ប្រជាសហគមន៍អេកូធម្មជាតិ ចំបក់ក្រៅពីអាស្រ័យផលចំការ អនុផលព្រៃឈើ ខ្លះងាកមកបម្រើសេវាកម្មទេសចរណ៍
ខេត្តកំពង់ស្ពឺ៖ប្រជាសហគមន៍តំបន់ការពារ និងអេកូធម្មជាតិ ចំបក់ ជារមណីយដ្ឋានធម្មជាតិទាក់ទាញមួយក្នុងខេត្ត កំពង់ស្ពឺ ក្រៅពីរបរជាបង្គោលធ្វើចំការ រកអនុផលព្រៃឈើ និងមួយចំនួនបានងាកមកបម្រើលើសេវាទេសចរណ៍សម្រាប់ផ្គត់ផ្គង់ជីវភាពគ្រួសារ។
គួរបញ្ជាក់ថារមណីយដ្ឋាន ចំបក់ ស្ថិតក្នុងទឹកដី ភូមិចំបក់ ឃុំចំបក់ ស្រុកភ្នំស្រួច ខេត្ត កំពង់ស្ពឺ ជាប់ព្រំដែនឧទ្យានជាតិគិរីរម្យ។
លោក ទូច ម៉ក់ ប្រធានសហគមន៍តំបន់ការពារនិងអេកូទេសចរណ៍ ឃុំចំបក់ ស្រុក ភ្នំស្រួចខេត្តកំពង់ស្ពឺបានឱ្យដឹងថាសហគមន៍នេះបាន បង្កើតឡើងនៅថ្ងៃទី០៩ ខែមករា ឆ្នាំ២០០៣។ អ្វីដែលជាភាពទាក់ទាញខ្លាំង គឺទឹកធ្លាក់ ទេសភាពព្រៃភ្នំ ជាដើម។ ទឹកធ្លាក់មានច្រើនកន្លែងរាប់ពីទីមួយរហូតដល់ទីប្រាំពីកន្លែង និងក្រៅពីនេះជាតំបន់ទេសភាព កន្លែងខ្លះ ដូចជាថ្មអំពិល ល្អាងប្រជៀវ សុទ្ធតែទេសភាពស្អាតគ្មានគូប្រៀប។
លោកថានៅក្នុងផ្ទៃដីរបស់សហគមន៍គ្រប់គ្រងរាល់ថ្ងៃគឺមាន ៣៤៥១ ហិចតា ហើយនៅក្នុងនេះមាន៦៣៧ គ្រួសារចងក្រងជាសមាជិកនៅក្នុងសហគមន៍។
លោកបានបញ្ជាក់បន្ថែមថានៅក្នុងសេវាកម្មដែលជាផលិតផលទេសចរណ៍សហគមន៍មានដូចជាផ្ទះសំណាក់តាមសហគមន៍ មានផ្នែករបាំ មានផ្នែកដឹកភ្ញៀវទាំងគោយន្ត រទេះគោនិងម៉ូតូជាដើម ។មួយទៀតគឺផ្នែកភ្ញៀវ ហើយអ្វីដែលសំខាន់សហគមន៍បានទាញយកពីភ្ញៀវដែលមកដល់សហគមន៍រៀបចំជាកញ្ចប់សេវា ។
លោក បានឲ្យដឹងបន្ថែមថា “ដើម្បីឲ្យប្រជាសហគមន៍ទទួលបានប្រាក់ចំណូលបន្ថែមយើងបានបង្រៀន ការដុតក្រឡានពីព្រោះថាងាយរកចំណូល បង្រៀនចាក់កងដៃ ពីរបស់ធម្មជាតិឬបង្រៀនពីការកែច្នៃរបស់ផ្សេងៗទៀតដែលអាចរកចំណូលពីការលក់ជូនដល់ភ្ញៀវទេសចរ “។
លោក ឃិន ម៉េងឃាង ប្រធានគ្រប់គ្រងគម្រោង និងជាប្រធាននាយកដ្ឋានទេសចរណ៍ធម្មជាតិនៃក្រសួងបរិស្ថានក្នុងពេលដឹកនាំ ប្រតិភូទស្សនៈកិច្ចស្វែងយល់អំពីផលិតផល និងសេវាកម្មទេសចរណ៍ធម្មជាតិ នៅខេត្តកំពង់ស្ពឺ និងកោះកុងរយៈពេល ៤ថ្ងៃចាប់ពីថ្ងៃទី២៥ដល់ថ្ងៃទី២៨ខែមករាឆ្នាំ២០២២បានឱ្យដឹងថា”កម្ពុជាយើងបានបើកប្រទេសឡើងវិញក្រោយជំងឺកូវីដ១៩ សម្រាប់ទទួលភ្ញៀវទេសចរក៏ដូចជាការអភិវឌ្ឍន៍សេដ្ឋកិច្ចសង្គម។ ក្រសួងបរិស្ថានយើងមានតំបន់ការពារធម្មជាតិច្រើន ហើយផ្ទៃដីក៏ធំ វិសាលភាពក៏ធំ គ្រប់ទីកន្លែង យើងធ្វើយ៉ាងម៉េចជម្រុញការអភិវឌ្ឍន៍ផែនការយុទ្ធសាស្ដ្រ នៅក្នុងការស្ដារទេសចរណ៍ឡើងវិញ ក៏ដូចជាការអភិរក្សតំបន់ធនធានធម្មជាតិ”។
លោកថាសហគមន៍ចំបក់នេះ បានបង្កើតឡើងដោយមានការគាំទ្រពីក្រសួងបរិស្ថាន ហើយបានទទួលស្គាល់តាំងពីឆ្នាំ២០០៣មកម្ល៉េះ។សហគមន៍បានរៀបចំអេកូទេសចរណ៍ក្នុងនេះមានតាំងតែពីការដឹកជញ្ជូន ទេសចរណ៍ របាំ សេវាម្ហូបអាហារជាដើម។នេះវា ជាចំណុចពិសេសសម្រាប់សហគមន៍។ បច្ចុប្បន្ននេះ គាត់អាចមានសកម្មភាពផ្សេងៗទៀតដូចជា ទឹកស្អាតក៏គាត់មានដែរ អញ្ចឹងអាចជួយសម្រាលជីវភាព ដែលមាន៦ ភូមិ មានជាង៦០០ គ្រួសារក្នុងទីកន្លែងនេះ៕ដោយ៖ម៉ាដេប៉ូ
