វ៉ារ៉្យង់អូមីក្រុងរីករាលដាលកាន់តែច្រើន ខណៈពលរដ្ឋភាគខ្លះៗនៅតែមិនព្រមទទួលវ៉ាក់សាំង
បើទោះជាគេនៅមិនទាន់បានកំណត់បានថា វ៉ារ៉្យង់អូមីក្រុង ដែលកំពុងរីករាលដាលនៅក្នុងទីក្រុងញូវយ៉ក ភាគឦសាន និងភាគកណ្តាលភាគខាងលិច នៃសហរដ្ឋអាមេរិកអាចនឹងបណ្ដាលឱ្យមានការចូលមន្ទីរពេទ្យ និងការស្លាប់ច្រើន ឬ យ៉ាងណាក៏ដោយ ក៏ការសិក្សាដំបូងបង្ហាញថា វ៉ារ្យ៉ង់ថ្មីអាចបណ្តាលឱ្យមានជំងឺធ្ងន់ធ្ងរតិចជាងវ៉ារ្យ៉ង់មុនៗ ប៉ុន្តែអ្វីជាបញ្ហាគឹថា ប្រជាពលរដ្ឋមួយចំនួននៅតែរឹងរូសមិនព្រមទទួលវ៉ាក់សាំងកូវីដនៅឡើយ។
ទោះជាប្រទះឬដឹងពីករណីឆ្លងច្រើន ដោយសារវ៉ារ៉្យង់អូមីក្រុងហើយ ពលរដ្ឋមួយចំនួននៅមិនទាន់ផ្លាស់ប្ដូរគំនិតទទួលវ៉ាក់សាំងវិញទេ ដោយមនុស្សពេញវ័យ ៩០ ភាគរយមិនបានចាក់វ៉ាក់សាំង បាននិយាយថា វ៉ារ្យ៉ង់នេះ នឹងនៅតែមិនអាចបង្ខំឱ្យពួកគេចាក់វ៉ាក់សាំងដែរ។ នេះបើយោងតាមការស្ទង់មតិថ្មីៗនេះពីមូលនិធិគ្រួសារ Kaiser ។
ទន្ទឹមនឹងនេះ អ្នកដែលមិនបានទទួលថ្នាំបង្ការមួយចំនួន បាននិយាយថា ឥទ្ធិពលវ៉ារ៉្យង់ដូច្នេះក្ដី វានៅតែមិនអាចផ្លាស់ប្ដូរគំនិតប្រជាពលរដ្ឋនោះបានទេ ខណៈអ្នកផ្សេងទៀត បាននិយាយថា ការផ្លាស់ប្ដូររបស់មេរោគ ឬ វ៉ារ៉្យង់នេះជាហេតុផលធម្មជាតិ ដែលរឹតតែធ្វើឱ្យពួកគេមិនព្រមទទួលវ៉ាក់សាំង។
លោក Dianne Putnam ប្រជាពលរដ្ឋអាមេរិកម្នាក់ ដែលមិនបានចាក់វ៉ាក់សាំងនៅស្រុក Dalton បាននិយាយថា៖ «នេះគ្រាន់តែជាវ៉ារ្យ៉ង់មួយផ្សេងទៀត។ ឆ្នាំក្រោយនឹងមានមួយទៀត។ ខ្ញុំចង់មានន័យថា វាចេះតែកើតថ្មីរហូត»។
វិធានការណ៍សុខភាពសាធារណៈ និងយុទ្ធនាការវ៉ាក់សាំងរបស់និយោជិត បានដំណើរការតាំងពីរដូវក្តៅមកម្ល៉េះ ដើម្បីធ្វើចំណាត់ការលើអ្នករឹងរូសមិនព្រមទទួលវ៉ាក់សាំង មនុស្សដែលមិនមានលទ្ធភាពទទួលបានការថែទាំសុខភាព និងអ្នកដែលស្ទាក់ស្ទើរ ប៉ុន្តែអាចបញ្ចុះបញ្ចូលបាន។
ការស្ទង់មតិបានបង្ហាញថា ពលរដ្ឋអាមេរិក ដែលមិនទាន់បានចាក់វ៉ាក់សាំង មានការប្រឆាំងយ៉ាងម៉ុតមាំ ចំពោះការទទួលបានវ៉ាក់សាំងភាគច្រើន ទំនងជាអត្រាប្រជាជនវ័យក្មេង ក្រុមសាសន៍ស និងជាអ្នកគាំទ្រគណបក្សសាធារណរដ្ឋភាគច្រើន។
អត្រាទទួលបានវ៉ាក់សាំងកម្រិតទាបនៅតែប្រមូលទូរលេខខ្ពស់នៅតំបន់ជនបទ និងប៉ែកខាងត្បូងប្រទេស ដូចជារដ្ឋ Louisiana, Mississippi, Georgia, Arkansas និង Alabama ជាដើម។ មានទូរលេខទាបជាងអត្រាថ្នាក់ជាតិប្រហែល ៦២ ភាគរយនៃរដ្ឋទាំងនេះ ទទួលបានវ៉ាក់សាំងពេញលេញ។
លោកវេជ្ជបណ្ឌិត José R. Romero លេខាធិការសុខាភិបាលរដ្ឋ Arkansas បាននិយាយថា៖ «អត្រានៃការចាក់វ៉ាក់សាំងក្នុងរដ្ឋរបស់លោក ដែលកើនឡើងស្ទើមិនធ្លាក់ចុះសោះ បានឆ្លុះបញ្ចាំងថា ការប្រឆាំងយ៉ាងជ្រាលជ្រៅរបស់អ្នកមិនព្រមទទួលវ៉ាក់សាំង គឺសុទ្ធតែជាអ្នកងាយស្រួលក្នុងការបញ្ចុះបញ្ចូលបាន»។
លោកវេជ្ជបណ្ឌិត Romero បាននិយាយថា៖ «ជាអកុសល យើងមិនអាចសន្មត់បានថា ការទទួលបានវ៉ាក់សាំងនេះ នឹងបង្កជាការផ្លាស់ប្ដូរដ៍អស្ចារ្យណាមួយទេ ដោយសារយើងមានភាពយឺតយ៉ាវបន្តិចបន្តួចចំពោះរឿងនេះ។ វាប្រៀបបាននឹង កណ្តុរស៊ីដំរីអញ្ចឹងៗ បានម្ដងបន្តិចៗ ហើយយើងត្រូវតែបន្តវាអត់ឈប់»។
ពលរដ្ឋអាមេរិក ដែលមិនបានចាក់វ៉ាក់សាំងនៅឆ្នាំនេះ បានបង្កឱ្យមានករណីធ្ងន់ធ្ងរ និងការស្លាប់ភាគច្រើន ដោយសារវីរុស ហើយអ្នកជំនាញសុខភាពនិយាយថា ការចាក់វ៉ាក់សាំងនៅតែជាវិធីល្អបំផុត ដើម្បីការពារប្រឆាំងនឹងជំងឺធ្ងន់ធ្ងរ និងការស្លាប់។
លោក Bill Hanage អ្នកឯកទេសខាងរោគរាតត្បាតនៅសាកលវិទ្យាល័យ Harvard T.H បាននិយាយថា៖ «អ្នក ដែលមិនបានទទួលវ៉ាក់សាំងទំនងជាអាចនឹងត្រូវចូលមន្ទីរពេទ្យ និងត្រូវចំណាយថ្លៃគ្រែពេទ្យ ដែលគេកំពុងតែត្រូវការ កាន់តែច្រើនទៀតក្នុងរដូវរងារនេះ»។
វេជ្ជបណ្ឌិត Luciana Borio អតីតប្រធានអ្នកវិទ្យាសាស្ត្រនៅរដ្ឋបាលចំណីអាហារ និងឱសថ អាមេរិក បាននិយាយថា៖ «ការឈានដល់ការចាក់វ៉ាក់សាំងនៅពេលនេះ គឺជា ”ទិដ្ឋភាពដ៏លំបាកបំផុត” នៃការឆ្លើយតបរបស់សហរដ្ឋអាមេរិក ដែលជាផ្នែកមួយដែលទាមទារឱ្យមានការផ្លាស់ប្តូរនៅក្នុងអណ្ណត្តិនេះ។ ការផ្ដល់អាទិភាពរបស់រដ្ឋាភិបាលសហព័ន្ធ និងនៅតាមរដ្ឋនិមួយៗ ដើម្បីបើកទីតាំងវ៉ាក់សាំងសហគមន៍ឡើងវិញ ឬ ការជំរុញឱ្យអ្នកផ្តល់សេវាផ្តោតការយកចិត្តទុកដាក់បន្ថែមទៀតលើការចាក់លើកដំបូង គឺជាការចាំបាច់បំផុត»។
គិលានុបដ្ឋាយិកានៅមន្ទីរពេទ្យ Chrisley ថ្មីៗនេះ បានដឹកនាំការជំរុញឱ្យមានជាក្រុមសហជីព ដោយនិយាយថា បន្ទុកការងាររបស់ពួកគេមិនមាននិរន្តរភាព ហើយថាការងារនេះជាការងារលំបាក ហើយការងារនេះក៏កាន់តែលំបាកទៅៗ ដោយសារមិនមានការសហការពីប្រជាជន។
នៅមន្ទីរពេទ្យ PIH Health Good Samaritan ក្នុងទីក្រុង Los Angeles អ្នកស្រី Jennifer Delisle ដែលជាគិលានុបដ្ឋាយិកាផ្នែកវះកាត់ និងផ្នែកឆ្អឹង បាននិយាយថា បើទោះជា រដូវរងានេះ មានសភាពស្ងប់ស្ងាត់ និងអាចគ្រប់គ្រងបានច្រើនជាងឆ្នាំមុនក៏ដោយ អ្នកស្រីមានការបារម្ភចំពោះស្ថានការនៅក្នុងពេលប៉ុន្មានខែខាងមុខ ដោយសារភាពធូររលុង និងការមិនយកចិត្តទុកដាក់ពីការរក្សាគន្លាតសង្គម និងការពាក់ម៉ាស់នៅពេលថ្ងៃ បុណ្យ ខាងមុខ។
ប្រភព៖ New York Times
