ប៉ូលីសនៅក្នុងប្រទេសរុស្ស៊ី ចាប់ជនជាតិរុស្ស៊ីជាង២ពាន់នាក់ចេញមុខតវ៉ាប្រឆាំងការវាយអ៊ុយក្រែន
អ្នកឃ្លាំមើលឯករាជ្យបាននិយាយថា ប៉ូលីសនៅក្នុងប្រទេសរុស្ស៊ីបានចាប់ខ្លួនបាតុករប្រឆាំងសង្គ្រាមជាង ២.០០០នាក់ ចំថ្ងៃទី៤ នៃការឈ្លានពានរបស់ប្រធានាធិបតីរុស្ស៊ី Vladimir Putin លើប្រទេសអ៊ុយក្រែន។
ការចាប់ខ្លួនបន្ថែមទៀតកាលពីថ្ងៃច័ន្ទ ទី២៨ កុម្ភៈ ធ្វើឲ្យចំនួនបាតុកររុស្ស៊ីដែលត្រូវបានចាប់ខ្លួនតាំងពីមានការឈ្លានពានលើអ៊ុយក្រែនមកមានចំនួន៥.២៥០នាក់។
នៅក្នុងទីក្រុងម៉ូស្កូ ប៉ូលីសកុបកម្មតែងមានចំនួនច្រើនជាងក្រុមបាតុករ ដែលបាតុករមួយចំនួនបានកាន់បដាសរសេរដោយដៃជាមួយនឹងសញ្ញាសន្តិភាព និងពាក្យស្លោកប្រឆាំងសង្គ្រាម។ បាតុករខ្លះពាក់ម៉ាសដែលមានសរសេរពាក្យថា «គ្រប់គ្រាន់ហើយ»។
អ្នករាយការណ៍ម្នាក់មកពីទូរទស្សន៍ឯករាជ្យ Dozhd ត្រូវបានចាប់ខ្លួនអំឡុងបាតុកម្ម ទោះបីគាត់បានបង្ហាញប័ណ្ឌទទួលស្គាល់ផ្លូវការទៅកាន់ប៉ូលីស និងពាក់អាវសារព៍ត៌មានក្តី។
ចំណែកនៅខាងក្រៅផ្សារទំនើប Gostiny Dvor វិញដែលស្ថិតក្នុងទីក្រុង Saint Petersburg បាតុករប្រឆាំងសង្គ្រាមរាប់រយនាក់បានប្រមូលផ្តុំគ្នា ដោយធ្វើការកាន់ដៃ និងស្រែកសូត្រ។ បាតុករមួយចំនួនកាន់បដាដែលមានសរសេរថា «គ្មានសង្គ្រាម» «ប្រជាជនរុស្សីទៅផ្ទះវិញ» និង «សន្តិភាពសម្រាប់អ៊ុយក្រែន»។
បាតុករវ័យ ៣៥ឆ្នាំម្នាក់ដែលបានចូលរួមបាតុកម្មបាននិយាយថា «វាជាការអាម៉ាស់ដែលមានបាតុកររាប់រយនាក់ ប្រហែលរាប់ពាន់នាក់ តែមិនមែនរាប់លាននាក់»។
កាលពីថ្ងៃច័ន្ទម្សិលមិញ ប្រធានាធិបតីបេឡារុសលោក Alexander Lukashenko បានធ្វើការព្រមានថា ទណ្ឌកម្មរបស់ប្រទេសលោកខាងលិចកំពុងរុញច្រានរុស្សីទៅរកសង្គ្រាមលោកលើកទី ៣។
សូមបញ្ជាក់ថា ប្រទេសរុស្សី និងមេដឹកនាំរុស្សីជាច្រើនរូបកំពុងរងទណ្ឌកម្មជុំទិសពីប្រទេសលោកខាងលិច ជុំវិញការឈ្លានពានលើប្រទេសអ៊ុយក្រែន។ ចាប់តាំងពីរុស្សីឈ្លានពានលើអ៊ុយក្រែនកាលពីថ្ងៃទី ២៤ ខែកុម្ភៈមក ប្រជាជនអ៊ុយក្រែនជាង ៥០០.០០០នាក់បានភៀសខ្លួនចេញពីប្រទេសទៅកាន់ប្រទេសជិតខាងដូចជា ប៉ូឡូញ ហុងគ្រី ស្លូវ៉ាគី រ៉ូមានី និងម៉ុលដាវីជាដើម។
