ឯកឧត្តមឧបនាយករដ្ឋមន្ត្រី យឹម ឆៃលី ប្រធាន​​ក្រុមប្រឹក្សាស្តារអភិវឌ្ឍន៏វិស័យកសិកម្ម និង​ជនបទ និងជាប្រធានគណៈកម្មាធិការជម្រុញចលនាភូមិ១ផលិតផល១ បានបើកកិច្ចប្រជុំពិភាក្សាការងារជាមួយក្រុមហ៊ុន អាលីបាបា គ្រុប របស់ប្រទេសចិន តាមប្រព័ន្ឋ Zoom នៅព្រឹកថ្ងៃទី២៨ ខែមករា ឆ្នាំ២០២២ នាទីស្តីការគណៈរដ្ឋមន្ត្រី ដោយមានការអញ្ជើញចូលរួមពីឯកឧត្តម បួន សារៈមុ​ន្នី រដ្ឋលេខាធិការ តំណាងឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម។

          លោក សុង ជីនថាវ អគ្គលេខាធិការនៃវេទិកាពាណិជ្ជកម្មសកលតាមប្រព័ន្ឋអេឡិចត្រូនិច (EWTP) នៃក្រុមហ៊ុន អាលីបាបា គ្រុប បានថ្លែងអំណរគុណចំពោះរាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្ត្រី និងជាប្រធានកិត្តិយសគណៈកម្មាធិការជាតិជម្រុញភូមិ១ផលិតផល១ ដែលបានគាំទ្រដល់កិច្ចសហប្រតិបត្តិការរវាងក្រុមហ៊ុន អាលីបាបា គ្រុប ជាមួយស្ថាប័ននានារបស់កម្ពុជា។ លោកបន្តថា កិច្ចប្រជុំថ្ងៃនេះ គឺជាការចាប់ផ្តើមនៃកិច្ចសហការរវាង អាលីបាបា​ ជាមួយរាជរដ្ឋាភិបាលកម្ពុជា ក្នុងការនាំយកផលិតផលខ្មែរមកលក់លើទីផ្សារនៅប្រទេសចិន​ ហើយសង្ឃឹមថា គណៈកម្មាធិការជាតិជម្រុញចលនាភូមិ១ផលិតផល១ នឹងដាក់លក់ផលិតផលខ្មែរ ក្នុង App Lazada របស់អាលីបាបា ផងដែរ។

 លោកបន្ថែមថា អ្នកលក់ និងអ្នកទិញត្រូវតែមានភាពស្មោះត្រង់ ពោលគឺ ទំនិញត្រូវតែមានគុណភាព តម្លៃត្រឹមត្រូវ រយៈពេលនៃការផ្គត់ផ្គង់មានភាពឆាប់រហ័ស និងគិតគូពីបរិស្ថាន​បៃតង។

ឯកឧត្តម បួន សារៈមុន្នី រដ្ឋលេខាធិការក្រសួងពាណិជ្ជកម្ម បានឲ្យដឹងថា ថ្ងៃទី០១ ខែមករា​ ឆ្នាំ២០២២​ គឺជាថ្ងៃចាប់ផ្តើមអនុវត្តនូវពាណិជ្ជកម្មសេរីរវាងកម្ពុជា និងចិន។ ដូចនេះ កិច្ចសហប្រតិបត្តិការរវាងរាជ      រដ្ឋាភិបាលកម្ពុជា​ ជាមួយក្រុមហ៊ុនអាលីបាបា គឺជាឱកាសល្អសម្រាប់កសិករ ផលិតករ ពាណិជ្ជករ ក្នុងការនាំយកផលិតផលខ្មែរទៅលក់ឲ្យដល់ដៃអ្នកប្រើប្រាស់នៅប្រទេសចិនដោយផ្ទាល់ ដោយប្រើរយៈពេលខ្លី។ ឯកឧត្តមបញ្ជាក់ថា ក្រសួងពាណិជ្ជកម្ម ត្រៀមខ្លូនជាស្រេចក្នុងការសម្របសម្រួល និងសហការជាមួយក្រុមហ៊ុន អាលីបាបា គ្រុប។

ឯកឧត្តម ឧបនាយករដ្ឋមន្ត្រី យឹម ឆៃលី ក្នុងនាមរាជរដ្ឋាភិបាលកម្ពុជា និងក្នុង​នាមសម្តេចតេជោនាយករដ្ឋមន្ត្រី សូមស្វាគមន៍ការចូលរួមរបស់ថ្នាក់ដឹកនាំក្រុមហ៊ុន អាលីបាបា គ្រុប និងអគ្គលេខាធិការ​ដ្ឋាន​ភូមិ​មួយ​ផលិតផលមួយ ដែលបានផ្តួចផ្តើមឱ្យមានកិច្ចប្រជុំថ្ងៃនេះ ក្នុងការនាំយកផលិតផលខ្មែរ ទៅលក់នៅទីផ្សារបរទេស ជាពិសេសទីផ្សារក្នុងប្រទេសចិន តាមច្រកបច្ចេកវិទ្យារបស់អាលីបាបា គ្រុប។ ឯកឧត្តម បន្តថា ថ្មីៗនេះ កម្ពុជា ក៏ជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ដែលមានសមាជិកចំនួន ១៥ប្រទេស។ ទន្ទឹមនោះ កម្ពុជាក៏មានកិច្ចព្រមព្រៀងពាណិជ្ជកម្មទ្វេភាគីជាមួយនឹងប្រទេសចិនផងដែរ សម្រាប់ទីផ្សារលក់ផលិតផលខ្មែរ។ ដូចនេះ តាមរយៈការស្នើទ្បើងរបស់ អាលីបាបា គ្រុប ដែលចង់ឱ្យមានកិច្ចសហប្រតិបត្តិការជាមួយនឹងកម្ពុជា លើវិស័យនានាជាច្រើន រួមទាំងផលិតផលជាសេវាកម្មទេសចរណ៍ សិប្បកម្ម កសិកម្ម ឧស្សាហកម្ម បច្ចេកវិទ្យា និង SME​ ,​ រាជរដ្ឋាភិបាលកម្ពុជា សូមគាំទ្រនូវគំនិតផ្តួចផ្តើមនេះ។

ឯកឧត្តម បញ្ជាក់ថា គណៈកម្មាធិការជាតិជំរុញចលនាភូមិមួយផលិតផលមួយ មានក្រសួង និង​ស្ថា   ប័ន​ពាក់ព័ន្ធចំនួន១៧ ដែលជាសមាជិក ។ ឯកឧត្តមឧបនាយករដ្ឋមន្ត្រី យឹម ឆៃលី ក៏សូមស្វាគមន៏ចំពោះការផ្តល់ការបណ្តុះបណ្តាលធនធានមនុស្សរបស់ក្រុមហ៊ុន អាលីបាបា គ្រុប ដល់កម្ពុជាតាមពេលវេលាសមស្របណាមួយផងដែរ៕