ការចរចាកិច្ចព្រមព្រៀងនុយក្លេអ៊ែរអ៊ីរ៉ង់ជុំទី៨ ចាប់ផ្តើមនៅទីក្រុងវីយែន
កិច្ចចរចាដើម្បីស្ដារឡើងវិញនូវកិច្ចព្រមព្រៀងនុយក្លេអ៊ែរឆ្នាំ ២០១៥ របស់អ៊ីរ៉ង់ជាមួយមហាអំណាចជុំទី៨ និងអាចជាចុងក្រោយនៅប្រទេសអូទ្រីស ចាប់ផ្តើមដោយក្តីសង្ឃឹមឆ្ពោះទៅរកដំណោះស្រាយ។
កិច្ចប្រជុំគណៈកម្មការចម្រុះនៃកិច្ចព្រមព្រៀងនុយក្លេអ៊ែរ (JCPOA) បានបញ្ចប់កាលពីយប់ថ្ងៃចន្ទក្នុងរដ្ឋធានីវីយែន ជាមួយនឹងកិច្ចប្រជុំទ្វេភាគី និងត្រីភាគីជាច្រើនរវាងគណៈប្រតិភូផ្សេងៗគ្នា។ ទោះជាយ៉ាងណា មិនមានជំនួបដោយផ្ទាល់រវាងតំណាងរបស់អ៊ីរ៉ង់ និងសហរដ្ឋអាមេរិកទេ ខណៈដែលទីក្រុងតេអេរ៉ង់បដិសេធមិននិយាយដោយផ្ទាល់ជាមួយទីក្រុងវ៉ាស៊ីនតោន បន្ទាប់ពីសហរដ្ឋអាមេរិកបោះបង់ចោលកិច្ចព្រមព្រៀងជាឯកតោភាគីក្នុងឆ្នាំ ២០១៨។
បន្ទាប់ពីកិច្ចប្រជុំ ប្រធានអ្នកចរចារបស់អ៊ីរ៉ង់លោក Ali Bagheri Kani និយាយថា គណៈប្រតិភូយល់ស្របថា វឌ្ឍនភាពល្អ ត្រូវបានធ្វើឡើងក្នុងអំឡុងពេលជុំទី ៧ ដែលបញ្ចប់កាលពី ១០ ថ្ងៃមុន ហើយឥឡូវនេះមានក្របខ័ណ្ឌសមស្រប ដើម្បីដំណើរការកិច្ចពិភាក្សាទៅមុខ។ .
លោកនិយាយថា៖ «រឿងសំខាន់នៅក្នុងកិច្ចប្រជុំគណៈកម្មាការចម្រុះនេះ គឺភាគីផ្សេងៗគ្នាសង្កត់ធ្ងន់លើសារៈសំខាន់នៃការផ្តល់អាទិភាពដល់ការដកទណ្ឌកម្ម ព្រមទាំងការផ្ទៀងផ្ទាត់ និងការធានាក្នុងអំឡុងពេលជុំទី៨ផងដែរ»។
JCPOA ផ្តល់ការបន្ធូរបន្ថយទណ្ឌកម្មដល់អ៊ីរ៉ង់ជាថ្នូរនឹងការទប់ស្កាត់កម្មវិធីនុយក្លេអ៊ែររបស់ខ្លួន។ ប៉ុន្តែបន្ទាប់ពីការដកខ្លួនរបស់សហរដ្ឋអាមេរិក និងការដាក់ទណ្ឌកម្ម អ៊ីរ៉ង់បោះបង់ចោលការទប់ស្កាត់ទាំងនោះ ហើយឥឡូវនេះកំពុងអភិវឌ្ឍម៉ាស៊ីនកម្រិតខ្ពស់ ដើម្បីចម្រាញ់សារធាតុអ៊ុយរ៉ាញ៉ូមរហូតដល់ ៦០ ភាគរយ។
លោក Enrique Mora ដែលជាអ្នកសម្របសម្រួលរបស់សហភាពអឺរ៉ុបនៅក្នុងកិច្ចប្រជុំនោះ ប្រាប់អ្នកសារព័ត៌មានក្រៅកិច្ចប្រជុំថា ពេលវេលាមានកំណត់ដោយសារការវិវត្តន៍នុយក្លេអ៊ែរបស់អ៊ីរ៉ង់ ប៉ុន្តែគណៈប្រតិភូទាំងអស់ចង់បញ្ចប់កិច្ចចរចាដោយជោគជ័យ។
ប្រភព៖ Aljazeera
