គ.ជ.ប ៖ យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ រយៈពេល១៤ថ្ងៃ បិទបញ្ចប់ដោយរលូន
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលបានប្រព្រឹត្តទៅរយៈពេល ១៤ថ្ងៃ គឺចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២ នេះ ទោះបីមានករណីខ្លះបានកើតឡើងក្នុងអំឡុង ពេលឃោសនាបោះឆ្នោតក៏ដោយ ប៉ុន្តែដោយមានការសម្របសម្រួល និងការអធ្យាស្រ័យគ្នា ទៅវិញទៅមក ទើបការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប្រព្រឹត្តទៅដោយរលូនល្អ ពុំមានករណីអំពើហិង្សា ឬការគំរាមកំហែង។
ក្នុងសេចក្តីប្រកាសព័ត៌មានរបស់គ.ជ.ប នៅព្រលប់ថ្ងៃទី៣ ខែមិថុនាឆ្នាំ២០២២បានបញ្ជាក់ទៀតថា គណៈកម្មការរៀបចំការបោះឆ្នោតគ្រប់លំដាប់ថ្នាក់ ក្នុងនោះកម្លាំងសមត្ថកិច្ចបានចុះអន្តរាគមន៍ និងបានដាក់ពង្រាយកម្លាំងនៅតាមឃុំ សង្កាត់ ក្នុងរាជធានី ខេត្ត ដើម្បីរក្សាសណ្តាប់ធ្នាប់ និងរក្សារបៀបរៀបរយ ជូនគណបក្សនយោបាយក្នុងការហែក្បួនឃោសនាបោះឆ្នោត។ ក្នុងស្មារតីយកចិត្តទុកដាក់អនុវត្តផែនការនេះ ឃើញថា ស្ថានភាពសន្តិសុខ សុវត្ថិភាព និងសណ្តាប់ធ្នាប់សាធារណៈ ក្នុងពេលឃោសនាបោះឆ្នោត មានភាពល្អប្រសើរ ពុំមានករណីអំពើហិង្សា ឬការគំរាមកំហែង ឬសកម្មភាពមិនប្រក្រតីណាមួយកើតឡើង គួរឱ្យកត់សម្គាល់ឡើយ។ ដោយឡែកក្នុងរយៈពេល ១៤ ថ្ងៃកន្លងមកនេះ ទោះបីមានករណីខ្លះបានកើតឡើង ក្នុងអំឡុងពេលឃោសនាបោះឆ្នោតក៏ដោយ ប៉ុន្តែដោយមានការសម្របសម្រួល និងការអធ្យាស្រ័យគ្នា ទៅវិញទៅមក ទើបការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ប្រព្រឹត្តទៅដោយរលូនល្អ។
គ.ជ.ប បានបញ្ជាក់ថា គណបក្សនយោបាយ និងភាគីពាក់ព័ន្ធទាំងអស់គោរពតាមកម្មវិធីរបស់ខ្លួន ទោះបីមានការអន់ថយនូវជំងឺកូវីដ-១៩ យ៉ាងណាក៏ដោយ ក៏នៅតែបន្តអនុវត្តយ៉ាងខ្ជាប់ខ្ជួននូវវិធានការ សុខាភិបាល ៣ការពារ ៣កុំ ជាប់ជានិច្ច។
ប្រភពដដែលបន្តទៀតថា ក្នុងដំណាក់កាលឃោសនាបោះឆ្នោត នៅថ្នាក់ គឃ.សប បានទទួលពាក្យបណ្តឹង សរុបចំនួន ៥២ បណ្ដឹង (ករណីប្តឹងសុំឱ្យផ្ដន្ទាទោស) ក្នុងនោះមាន សកម្មជនគណបក្សប្រជាជនកម្ពុជា ៣៣ បណ្តឹង , ប្រធានគណបក្សប្រជាជនកម្ពុជា ឃុំអូរកណ្ដៀរសែនជ័យ ១ បណ្តឹង បេក្ខជនឈរឈោះ្មគណបក្ស ប្រជាជនកម្ពុជា ១ បណ្តឹង , ប្រជាពលរដ្ឋ ៦ បណ្តឹង , អាជ្ញាធរ ១ បណ្តឹង, ចៅសង្កាត់ ២ បណ្តឹ , ងមន្ត្រីរាជការ ១ បណ្ដឹង , សកម្មជនគណបក្សហ្វ៊ុនស៊ិនប៉ិច ១ បណ្ដឹង , ប្រធានគណបក្សភ្លើងទៀន ឃុំតាលោ ១ បណ្តឹង និងសកម្មជនគណបក្សភ្លើងទៀន ៥ បណ្តឹង។ ក្នុងចំណោមពាក្យបណ្តឹងទាំង ៥២ នោះ មាន ២១ បណ្តឹង បានប្តឹងបន្តទៅ គធ.ខប និង ៦ បណ្ដឹងបន្តប្តឹងមក គ.ជ.ប។
គួរបញ្ជាក់ថា ការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ មានរយៈពេល ១៤ថ្ងៃ ចាប់ពីថ្ងៃទី២១ ខែឧសភា ដល់ថ្ងៃទី៣ ខែមិថុនាហើយរាល់សកម្មភាពឃោសនាត្រូវគោរពច្បាប់ បទបញ្ជា និងនីតិវិធី រួមទាំងសេចក្ដីណែនាំរបស់ គ.ជ.ប។នៅថ្ងៃទី៥ ខែមិថុនា គឺជាថ្ងៃបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ដែលមានគណបក្សនយោបាយចំនួន ១៧ បានដាក់បេក្ខជនឈរឈ្មោះចូលរួមប្រកួតប្រជែង៕ ដោយៈ ពលជ័យ
