អាជ្ញាធរហ្វីលីពីននឹងស៊ើបអង្កេតលើបញ្ហាក្រុមហេគឃ័រចូលក្នុងប្រព័ន្ធទិន្នន័យបោះឆ្នោត
អាជ្ញាធរហ្វីលីពីននឹងធ្វើការស៊ើបអង្កេត ពាក់ព័ន្ធនឹងការចូលប្រើប្រាស់ទៅក្នុងប្រព័ន្ធទិន្នន័យបោះឆ្នោតពីសំណាក់ក្រុមហេគឃ័រ បន្ទាប់ពីមានការចុះផ្សាយថា ចោរបច្ចេកវិទ្យាបានលួចព័ត៌មានពីប្រព័ន្ធរបស់គណៈកម្មាធិការជាតិរៀបចំការបោះឆ្នោតហ្វីលីពីន។
សារព័ត៌មាន Manila Bulletin បានចុះផ្សាយកាលពីថ្ងៃច័ន្ទថា មានការសង្ស័យពាក់ព័ន្ធនឹងការលួចចូលក្នុងប្រព័ន្ធអ៊ីនធឺណិតសម្រាប់សម្រួលដល់ការបោះឆ្នោតប្រធានាធិបតីហ្វីលីពីន ដែលនឹងធ្វើឡើងនៅខែឧសភានេះ។ ជាមួយគ្នានឹងការលួចចូលនេះដែរ ក្រុមហេគឃ័រនោះក៏បានធ្វើការទាញយកឯកសារទំហំប្រមាណ ៦០ជីកាបៃត៍ បានដោយជោគជ័យទៀតផង។
យ៉ាងណាមិញ ខាងគណៈកម្មការរៀបចំការបោះឆ្នោតនៅហ្វីលីពីនទាត់ចោលនូវការចុះផ្សាយនេះ ហើយបានបញ្ជាក់អះអាងថា មិនមានទិន្នន័យណាមួយបាត់បង់នោះទេ។
ចំណែក ឯភាគី Manila Bulletin ក៏មិនបានបញ្ជាក់ច្បាស់លាស់ពីប្រភពនៃការចុះផ្សាយរបស់ខ្លួនដែរ។
ពាក់ព័ន្ធនឹងបញ្ហានេះដែរ គណៈកម្មាធិការជាតិទទួលបន្ទុកលើការការពារឯកជនភាពហ្វីលីពីនបានលើកឡើងកាលពីថ្ងៃពុធថា ខ្លួននឹងចាប់ផ្ដើមស៊ើបអង្កេតពីបញ្ហានេះដោយខ្លួនឯង ហើយក៏អំពាវនាវឱ្យអ្នករៀបចំការបោះឆ្នោតបកស្រាយឱ្យច្បាស់លាស់ជាងនេះ៕
ប្រភព៖ The Straits Times
