ប្រទេសក្នុងអាស៊ាន បានធ្វើប្រតិកម្មយ៉ាងប្រុងប្រយ័ត្នក្នុងការឆ្លើយតបចំពោះព្រឹត្តិការណ៍ ជម្លោះវាយប្រហាររវាងរុស្ស៊ី និងប្រទេសអ៊ុយក្រែន។

សេចក្តីរាយការណ៍កាសែតបាងកកប៉ុស្តិ៍ ថ្ងៃទី២៥កុម្ភៈ បានដកស្រង់សេចក្តីថ្លែងការណ៍ព្រាងដោយរដ្ឋមន្ត្រីការបរទេសអាស៊ាន ទាំង ១០ ដែលសរសេរថា គេសូមអំពាវនាវឱ្យភាគីពាក់ព័ន្ធទាំងអស់អនុវត្តការអត់ធ្មត់ជាអតិបរមា, បន្តការសន្ទនាតាមគ្រប់បណ្តាញរួមទាំងមធ្យោបាយការទូតដើម្បីទប់ស្កាត់ស្ថានការណ៍ហិង្សា, ទប់ស្កាត់កុំឱ្យមានភាពតានតឹងកើនឡើងបន្ថែមទៀត និងស្វែងរកដំណោះស្រាយ ដោយសន្តិ វិធីស្របតាមច្បាប់អន្តរជាតិ និងធម្មនុញ្ញអង្គការសហប្រជាជាតិ។

សេចក្តីថ្លែងការណ៍ព្រាង របស់រដ្ឋមន្ត្រីការបរទេសអាស៊ាននេះ បានទន្ទឹមនឹងថ្ងៃវាយលុកទី២របស់កងកម្លាំងរុស្ស៊ីចូល ក្នុងប្រទេសអ៊ុយក្រែន បន្ទាប់ពីប្រធានាធិបតីរុស្ស៊ីលោក​ វ្លាឌីមៀរ ពូទីន បានប្រកាសការវាយ លុកកាលពីថ្ងៃព្រហស្បតិ៍នោះមក។

ប្រធានាធិបតី អ៊ុយក្រែន លោក វ៉ូឡូឌីមៀ ហ្សេឡិនស្គី បាន​ថ្លែងថាពលរដ្ឋ​អ៊ុយក្រែនយ៉ាងហោច ១៣៧ នាក់ រាប់បញ្ចូលទាំងជនស៊ីវិល និងយោធា បានបាត់បង់ជីវិត​នៅថ្ងៃទីមួយ​នៃ​ការ​វាយប្រហារ ។ តួលេខអ្នករងរបួសក្នុងថ្ងៃទី១នោះផងដែរ ត្រូវគេរាយការណ៍ថាមានចំនួន ៣១៦នាក់។ ការវាយលុកបានរំកិលមកកាន់តែកៀកក្រុងគៀវ ដែលជារដ្ឋធានីនៃប្រទេសអ៊ុយក្រែន។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡិនស្គី បានប្ដេជ្ញាថាលោកនឹងបន្ត​ស្ថិតនៅ​ក្នុង ទីក្រុងគៀវ​របស់លោក ទន្ទឹមនឹងការបង្ហាញក្តីអស់ សង្ឃឹមថានឹង គ្មានការជួយធ្វើអន្តរាគមន៍យោធាណាមួយពីប្រទេសមហាអំណាចជួយអ៊ុយ ក្រែននោះឡើយ។ ប្រធានាធិបតីរុស្ស៊ីលោកពូទីន បានព្រមានថារុស្ស៊ី នឹងធ្វើការវាយតបត ទៅវិញជាមិនខាន បើសិនជាប្រទេស ណាមួយហ៊ានលូកដៃក្នុងជម្លោះរវាងរុស្ស៊ីនិងអ៊ុយក្រែន នាពេលនេះ។

កង​កម្លាំងអ៊ុយក្រែនបាននិយាយនៅថ្ងៃសុក្រនេះថា គេបានបាញ់ទម្លាក់យន្តហោះ មួយគ្រឿង​ ហើយ យន្តហោះនោះ បានធ្លាក់ចុះមកលើអគារ ៩ ជាន់ បណ្ដាលឲ្យឆាប ឆេះ អគារនោះ ។​

នៅឯប្រទេស​រុស្ស៊ីវិញ ប្រជាជនបានតវ៉ាប្រឆាំងនឹង​ការ​ដែលរុស្ស៊ីចូលទៅវាយប្រហារនៅក្នុង ប្រទេស​​អ៊ុយក្រែន ខណៈដែលរុស្ស៊ីកំពុង​តែ​រង​សម្ពាធទណ្ឌកម្ម និងការ​ថ្កោលទោសពីអន្តរ ជាតិ​ ។ ​បាតុករ​រុស្ស៊ីជាងមួយពាន់នាក់ ត្រូវបានរង​ការ​ឃាត់ខ្លួន បន្ទាប់ពីពួកគេបានតវ៉ា​ទាម ទារ​ឲ្យ​ រដ្ឋាភិបាល​ក្រុងមូស្គូត្រូវដក កងទ័ពចេញពីប្រទេសអ៊ុយក្រែនមកវិញ ។​