅប្រទេសចិនថែមទាំងអំពាវនាវឱ្យធ្វើពហិការមិនប្រើប្រាស់ផលិតផល Intel ទៀតផង។
លុះនៅថ្ងៃព្រហស្បតិ៍នេះ Intel បានចេញលិខិតសុំទោសដោយមានខ្លឹមសារថា៖ «យើងខ្ញុំសូមធ្វើការអភ័យទោសចំពោះកំហុស ដែលធ្វើឱ្យប៉ះពាល់ដល់អតិថិជន ដៃគូ និងសាធារណមតិចិនជាទីគោរព។ Intel នៅតែប្ដេជ្ញាក្នុងការក្លាយជាដៃគូបច្ចេកវិទ្យា ដែលអាចជឿទុកចិត្តបាន ហើយជំរុញឱ្យមានសន្ទុះអភិវឌ្ឍន៍រួមនៅក្នុងប្រទេសចិន»៕
