ចិនប្រាប់ឱ្យឥណ្ឌូនេស៊ីបញ្ឈប់ការខួងប្រេង-ឧស្ម័ននៅប្រជុំកោះសមុទ្រចិនខាងត្បូង
ចិនបានធ្វើការជម្រាបប្រាប់ឱ្យខាងឥណ្ឌូនេស៊ីបញ្ឈប់ការខួងប្រេង ឬ ឧស្ម័នធម្មជាតិនៅក្បែរកោះណាទូណា (Natuna) ដែលស្ថិតក្នុងតំបន់សមុទ្រចិនខាងត្បូង។ នេះបើតាមការចុះផ្សាយរបស់សារព័ត៌មានជប៉ុននីកេ។
ក្រៅពីការធ្វើការតវ៉ាតាមផ្លូវការទូត ខាងភាគីចិនក៏បានបញ្ជូននាវាឆ្មាំសមុទ្រទៅកាន់តំបន់ខួងយកធនធានធម្មជាតិនៅតំបន់នោះទៀតផង ដើម្បីដាក់សម្ពាធភាគីឥណ្ឌូនេស៊ី។ ប្រមុខអង្គភាពសន្តិសុខលំហសមុទ្រឥណ្ឌូនេស៊ីលោក Aan Kurnia បានប្រាប់អ្នកកាសែតក្នុងខែធ្នូនេះថា ខាងទូកល្បាតរបស់ឥណ្ឌូនេស៊ីបានរកឃើញថា នាវារបស់ចិនបានសំកាំងចម្ងាយប្រមាណ ១០គីឡូម៉ែត្រពីកន្លែងខួងប្រេង-ឧស្ម័ន។ នេះបើតាមការចុះផ្សាយរបស់សារព័ត៌មានហ្សាការតាប៉ុស្តិ៍។
ឥណ្ឌូនេស៊ីបានចាប់ផ្ដើមខួងប្រេងនៅតំបន់កោះណាទូណានេះចាប់តាំងពីចុងខែមិថុនាមក ហើយបញ្ចប់ទៅវិញនៅខែវិច្ឆិកា។ លោក Aan បានលើកឡើងថា ការបញ្ចប់នេះគឺ «ប្រកបដោយជោគជ័យ»។
កោះណាទូណានេះស្ថិតក្នុងតំបន់សេដ្ឋកិច្ចផ្ដាច់មុខរបស់ឥណ្ឌូនេស៊ី ដោយតាមច្បាប់សមុទ្រអន្តរជាតិឆ្នាំ១៩៨២ រដ្ឋភាគីអាចមានសិទ្ធិទាមទារយកដែនសមុទ្រប្រមាណ ២០០ម៉ាយល៍សមុទ្រ ឬ ប្រមាណ ៣៧០គីឡូម៉ែត្រពីឆ្នេរសមុទ្រ។
ចំណែកឯចិនវិញចាត់ទុកកោះនេះស្ថិតក្នុងតំបន់ខ្សែបន្ទាត់ ៩ចំណុច ដែលខ្លួនទាមទារយកមួយផ្នែកធំនៃសមុទ្រចិនខាងត្បូង ដោយផ្អែកលើទិដ្ឋភាពប្រវត្តិសាស្ត្រ។
ជាមួយគ្នានេះដែរ ខាងឥណ្ឌូនេស៊ីក៏ចាប់ពង្រឹងសន្តិសុខនៅតំបន់កោះណាទូណា ដោយពង្រីកវាលចុះយន្តហោះ ក៏ដូចជាចាប់ផ្ដើមសង់នាវាមុជទឹកខ្លួនឯងទៀតផង។ បន្ថែមពីលើនេះទៀត ឥណ្ឌូនេស៊ីបានសហការជាមួយអាមេរិក ក្នុងការសាងសង់មជ្ឈមណ្ឌលហ្វឹកហ្វឺនកងកម្លាំងឆ្មាំសមុទ្រនៅទីនោះផងដែរ។
យ៉ាងណាមិញ ឥណ្ឌូនេស៊ីក៏មិនបែរខ្នងពីស្រុកចិនទេ ដោយកាលពីចុងខែវិច្ឆិកាកន្លងទៅ រដ្ឋមន្ត្រីការពារជាតិប្រទេសនេះ បានជួបជាមួយសមភាគីចិន ក្នុងគោលបំណងកសាងភាពទុកចិត្តគ្នាទៅលើបញ្ហានេះ៕
ប្រភព៖ Nikkie Asia
