វ៉ាស៊ីនតោន៖ មន្រ្តីរដ្ឋបាលជាន់ខ្ពស់របស់លោក ចូ បៃដិន នៅថ្ងៃពុធសប្តាហ៍នេះនិយាយថា សហរដ្ឋអាមេរិកបានដោះស្រាយយ៉ាងច្រើនលើជម្រើសនៃការដាក់ទណ្ឌកម្មប្រឆាំងនឹងរុស្ស៊ី ប្រសិនបើទីក្រុងម៉ូស្គូវាយប្រហារប្រទេសអ៊ុយក្រែន។

មន្រ្តីអាមេរិកក្នុងលក្ខខណ្ឌមិនបញ្ជាក់អត្តសញ្ញាណ បាននិយាយប្រាប់អ្នកយកព័ត៌មានមួយក្រុមតូចថា ទណ្ឌកម្មនេះគឺស្របទៅនឹងការប្តេជ្ញាចិត្តរបស់ប្រធានាធិបតីអាមេរិកលោក ចូ បៃដិន ក្នុងការប្រឆាំងនឹងរុស្ស៊ី តាមរយៈការបង្កផលវិបាកធ្ងន់ធ្ងរផ្នែកសេដ្ឋកិច្ច ប្រសិនបើទីក្រុងម៉ូស្គូឈ្លានពានអ៊ុយក្រែន។ មន្ត្រីដដែលនេះមិនបានពិពណ៌នាអំពីសកម្មភាពដែលត្រៀមរួចជាស្រេច ដើម្បីចាត់វិធានការលើរុស្ស៊ីនោះទេ ប៉ុន្តែប្រភពផ្សេងទៀតបាននិយាយថា ការពិភាក្សាជាមួយសម្ព័ន្ធមិត្ត និងដៃគូនៅអឺរ៉ុប ព្រមទាំងអាស៊ី រួមមានការរឹតបន្តឹងពាណិជ្ជកម្មជាច្រើនដែលកំពុងស្ថិតក្រោមការពិចារណា។ ការរឹតបន្តឹងដែលកំពុងពិចារណាអាចប៉ះពាល់ដល់ផលិតផលអាមេរិកដែលនាំចេញទៅរុស្ស៊ី និងផលិតផលផលិតពីបរទេសមួយចំនួន ដែលស្ថិតនៅក្រោមយុត្តាធិការរបស់សហរដ្ឋអាមេរិក។

បើតាមមន្ត្រីអាមេរិក សហរដ្ឋអាមេរិកក៏កំពុងសម្លឹងមើលជម្រើសជាច្រើនដើម្បីជួយអ៊ុយក្រែន ប្រសិនបើរុស្ស៊ីកាត់ផ្តាច់ការផ្គត់ផ្គង់ថាមពលផងដែរ។ ពួកគេបានបន្ថែមទៀតថា សហរដ្ឋអាមេរិកមានទំនុកចិត្តថា សម្ព័ន្ធមិត្តអឺរ៉ុបនឹងយល់ព្រមដាក់ទណ្ឌកម្មសេដ្ឋកិច្ចធ្ងន់ធ្ងរលើរុស្ស៊ី ប្រសិនបើប្រទេសនេះឈ្លានពានអ៊ុយក្រែន៕ ប្រភព៖ CNA