ករណីឆ្លងកូវីដនៅចិនហក់ឡើងខ្លាំង ខណៈចិនត្រៀមធ្វើជាម្ចាស់ផ្ទះកីឡាអូឡាំពិក
ទីក្រុង Tianjing របស់ចិនមានករណីឆ្លងកូវីដ ១៩កើនឡើងយ៉ាងខ្លាំងនៅថ្ងៃព្រហស្បតិ៍ ទី១៣ មករា នេះ ខណៈដែលអាជ្ញាធរក្រុងបង្កើនកិច្ចប្រឹងប្រែងដើម្បីទប់ទល់នឹងការផ្ទុះដែលបណ្តាលឲ្យរីករាលដាលវីរុសបំលែងថ្មី Omicron ទៅកាន់ក្រុងផ្សេងទៀត។
វីរុសបំប្លែងថ្មី Omicron កំពុងធ្វើឲ្យអាជ្ញាធរចិនព្រួយបារម្ភយ៉ាងខ្លាំង ហើយពួកគេកំពុងដុតដៃដុតជើងដើម្បីទប់ស្កាត់វា ខណៈចិនត្រៀមធ្វើជាម្ចាស់ផ្ទះព្រឹត្តិការណ៍អូឡាំពិករដូវរងានៅថ្ងៃទី ៤ ខែកុម្ភៈ ព្រមទាំងពិធីបុណ្យចូលឆ្នាំចិនដែលនឹងចូលមកដល់ក្នុងពេលឆាប់ៗនេះ។
ទីក្រុង Tianjing ដែលស្ថិតនៅចំងាយប្រមាណ ១០០គីឡូម៉ែត្រពីទីក្រុងប៉េកាំង បានរកឃើញអ្នកឆ្លងវីរុស Omicron ក្នុងសហគមន៍ចំនួន ៤១ករណីកាលពីថ្ងៃពុធម្សិលមិញ ធៀបទៅនឹង ៣៣ករណីកាលពីថ្ងៃអង្គារ។ នេះបើយោងតាមទិន្នន័យរបស់គណៈកម្មការសុខភាពជាតិនៅថ្ងៃព្រហស្បតិ៍នេះ។
ចំណែកទីក្រុង Dalian ក៏មានសេចក្តីរាយការណ៍ថាមានករណីឆ្លងវីរុស Omicron ផងដែរលើមនុស្សម្នាក់ដែលបានធ្វើដំណើរមកពីទីក្រុង Tianjing។
ទីក្រុង Anyang វិញដែលស្ថិតនៅខេត្ត Henan ភាគកណ្តាលប្រទេសចិន បានរកឃើញករណីឆ្លងក្នុងសហគមន៍ចំនួន ៤៣ករណីកាលពីថ្ងៃពុធ ធៀបទៅនឹង ៦៥ករណីកាលពីថ្ងៃអង្គារ។ អាជ្ញាធរក្នុងទីក្រុងនេះបញ្ជាក់កាលពីថ្ងៃច័ន្ទថា ខ្លួនបានរកឃើញករណីឆ្លងវីរុស Omicron ចំនួន ២ករណី ហើយបច្ចុប្បន្នអាជ្ញាធរកំពុងតាមដានសិស្សម្នាក់ដែលមកពីទីក្រុង Tianjin។
ករណីឆ្លងវីរុសនៅក្នុងទីក្រុង Tianjin និង Anyang មានកម្រិតតិចតួចប៉ុណ្ណោះ បើធៀបទៅនឹងការផ្ទុះនៅក្នុងប្រទេសមួយចំនួន។ ទោះយ៉ាងណាក៏ដោយ ការឆ្លងវីរុសបានធ្វើឲ្យមានការរឹតបន្តឹងការដើរហើរក្នុង និងក្រៅទីក្រុង។
ទីក្រុងជាច្រើនទូទាំងប្រទេសចិនបានបញ្ជាឲ្យមានការធ្វើចត្តាឡីស័កចំពោះអ្នកដែលទើបបានធ្វើដំណើរទៅកាន់ទីក្រុង Tianjin និង Anyang។ ខណៈទីក្រុងជាច្រើនទៀត រួមទាំងប៉េកាំងផងដែរ បានលើកទឹកចិត្តពលរដ្ឋឲ្យស្នាក់នៅផ្ទះអំឡុងថ្ងៃឈប់សម្រាកបុណ្យចូលឆ្នាំចិន ដែលជាពេលវេលាដ៏មមាញឹកបំផុតប្រចាំឆ្នាំ។
សូមរម្លឹកថា វីរុសកូវីដ ១៩បានផ្ទុះចេញដំបូងពីប្រទេសចិនកាលពីចុងឆ្នាំ ២០១៩ និងបានរាតត្បាតទូទាំងពិភពលោក។ គិតត្រឹមថ្ងៃទី ១២ ខែមករានេះ ចិនមានការឆ្លងវីរុសសរុបចំនួន ១០៤.៣៧៩ករណី និងស្លា.ប់ ៤.៦៣៦នាក់៕
