យន្តហោះ Boeing 737 Max អនុញ្ញាតឱ្យប្រតិបត្តិការឡើងវិញ ក្រោយធ្លា.ក់ញឹកញាប់
ប្រទេសឥណ្ឌូនេស៊ីបានលុបចោលបំរាមលើប្រតិបត្តិការយន្តហោះប្រភេទ Boeing 737 Max រយៈពេល៣ឆ្នាំ ក្រោយពេលមានហេតុការណ៍ធ្លា.ក់យន្តហោះរបស់ក្រុមហ៊ុនអាកាសចរណ៍ Lion Air បណ្តាលឲ្យបាត់បង់ជីវិតមនុស្សជិត ២០០នាក់។
យន្តហោះប្រភេទ Boeing 737 Max ត្រូវបានហាមឃាត់មិនឲ្យធ្វើប្រតិបត្តិការទូទាំងពិភពលោក ក្រោយជើងហោះហើររបស់ក្រុមហ៊ុនអាកាសចរណ៍ Ethiopian Airlines ធ្លា.ក់កាលពីខែមីនា ឆ្នាំ ២០១៩ ។
កាលពីថ្ងៃច័ន្ទ ទី27 ធ្នូ កន្លងទៅនេះ ក្រុមហ៊ុន Ethiopian Airline បានប្រកាសថា ខ្លួននឹងបន្តជើងហោះហើរនោះវិញនៅខែកុម្ភៈ។
ការប្រកាសលុបបំរាមកើតឡើងតែប៉ុន្មានខែប៉ុណ្ណោះក្រោយពេលយន្តហោះប្រភេទ Boeing 737 Max បានធ្វើប្រតិបត្តិការឡើងវិញនៅអាមេរិក និងអ៊ឺរ៉ុប។
បច្ចុប្បន្ន ប្រទេសជាង ១៨០ បានអនុញ្ញាតឲ្យប្រើប្រាស់យន្តហោះប្រភេទ 737 Max ដោយអូស្ត្រាលី ជប៉ុន ឥណ្ឌា ម៉ាឡេស៊ី និងសិង្ហបុរីជាដើមបានដកបំរាមនៅក្នុងឆ្នាំនេះ។
ក្រសួងដឹកជញ្ជូនឥណ្ឌូនេស៊ីនិយាយក្នុងសេចក្តីប្រកាសថា ការដកបម្រាមនឹងចូលជាធរមានភ្លាមៗ។
ក្រសួងក៏បញ្ជាក់ដែរថា ក្រុមហ៊ុនអាកាសចរណ៍ទាំងអស់ត្រូវតែអនុវត្តន៍តាមការណែនាំ និងត្រួតពិនិត្យយន្តហោះរបស់ពួកគេមុនពេលអាចប្រតិបត្តិការយន្តហោះប្រភេទ 737 Max ម្តងទៀត។
សូមរម្លឹកថា កាលពីថ្ងៃទី ២៩ ខែតុលា ឆ្នាំ ២០១៨ ជើងហោះហើររបស់ក្រុមហ៊ុន Lion Air បានធ្លាក់ចូលក្នុងសមុទ្រ Java រយៈពេល ១៣នាទីក្រោយពេលហោះចេញពីព្រលានយន្តហោះអន្តរជាតិ Soekarno-Hatta ក្នុងរដ្ឋធានី Jakarta បណ្តាលឲ្យអ្នកដំណើរទាំងអស់ចំនួន ១៨៩នាក់ស្លា.ប់។
រយៈពេលប្រមាណ៥ខែបន្ទាប់ ជើងហោះហើររបស់ក្រុមហ៊ុន Ethiopian Airlines ដែលប្រតិបត្តិការយន្តហោះ Boeing 737 Max បានធ្លា.ក់រយៈពេល៦នាទីក្រោយពេលហោះចេញរដ្ឋធានី Addis Ababa បណ្តាលឲ្យមនុស្ស ១៥៧នាក់ស្លា.ប់៕
