ស៊ិន សុវណ្ណមករា លេចធ្លោខ្លាំង ក្រោយជួយក្រុមកម្ពុជាឱ្យឈ្នះហ្វីលីពីន
កាលពីយប់មិញនេះក្រុមជម្រើសជាតិកម្ពុជាក្រោមអាយុ២៣បានយកឈ្នះទៅលើក្រុមជម្រើសជាតិហ្វីលីពីន១-០ ដែលជាការស៊ុតយ៉ាងស្អាតនៅចុងម៉ោងរបស់ខ្សែបម្រើឆ្នើម ស៊ិន សុវណ្ណមករា ដើម្បីជួយឲ្យក្រុមកម្ពុជាបន្តកាន់កាប់កំពូលតារាងនៃពូល A មាន៦ពិន្ទុក្នុងព្រឹត្តិការណ៍ AFF U23 Championship 2022 ដែលកំពុងធ្វើឡើងនៅកម្ពុជា។
ក្រោយការរកបាន១គ្រាប់ដ៏អស្ចារ្យ ដែលជាគ្រាប់បាល់ធ្វើឲ្យប្រជាជនកម្ពុជាមានអារម្មណ៍រំភើបនោះ សុវណ្ណមករា បានសរសេរសារបង្ហោះថា «មួយគ្រាប់នេះសម្រាប់ប្រជាជនកម្ពុជាទាំងមូល និងក៏ជាគ្រាប់បាល់ជូនពរបងប្រុសខ្ញុំឆាប់ជាពីរបួស»។ លោកថានេះគឺជាអ្វីដែលលោករំភើបខ្លាំង ហើយក៏ជាអ្វីដែលលោកចង់បានផងដែរ ដោយសារតែលោកចង់ឃើញក្រុមរបស់កម្ពុជាឆ្លងចូលវគ្គបន្តដោយគ្មានឧបសគ្គ។
លទ្ធផលដែលកីឡាកររូបនេះធ្វើបាន បានជួយអោយក្រុមកម្ពុជាសាងប្រវត្តិសាស្ត្រមសនពិន្ទុកំពូលក្នុងពូលA ហើយក៏កំពុងមានប្រៀបសម្រាប់ឱកាសបានឡើងទៅវគ្គ១ភាគ៤ផងដែរ។ ប្រសិនបើគ្មានមួយគ្រាប់របស់កីឡាករ ស៊ិន សុវណ្ណមករា នោះក្រុមកម្ពុជាអាចនឹងស្ថិតក្នុងភាពស្រពេចស្រពិលខ្លាំង ហើយចង់មិនចង់បើទោះជាក្រុមកម្ពុជាអាចឈ្នះក្រុមទីម័រខាងកើត ក៏មិនប្រាកដថាបានឡើងវគ្គខ្វែងនោះដែរ ដូច្នេះហើយទើបអ្នកគាំទ្រ ក៏ដូចជាក្នុងក្រុមទាំងមូល កំពុងចាត់ទុកថា មួយគ្រាប់របស់កីឡាកររូបនេះគឺជាគ្រាប់ដ៏មានតម្លៃក្នុងការជួយចម្លងអោយក្រុមកម្ពុជាឆ្លងទៅវគ្គ១ភាគ៤កាន់តែច្បាស់ ដោយក្រុមកម្ពុជាសុំត្រឹមតែស្មើក្រុមទីម័រខាងកើតក៏បាន។
រំលឹកថា ស៊ិន សុវណ្ណមករា មានថ្ងៃនេះដោយសារការយកបងប្រុសបង្កើត ស៊ិន កក្កដា ជាគំរូហើយគ្រាប់បាល់នោះគេបានចាត់ទុកជាការជូនពរឲ្យបងប្រុសបង្កើតឆាប់ជាពីរបួស ដើម្បីអាចមានឱកាសចូលលេងវិញ។ នេះជាគ្រាប់បាល់ដំបូងរបស់ ស៊ិន សុវណ្ណមករា ក្នុងក្រុមជម្រើសជាតិក្រោមអាយុ២៣ឆ្នាំកម្ពុជា៕
