ជប៉ុនរួមដៃជាមួយសម្ព័ន្ធមិត្តបង្កកទ្រព្យសម្បត្តិធនាគារកណ្តាលរុស្សី
ប្រទេសជប៉ុន ដែលជាមហាអំណាចសេដ្ឋកិច្ចធំបំផុតទី៣របស់ពិភពលោក បានចូលរួមជាមួយនឹងសហរដ្ឋអាមេរិក និងសម្ព័ន្ធមិត្តផ្សេងៗ ដើម្បីដាក់ទណ្ឌកម្មបន្ថែមទៅលើប្រទេសរុស្សី រួមមានការបង្កកទ្រព្យសម្បត្តិរបស់មេដឹកនាំរុស្សី និងស្ថាប័នហិរញ្ញវត្ថុចំនួន ៣។
មេដឹកនាំរុស្សីចំនួន ៦រូបដែលរួមមាន ប្រធានាធិបតី Vladimir Putin និងរដ្ឋមន្ត្រីការបរទេស Sergey Lavrov ជាដើមត្រូវបានសហរដ្ឋអាមេរិក និងប្រទេសមហាអំណាចសេដ្ឋកិច្ចផ្សេងទៀតធ្វើការបង្កកទ្រព្យសម្បត្តិ ជុំវិញការឈ្លានពានរបស់រុស្សីលើប្រទេសអ៊ុយក្រែន។
ក្រៅពេលនេះ ជប៉ុនក៏នឹងបង្កកទ្រព្យសម្បត្តិធនាគាររុស្សីចំនួន ៣ផងដែររួមមានធនាគារ Promsvyazbank, Vnesheconombank និងធនាគារកណ្តាលរុស្សី។
សូមបញ្ជាក់ថា រុស្សីកំពុងរងទណ្ឌកម្មជុំទិសចំពោះការឈ្លានពានរបស់ខ្លួន លើប្រទេសប្រជាធិបតេយ្យ អ៊ុយ ក្រែន។ ការឈ្លានពានរបស់រុស្សីបានឈានចូលដល់ថ្ងៃទី ៥ហើយ។
កាលពីថ្ងៃច័ន្ទម្សិលមិញ ប្រធានាធិបតីបេឡារុសលោក Alexander Lukashenko បានធ្វើការព្រមានថា ទណ្ឌកម្មរបស់ប្រទេសលោកខាងលិចកំពុងរុញច្រានរុស្សីទៅរកសង្គ្រាមលោកលើកទី ៣។
សង្គ្រាមនៅអ៊ុយក្រែន បានធ្វើឲ្យប្រជាជនជនរាប់សែននាក់ភៀសខ្លួនចេញពីការវា.យប្រហាររបស់រុស្សី។ បើតាមអង្គការសហប្រជាជាតិ គិតត្រឹមថ្ងៃច័ន្ទម្សិលមិញ មានជនភៀសខ្លួនជាង ៥០០.០០០នាក់បានភៀសខ្លួនទៅកាន់ប្រទេសជិតខាងដូចជា ប៉ូឡូញ ហុងគ្រី ស្លាវ៉ាគី រ៉ូមានី និងម៉ុលដាវី៕
