ហាណូយ៖ វៀតណាមបាននាំចេញទូរស័ព្ទឆ្លាតវៃ (smartphone) ទៅក្រៅប្រទេស ក្នុងទំហំទឹកប្រាក់ ២៩.១៧ពាន់លានដុល្លារអាមេរិក ក្នុងពេល ៦ខែដំបូង ឆ្នាំ២០២២ កើនឡើង ១៦.៤ភាគរយ បើធៀបនឹងពេលដូចគ្នា កាលពីឆ្នាំ២០២១ ។

អាមេរិកបានក្លាយជាប្រទេសទិញទូរស័ព្ទឆ្លាតវៃរបស់វៀតណាមច្រើនជាងគេ បន្ទាប់មកគឺចិន នេះបើតាមរដ្ឋបាលគយវៀតណាម។ តែការនាំចេញទូរស័ព្ទប្រភេទនេះ និងគ្រឿងបន្លាស់ ទៅអឺរ៉ុបវិញ បានធ្លាក់ចុះ ៧.៧ភាគរយ គឺបានក្នុងទំហំទឹកប្រាក់ ៣.៣ពាន់លានដុល្លារអាមេរិក។

ក្នុងពេលដូចគ្នានេះ ចំពោះទីផ្សារនាំចូលធំជាងគេលើទូរស័ព្ទឆ្លាតវៃ និងគ្រឿងបន្លាស់របស់វៀតណាមវិញ គឺកូរ៉េខាងត្បូង តម្លៃ ៥.១ពាន់លានដុល្លារ កើនឡើង ២៨ភាគរយ ធៀបនឹង ៦ខែដំបូងនៃឆ្នាំ២០២១។ បន្ទាប់មកគឺចិន មានតម្លៃ ៤.២ពាន់លានដុល្លារ ធ្លាក់ចុះ ០.១ភាគរយ៕ ប្រភពពី VNexpress, ប្រែសម្រួលដោយ៖ សារ៉ាត