អូស្ត្រាលីចោទចិនថា «បង្កសកម្មភាពគំរាមកំហែង» ដោយបាញ់ភ្លើងឡាស៊ែរលើយន្តហោះស៊ើបការណ៍ខ្លួន
នាយករដ្ឋមន្ត្រីអូស្ត្រាលីលោក ស្កុត ម៉ូរីសុន កាលពីថ្ងៃអាទិត្យកន្លងទៅបានចោទចិនថា «បង្កសកម្មភាពគំរាមកំហែង» ដោយនាវារបស់ប្រទេសនេះបានបាញ់ភ្លើងឡាស៊ែរទៅកាន់យន្តហោះស៊ើបការណ៍របស់ខ្លួនប្រភេទ P-8A Poseidon ដែលល្បាតនៅដែនដីភាគខាងជើងអូស្ត្រាលីកាលពីសប្ដាហ៍មុន។
ហេតុការណ៍នេះបានកើតឡើងកាលពីថ្ងៃព្រហស្បតិ៍សប្ដាហ៍មុន នៅពេលដែលនាវាចម្បាំងរបស់ចិនស្ថិតនៅត្រង់ចំណុចមួយនៃតំបន់សេដ្ឋកិច្ចផ្ដាច់មុខ (EEZ) របស់អូស្ត្រាលី ក្នុងសមុទ្រArafura ដោយខ័នចែករវាងអូស្ត្រាលី និងកោះហ្គីណេថ្មី។ នេះបើតាមក្រសួងការពារជាតិអូស្ត្រាលី។
ខាងចិននៅមិនទាន់ឆ្លើយតបពាក់ព័ន្ធនឹងរឿងរ៉ាវនេះទេ។
លោក ម៉ូរីសុន បានលើកឡើងថា៖ «ខ្ញុំអាចមើលឃើញថាសកម្មភាពនេះគឺគ្មានអ្វីក្រៅពីការគំរាមកំហែងនោះទេ»។ លោកបានបន្ថែមថា៖ «អូស្ត្រាលីនឹងមិនទទួលយកសកម្មភាពដូច្នេះឡើយ»។
ជាមួយគ្នានេះដែរ លោកក៏បានអំពាវនាវឱ្យមានការស៊ើបអង្កេតឱ្យបានច្បាស់លាស់ពាក់ព័ន្ធនឹងហេតុការណ៍នេះ។
លោកចោទជាសំណួរថា ប្រសិនបើនាវាចម្បាំងរបស់អូស្ត្រាលីបាញ់ឡាស៊ែរទៅកាន់យន្តហោះស៊ើបការណ៍របស់ចិននៅច្រកសមុទ្រតៃវ៉ាន់ «តើអ្នកអាចស្រមៃទេថា នឹងមានប្រតិកម្មបែបណាលើបញ្ហានេះពីអ្នកនៅទីក្រុងប៉េកាំង?»។
កម្លាំងនយោបាយទាំងខាងប្រឆាំង និងក្រុមអ្នកកាន់អំណាច ក៏ដូចជាអ្នកសិក្សាអូស្ត្រាលីនានាយល់ស្របគ្នាថា សកម្មភាពនេះជារឿងមួយដ៏ធ្ងន់ធ្ងរសម្រាប់សន្តិសុខជាតិអូស្ត្រាលី។
កាលពីឆ្នាំ២០១៩ ចិនក៏ធ្លាប់បាញ់ភ្លើងឡាស៊ែរទៅកាន់យន្តហោះស៊ើបការណ៍របស់អូស្ត្រាលី តែនៅកាលនោះនៅតំបន់សមុទ្រចិនខាងត្បូង។ នេះបើតាមសេចក្ដីរាយការណ៍របស់សារព័ត៌មាន ABC៕
ប្រភព៖ Reuters
