និស្សិតខ្មែរថ្នាក់បណ្ឌិតចំនួន២៤រូប ដែលបញ្ចប់ការសិក្សាមកពីក្រៅប្រទេសបានហៅសម្តីរបស់ សម រង្ស៊ី ដែល វាយតម្លៃបង្អាប់គុណភាពសញ្ញា​បត្រសិក្សានៅក្រៅប្រទេស ថាជាអំពើប៉ះពាល់ដល់កិត្តិយស, សេចក្តីថ្លៃថ្នូររបស់ និស្សិតខ្មែរដែលខិតខំរៀន និងបានទាមទារឱ្យ សម រង្ស៊ី ធ្វើការកែតម្រូវនិងសុំទោសជាសាធារណៈ។

និស្សិតខ្មែរ បញ្ចប់ថ្នាក់បណ្ឌិតទាំង២៤នាក់គឺជាប​ណ្តានិស្សិតបញ្ចប់ការសិក្សានៅប្រទេសថៃ, សហរដ្ឋអាមេរិក, ម៉ាឡេស៊ី, ចិន, វៀតណាម, ជប៉ុន, ប្រទេសតួកគី, កូរ៉េខាងត្បូង, សាធារណរដ្ឋឆែក, ប្រទេសរ៉ូម៉ានី និងប្រទេសរុស្ស៊ីជាដើម បានធ្វើលិខិតចំហររួមគ្នាមួយសម្តែងក្តីសោកស្តាយ និងបញ្ជាក់ថាសម្តីរបស់ សម រង្ស៊ី នោះ ពិតជាបានប៉ះពាល់ ដល់គុណភាពអប់រំនៃគ្រឹះស្ថានឧត្តមសិក្សានានានៅក្រៅប្រទេស ដែលក្រុមនិស្សិតបានសិក្សាក្រេបជញ្ជក់យក ចំណេះដឹង។ សាររបស់ក្រុមនិស្សិតខ្មែរបញ្ចប់ថ្នាក់បណ្ឌិត បានថ្លែងថាពួកគេមិនអាចទទួលយកបានឡើយនូវ សម្តីបង្អាប់គុណភាពសញ្ញាបត្រសិក្សានៅក្រៅប្រទេស និងពួកគេបានស្នើឱ្យ សម រង្ស៊ី ធ្វើការកែតម្រូវនិងសុំទោសសាធារណៈ ចំពោះការលើកឡើងដោយគ្មានភស្ថុតាងនេះ។

លិខិតរបស់ក្រុមនិស្សិតដដែល បានប្រកាសគាំទ្រ សារលោក ហ៊ុន ម៉ាណែត ដែលបានសរសេរលើបណ្តាញសង្គមកាលពីថ្ងៃទី២៨ធ្នូ ស្នើឱ្យ សម រង្ស៊ី បញ្ជាក់អំពី អំណះអំណាងដើម្បីការផ្តល់ភាពយុត្តិធម៌ដល់និស្សិតដែលបានបញ្ចប់ការសិក្សានៅក្រៅប្រទេស៕