បាងកក៖ ក្នុងរយៈពេល៦ថ្ងៃនៃបុណ្យសង្ក្រាន្ត នៅប្រទេសថៃ មានគ្រោះថ្នាក់ចរាចរណ៍ចំនួន ១៧២០លើក បណ្តាលឲ្យស្លាប់មនុស្ស ២៣៧នាក់ នេះបើតាមគណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីថ្ងៃទី១៧ ខែមេសា ឆ្នាំ២០២២។

ប្រភពបានឲ្យដឹងថា ចាប់តាំងពីថ្ងៃទី ១១ ខែមេសា នៅពេលដែលមនុស្សរាប់ម៉ឺននាក់ បានចាប់ផ្តើមធ្វើដំណើរទៅជនបទ សម្រាប់ថ្ងៃឈប់សម្រាកបុណ្យសង្ក្រាន្តរបស់ពួកគេ រហូតដល់ថ្ងៃឈប់សម្រាកបញ្ចប់ ត្រឹមថ្ងៃអាទិត្យ។

នៅក្នុងសន្និសីទសារព័ត៌មានរបស់នាយកដ្ឋានបង្ការ និងកាត់បន្ថយគ្រោះមហន្តរាយ កាលពីថ្ងៃអាទិត្យ គណៈកម្មាធិការជាតិសុវត្ថិភាពចរាចរណ៍ផ្លូវគោកបានឲ្យដឹងដែរថា នៅថ្ងៃសៅរ៍ ជាថ្ងៃទីប្រាំមួយ មានគ្រោះថ្នាក់ចរាចរណ៍ចំនួន ២៤១បានកើតឡើងសម្លាប់មនុស្ស ២៨ នាក់ និង ២៤៦ នាក់ផ្សេងទៀតរងរបួស។

ប្រភពបញ្ជាក់ថា មូលហេតុចម្បង គឺល្មើសល្បឿន (៣៥,៩៣ភាគរយ) ស្រវឹង (២៧,៧៩ភាគរយ) និងការប្តូរគន្លងផ្លូវភ្លាមៗ (១៧,៦២ភាគរយ)៕ ប្រភព៖ The Nation ប្រែសម្រួល៖ សារ៉ាត