ផ្ញើរគ្រឿងញៀនតាមក្រុមហ៊ុន វីរៈប៊ុនថាំ ប៉ូលិសចាប់ខ្លួនប្រុសស្រី ២នាក់ជាអ្នកបញ្ជាទិញ និងម្ចាស់បញ្ញើ
កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ដឹកនាំដោយលោកវរសេនីយ៍ទោ រ៉ឹម មិច នាយការិយាល័យប្រឆាំងគ្រឿងញៀន បានសហការជាមួយ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ដបាត់ដំបង ឃាត់ខ្លួន ស្ត្រីសង្ស័យម្នាក់ ពាក់ព័ន្ធករណីជួញដូរដោយខុសច្បាប់ នូវសារធាតុញៀន (ផ្ញើតាមក្រុមហ៊ុន ដឹកជញ្ជូន វីរៈ ប៊ុនថាំ) កាលពីថ្ងៃទី១០ ខែមករា ឆ្នាំ២០២២ ។
បើយោងតាមប្រភពីស្នងការដ្ឋាននគរបាលរាជធានីភ្នំពេញ អោយដឹងថា បន្ទាប់ពីឃាត់ខ្លួន ជនសង្ស័យខាងលើ នៅថ្ងៃទី១២ ខែមករា ឆ្នាំ២០២២ កម្លាំងការិយាល័យប្រឆាំងគ្រឿងញៀន បន្ដស្រាវជ្រាវឈានដល់ ឃាត់ខ្លួនជនសង្ស័យបានម្នាក់ទៀត និងឆែកឆេរផ្ទះរបស់ជនសង្ស័យ រកឃើញ គ្រាប់អាវុធវែង ចំនួន ០៧គ្រាប់ ។
ជនសង្ស័យ ដែលសមត្ថកិច្ចឃាត់ខ្លួន ទាំង២នាក់ រួមមាន ៖
ទី១- ឈ្មោះ ជា សុវណ្ណបញ្ចកា ភេទស្រី អាយុ២៩ឆ្នាំ ជនជាតិខ្មែរ មុខរបរ លក់ដូរតាមអនឡាញ (ជាអ្នកមកទទួលគ្រឿងញៀន ផ្ញើពីភ្នំពេញ ទៅខេត្ដបាត់ដំបង) ។
និងទី២- ឈ្មោះ ម៉ម សាវី ភេទប្រុស អាយុ៣៣ឆ្នាំ ជនជាតិខ្មែរ មុខរបរ មិនពិតប្រាកដ (ជាម្ចាស់គ្រឿងញៀន ដែលផ្ញើពីភ្នំពេញទៅខេត្ដបាត់ដំបង និងក្រុងប៉ោយប៉ែត) ។
វត្ថុតាងដែល សមត្ថកិច្ចចាប់យកបានរួមមាន ៖ ក្រាមពណ៌ស ចំនួន០៤កញ្ចប់ធំល្មម, ម្សៅម៉ត់ពណ៌ស ចំនួន០២កញ្ចប់តូច, ថ្នាំគ្រាប់ពណ៌ផ្កាឈូក ចំនួន២៥០គ្រាប់, ថ្នាំគ្រាប់ពណ៌បៃតង ចំនួន២០០គ្រាប់, ទូរសព្ទចំនួន០២គ្រឿង ។
បច្ចុប្បន្ន ជនសង្ស័យប្រុសស្រីទាំង២នាក់ខាងលើ ត្រូវបានកម្លាំងជំនាញកំពុងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់ ។
សូមរម្លឹកថា កម្លាំងសមត្ថកិច្ចជំនាញ នៃស្នងការដ្ឋាននគរបាលខេត្តបាត់ដំបង កាលពីថ្ងៃទី១០ មករា ២០២២ ទទួលបានព័ត៌មានករណីគ្រឿងញៀន ពីកម្លាំងនគរបាលរាជធានីភ្នំពេញ ដែលបានរាយការណ៍មកថា មានបញ្ញើគ្រឿងញៀន តាមរយៈក្រុមហ៊ុនដឹកជញ្ជូន វីរៈ ប៊ុនថាំ ពីក្រុងភ្នំពេញ ឆ្ពោះមកខេត្តបាត់ដំបង ។
ក្រោយទទួលបានដំណឹងនេះ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត ដឹកនាំលោកវរសេនីយ៍ឯក សុខ និមល នាយការិយាល័យជំនាញ បានចុះទៅដល់ក្រុមហ៊ុនដឹកជញ្ជូន វីរៈ ប៊ុនថាំ សាខាខេត្តបាត់ដំបង និងបានសហការជាមួយដំណាងសាខាក្រុមហ៊ុន ធ្វើការឆែកឆេរ ពិនិត្យឃើញបញ្ញើឥវ៉ាន់មួយមានផ្ទុកសារធាតុញៀន ក្នុងកញ្ចប់នោះ ។
បន្ទាប់មក កម្លាំងសមត្ថកិច្ចជំនាញបន្តស្រាវជ្រាវ ដោយបន្លំខ្លួនធ្វើជាអ្នកដឹកជញ្ជូន ហើយបានដឹកកញ្ចប់ឥវ៉ាន់នោះ យកទៅឲ្យមេខ្លោងដែលកុម្ម៉ង់ទិញ នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង ។
ជាលទ្ធផល ក្នុងកិច្ចប្រតិបត្តិការនេះ សមត្ថកិច្ចបានធ្វើការឃាត់ខ្លួនជនសង្ស័យចំនួន០១នាក់ ឈ្មោះ ជា សុវណ្ណបញ្ចកា ភេទស្រី អាយុ២៩ឆ្នាំ មានទីលំនៅភូមិបវេល១ ឃុំបវេល ស្រុកបវេល ខេត្តបាត់ដំបង និងវត្ថុតាងចាប់យកបានរួមមាន ៖ ទូរសព្ទចំនួន ០១គ្រឿង ៕
