ក្រុមកីឡាជិះសេះកម្ពុជា បានប្តេជ្ញាស្វែងរកមេដាយជូនជាតិ ក្នុងព្រឹត្តិការណ៍ជាប្រវត្តិ​សាស្ដ្រលើក​ដំបូងនៅកម្ពុជា​ក្នុងការប្រកួតស៊ីហ្គេម ឆ្នាំ២០២៣ នាពេលខាងមុខនេះ។ ​

ប្រធានសហព័ន្ធ​កម្ពុជា​បង្ហាត់ជិះ​សេះ លោកស្រី ទេព ម៉ូណា ត្រូវបានគេដកស្រង់សម្តី ដែល បញ្ជាក់ថា សហព័ន្ធរបស់លោកស្រី បាននឹងកំពុង​សម្លឹងឆ្ពោះទៅរកមេដាយមាស នៅក្នុង ការប្រកួតកីឡា​ស៊ីហ្គេមលើកទី៣២ ឆ្នាំ២០២៣ ជាមួយភាពជឿជាថាកីឡាករដែលកំពុងហ្វឹកហាត់ជាមួយគ្រូបង្វឹកខ្មែរ និងអ្នកជំនាញមកពីប្រទេសបារាំងថែមទៀតនោះ នឹងអាច ស្វែងរកមេដាយជួនប្រទេសជាតិ។

គួរបញ្ជាក់ថាកាលពីថ្ងៃទី២០កុម្ភៈ សហព័ន្ធបានបញ្ចប់ ការប្រកួតកីឡាជិះសេះជ្រើសរើស​ជើងឯកថ្នាក់​ជាតិ​ប្រចាំ​ឆ្នាំ២០២២ លើវិញ្ញាសាលោត ផ្លោះរបារ(Jumping) ដោយជោគជ័យ នៅមជ្ឈមណ្ឌល​កីឡា Cambodian Country Club ។

លោកស្រី ទេព ម៉ូណា បានថ្លែងថា សហព័ន្ធ​បានវាយតម្លៃខ្ពស់លើលទ្ធផលបច្ចេកទេស របស់​កីឡា​ករ-កីឡាការិនី ដែលមានភាពរីកចម្រើនគួរឲ្យកត់​សម្គាល់ ជាមួយវិញ្ញាសាជិះ សេះ​លោត​ផ្លោះរបារនេះ ។

គួរបញ្ជាក់ថាលទ្ធផលការប្រកួតជើងឯកថ្នាក់ជាតិ លើវិញ្ញាសា Jumping, សម្រាប់លេខ១ បានទៅ​កីឡាករ គិរី ចាន់តុលា, លេខ២ អ្នកអង្គម្ចាស់ នរោត្តម អម្រិតា និងលេខ៣ ស្ទួនបានទៅ​កីឡាករ គង់ រតនា និងកីឡាករ គ្រី សារឿន ។