យ៉ាងហោចណាស់មនុស្ស ៤១ នាក់ត្រូវបានសម្លាប់ក្នុងការវាយប្រហារដោយក្រុមប្រដាប់អាវុធនៅប៊ួគីណាហ្វាសូកាលពីសប្ដាហ៍មុន
រដ្ឋាភិបាលប៊ួគីណាហ្វាសូប្រកាសកាលពីថ្ងៃអាទិត្យថា មនុស្សយ៉ាងហោចណាស់ ៤១ នាក់ត្រូវបានសម្លាប់ក្នុងការវាយប្រហារលើរថយន្តដោយក្រុមប្រដាប់អាវុធនៅភាគខាងជើងជិតព្រំដែនប្រទេសម៉ាលីកាលពីថ្ងៃព្រហស្បត្តិ៍សប្ដាហ៍មុន។
រដ្ឋាភិបាលថា អ្នកស្លាប់ទាំងនោះភាគច្រើនជាសមាជិកនៃកងកម្លាំងការពារស្វ័យការពារស៊ីវិលដែលគាំទ្រដោយរដ្ឋាភិបាលដែលគេស្គាល់ថាជាអ្នកស្ម័គ្រចិត្តការពារមាតុភូមិ (VDP) ដែលបង្កើតឡើងដើម្បីគាំទ្រដល់កងទ័ព។ ក្នុងចំណោមជនរងគ្រោះទាំងនោះ មានទាំងលោក Ladji Yoro ដែលជាមេដឹកនាំ VDP។
ខណៈដែលមិនទាន់មានក្រុមណាមួយចេញមុខទទួលខុសត្រូវចំពោះការវាយប្រហារ ក្រុមប្រដាប់អាវុធមួយចំនួនដែលមានទំនាក់ទំនងជាមួយក្រុមអាល់កៃដា កំពុងប្រយុទ្ធជាមួយកងកម្លាំងរដ្ឋាភិបាលនៅក្នុងតំបន់សាហែលអាហ្វ្រិក។ ហើយប៊ួគីណាហ្វាសូក៏រងការវាយប្រហារភេរវកម្មដោយក្រុមសកម្មប្រយុទ្ធទាំងនេះផងដែរក្នុងប៉ុន្មានឆ្នាំថ្មីៗនេះ។
ក្រុមប្រដាប់អាវុធជំរុញឱ្យមានភាពតានតឹងខាងសាសនា និងជនជាតិភាគតិច រវាងសហគមន៍កសិកម្ម និងចិញ្ចឹមសត្វក្នុងប្រទេសម៉ាលី ប៊ូគីណាហ្វាសូ និងនីហ្សេរីយ៉ា ដើម្បីប្រមូលផ្ដុំសហគមន៍ដែលខ្វះខាតឱ្យចូលជាមួយខ្លួន។
ការវាយប្រហារកាលពីថ្ងៃព្រហស្បត្តិ៍គឺជាការវាយប្រហារដ៏សាហាវបំផុតចាប់តាំងពីពាក់កណ្តាលខែវិច្ឆិកា នៅពេលដែលមនុស្សចំនួន ៥៧ នាក់រួមទាំងអាវុធហត្ថចំនួន ៥៣ នាក់ត្រូវបានសម្លាប់នៅក្នុងការវាយប្រហារលើប៉ុស្តិ៍កងរាជអាវុធហត្ថមួយ។
កាលពីសប្តាហ៍មុន ទីភ្នាក់ងារអង្គការសហប្រជាជាតិនិយាយថា អំពើហិង្សាដែលកាន់តែអាក្រក់នៅក្នុងតំបន់សាហែលអាហ្រ្វិក នាំឱ្យមានវិបត្តិមនុស្សធម៌ធ្ងន់ធ្ងរបំផុតមួយរបស់ពិភពលោក។ ការវាយប្រហារនៅប៊ូគីណាហ្វាសូ ឆក់យកជីវិតមនុស្សរាប់ពាន់នាក់ និងបង្ខំមនុស្សជាងមួយលាននាក់ឱ្យភៀសខ្លួនចេញពីផ្ទះរបស់ពួកគេ។
ប្រភព៖ Aljazeera
