ភ្នំពេញ ៖ បុរសម្នាក់ជាជនជាតិចិនបានបើករថយន្តស៊េរីទំនើប Mercedes មួយគ្រឿងជ្រុលទៅបុករបាំងថ្មពុះចែកទ្រូងផ្លូវពេញទំហឹងបណ្ដាលឲ្យបាក់អស់ចំនួនពីរកង់ ធ្វើឲ្យរថយន្តខ្ទេចមួយកំណាត់មុខ ទៅមុខលែងរួច កាលពីវេលាម៉ោង ៣៖៣០នាទីទៀបភ្លឺឈានចូលថ្ងៃទី១ ខែកក្កដាឆ្នាំ២០២២ នៅត្រង់ចំណុចស្តុបប្រសាទពេជ្រ តាមបណ្តោយផ្លូវព្រះមុនីវង្ស កែងនឹងផ្លូវ ១៨២ ស្ថិតតក្នុងសង្កាត់បឹងរាំង ខណ្ឌដូន ពេញ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសជនជាតិចិនម្នាក់បើករថយន្តស៊េរីទំនើបមួយគ្រឿងម៉ាក Mercedes ពណ៌ខ្មៅពាក់ផ្លាកភ្នំពេញ2AJ-2388 ធ្វើដំណើរតាមបណ្ដោយផ្លូវព្រះមុនីវង្ស ទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុខាងលើ បានរេចង្កូតមកខាងឆ្វេងជ្រុលទៅបុករបាំងថ្មពេញទំហឹងបណ្តាលឲ្យបាក់អស់ពីកង់ ចំណែករថយន្តបង្កខ្ទេចមួយកំណាត់មុខ ទៅលែងរួច ។

ក្រោយកើតហេតុ សមត្ថកិច្ចមូលដ្ឋានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សារទុកនៅការិយាល័យចររាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយគ្នាតាមច្បាប់ ៕ ដោយ៖ ជីម ភារ៉ា