បៃដិន ពូទីន គ្រោងពិភាក្សាតាមទូរស័ព្ទ ខណៈភាពតានតឹងកើនឡើងនៅអ៊ុយក្រែន
ប្រធានាធិបតីអាមេរិកលោកចូ បៃដិន និងប្រធានាធិបតីរុស្សីលោកវ្ល៉ាឌីមៀរ ពូទីនគ្រោងពិភាក្សាគ្នាតាមរយៈប្រព័ន្ធទូរស័ព្ទនៅថ្ងៃព្រហស្បតិ៍ចុងឆ្នាំ២០២១នេះ ដើម្បីពិភាក្សាអំពីបញ្ហាសន្តិសុខនៅអឺរ៉ុប នេះបើតាមការប្រកាសរបស់សេតវិមាន និងវិមានក្រឹមឡាំង។
កិច្ចប្រជុំនេះគឺជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយភាពតានតឹងនៅប្រទេសអ៊ុយក្រែន ខណៈពេលដែលមានការរាយការណ៍យោធារុស្សីបានដាក់ពង្រាយទាហានជិត ១០០.០០០ នាក់នៅតំបន់ព្រំដែនជាមួយប្រទេសអ៊ុយក្រែន។
មន្ត្រីជាន់ខ្ពស់អាមេរិកមួយរូបបាននិយាយថាកិច្ចប្រជុំតាមរយៈទូរស័ព្ទដែលត្រូវបានរៀបចំតាមសំណើរបស់រុស្សី ហើយថាវានឹងត្រូវការ «កម្រិតខ្ពស់នៃការចូលរួម» ដើម្បីបង្កើតផ្លូវនៃ «ការកាត់បន្ថយភាពតានតឹង»។
មន្ត្រីរូបនេះបន្ថែមទៀតថាលោកបៃដិននឹងបង្ហាញបញ្ជីនៃការព្រួយបារម្ភរបស់អាមេរិកអំពីការប្រមូលផ្ដុំកងទ័ពរុស្សីនៅជិតព្រំដែនប្រទេសអ៊ុយក្រែន ហើយនឹងបញ្ជាក់យ៉ាងច្បាស់ថាសហរដ្ឋអាមេរិក និងសម្ព័ន្ធមិត្តបានត្រៀមខ្លួនដើម្បីឆ្លើយតបប្រសិនបើរុស្សីឈ្លានពានអ៊ុយក្រែន។
រុស្សីបានច្រានចោលការចោទប្រកាន់នេះថាខ្លួនមិនមានផែនការបែបនេះទេ ហើយលើកឡើងថាភាពតានតឹងគឺបង្កដោយសារអង្គការណាតូដើរហួសដែនកំណត់ ដែលអាចទទួលយកបាន ក្នុងការពង្រីកសកម្មភាពឆ្ពោះមកអឺរ៉ុបខាងកើតជាពិសេសមកជិតព្រំដែនរុស្សី។ លោកពូទីនបានទាមទារឱ្យលោកខាងលិចធ្វើការធានាបញ្ឈប់ការពង្រីកទាំងនេះ៕
ប្រភព៖ FT
