នាយករដ្ឋមន្ត្រីកាណាដា៖ រដ្ឋនៅប្រទេសលោកខាងលិចត្រូវការរណសិរ្សរួបរួមប្រឆាំងនឹងប្រទេសចិន
ក្នុងបទសម្ភាសន៍មួយដែលបានចេញផ្សាយកាលពីថ្ងៃសៅរ៍ ទី២៥ធ្នូ នាយករដ្ឋមន្ត្រីកាណាដាលោកចាស្ទីន ទ្រូដូបាននិយាយថាបណ្ដាប្រទេសលោកខាងលិចត្រូវការរណសិរ្សរួបរួមប្រឆាំងនឹងប្រទេសចិន ដើម្បីរារាំងប្រទេសមហាអំណាចអាស៊ីមួយនេះកុំឱ្យប្រើប្រាស់សម្ពាធពាណិជ្ជកម្មក្នុងន័យបង្កឱ្យលោកខាងលិចមានការបែកបាក់ និងប្រឆាំងគ្នា។
លោកទ្រូដូ បាននិយាយក្នុងបទសម្ភាសន៍ជាមួយប៉ុស្តិ៍ទូរទស្សន៍ Global Television ថា៖ «យើង(លោកខាងលិច) បានប្រកួតប្រជែង ហើយប្រទេសចិន ពីមួយពេលទៅមួយពេល បានធ្វើការរៀបចំយ៉ាងឆ្លាតវ័យឱ្យយើង(លោកខាងលិច) ប្រឆាំងគ្នានៅលើទីផ្សារពានិជ្ជកម្មបើកចំហ»។
លោកបន្ថែមទៀតថា៖ «យើងត្រូវធ្វើការងារឱ្យបានល្អជាងនេះ ក្នុងការធ្វើការជាមួយគ្នា និងឈរឱ្យរឹងមាំ ដូច្នេះចិនមិនអាចលេងមុំ និងបំបែកបំបាក់ឱ្យប្រឆាំងគ្នាទៅវិញទៅមក»។
ទំនាក់ទំនងចិន-កាណាដាបានធ្លាក់ដល់កម្រិតទាបបំផុតបន្ទាប់ពីអាជ្ញាធរកាណាដាចាប់ខ្លួននាយកហិរញ្ញវត្ថុក្រុមហ៊ុនចិន Huawei លោកស្រីម៉េង វ៉ាន់ជូវក្រោមដេកាបត្យាប័នស្នើដោយសហរដ្ឋអាមេរិក។ ភ្លាមៗក្រោយនោះ អាជ្ញាធរចិនបានចាប់ខ្លួនពលរដ្ឋកាណាដាចំនួនពីររូប។
កាលពីខែកញ្ញា លោកស្រីម៉េង និងក្រសួងយុត្តិធម៌អាមេរិកបានឈានដល់កិច្ចព្រមព្រៀងមួយដើម្បីដោះស្រាយសំណុំរឿងនេះ ដោយអាមេរិកបានដកដេកាបត្យាប័ន ហើយលោកស្រីត្រូវបានដោះលែង។ ពលរដ្ឋកាណាដាទាំងពីររូបត្រូវបានដោះលែងបន្ទាប់ពីលោកស្រីម៉េងត្រូវបានដោះលែង៕
ប្រភព៖ Reuters
