គណបក្សខ្មែរតែមួយប្រកាសគាំទ្រការអនុម័តសេចក្តីព្រាងច្បាប់ធម្មនុញ្ញលើកទី១០
ភ្នំពេញ៖គណបក្សខ្មែរតែមួយបានប្រកាសយ៉ាងឧឡារឹកនូវការគាំទ្រយ៉ាងពេញទំហឹងចំពោះសម័យប្រជុំពេញអង្គរដ្ឋសភាលើកទី៧នីតិកាលទី៦កាលពីព្រឹកថ្ងៃទី២៨ខែកក្កដាឆ្នាំ២០២២ដែលបានពិភាក្សានិងអនុម័តសេចក្តីព្រាងច្បាប់ធម្មនុញ្ញលើកទី១០និងអំពាវនាវដល់ប្រជាពលរដ្ឋឱ្យការពារពេលវេលាជាមាសប្រាក់របស់បងប្អូន ដែលកំពុងប្រកបមុខរបរប្រចាំថ្ងៃដើម្បីទ្រទ្រង់ជីវភាពមានបានដូចសព្វថ្ងៃដោយសារប្រទេសកម្ពុជាមានសន្តិភាពពេញលេញ។គណបក្សនេះក៏បានបកអាក្រាតមុខមាត់ពិតរបស់ទណ្ឌិត សម រង្ស៊ី នាពេលកន្លងទៅនិងក្នុងពេលថ្មីៗនេះ។នេះបើយោងតាមសេចក្តីថ្លែងការណ៍ស្ដីពីការអនុម័តលើវិសោធនកម្មរដ្ឋធម្មនុញ្ញកម្ពុជាលើកទី១០របស់គណបក្សខ្មែរតែមួយនៅថ្ងៃទី២៨ ខែកក្កដានេះ។
សេចក្តីថ្លែងការណ៍បានបញ្ជាក់ថាគណបក្សខ្មែរតែមួយសូមប្រកាសគាំទ្រទាំងស្រុងនៅក្នុងកិច្ចប្រជុំពេញអង្គរដ្ឋសភា នាព្រឹកថ្ងៃទី២៨ ខែកក្កដា ឆ្នាំ២០២២ ព្រឹកមិញនេះ ដែលបានអនុម័តលើសេចក្តីព្រាងច្បាប់ធម្ម នុញ្ញស្តីពីការស្នើសុំធ្វើវិសោធនកម្ម មាត្រា១៩ ថ្មី(មួយ) មាត្រា៨៩ មាត្រា៩៨ថ្មី មាត្រា ១០២ថ្មី មាត្រា១១៩ថ្មី (មួយ) និងមាត្រា១២៥ ថ្មី នៃរដ្ឋធម្មនុញ្ញ និងមាត្រា ៣ថ្មី និងមាត្រា ៤ថ្មី នៃច្បាប់ធម្ម នុញ្ញនៃព្រះរាជាណាចក្រកម្ពុជា។
គណបក្សខ្មែរតែមួយ បានកត់សម្គាល់ឃើញថា ការធ្វើវិសោធន កម្មរដ្ឋធម្មនុញ្ញលើកទី១០ នេះ គឺដើម្បីការពារប្រព័ន្ធប្រជាធិបតេយ្យសេរីពហុបក្ស និងរបបរាជាធិប តេយ្យអាស្រ័យរដ្ឋធម្មនុញ្ញ តាមបែបរបបសភានិយម និងការពង្រឹងបន្ថែមនូវលទ្ធិប្រជាធិបតេយ្យ មូលដ្ឋានដែលមានប្រជាពលរដ្ឋជាម្ចាស់ឆ្នោត និងម្ចាស់អំណាច ដូចសព្វថ្ងៃនេះ។
ករណីឯកឧត្តម សម រង្ស៊ី បានលើកឡើងនៅក្នុងវេទិកាសំឡេងសង្គ្រោះជាតិស្តីពី “ហ៊ុន សែន ប្រហាររដ្ឋធម្មនុញ្ញ ដើម្បីបន្តអំណាចខ្លួនឯង”កាលពីថ្ងៃទី១៦ខែកក្កដាឆ្នាំ២០២២វាគ្រាន់ជាអ្នកបង្កើតព្រឹត្តិការណ៍លាងគូទខ្លួនឯងមិនជ្រះតែប៉ុណ្ណោះ។ យើងខ្ញុំបានចងចាំនូវព្រឹត្តិការណ៍ឆ្នាំ ២០០៦ យ៉ាងច្បាស់បំផុត ដែល ឯកឧត្តម សម រង្ស៊ី បានស្នើសុំធ្វើវិសោធនកម្មរដ្ឋធម្មនុញ្ញពី ២ ភាគ៣ មក ៥០%បូក១ ។ដូច្នេះ យើងខ្ញុំចោទសួរថា តើឯកឧត្តម សម រង្ស៊ី ចាត់ទុកខ្លួនឯងបានធ្វើ រដ្ឋប្រហាររដ្ឋធម្មនុញ្ញដែលឬទេ?។
សេចក្តីថ្លែងការណ៍បន្តថា ដើម្បីចូលរួមចំណែកបន្តរក្សាសន្តិភាព គណបក្សខ្មែរតែមួយសូមអំពាវនាវដល់ប្រជា ពលរដ្ឋខ្មែរជាម្ចាស់អំណាច និងសមាជិកគណបក្សទាំងអស់ត្រូវបន្តស្មារតីទទួលខុសត្រូវខ្ពស់ ដើម្បីប្រយោជន៍ប្រជាជាតិ សង្គមជាតិ និងជាពិសេសការពារពេលវេលាជាមាសប្រាក់របស់បងប្អូន ដែលកំពុងប្រកបមុខរបរប្រចាំថ្ងៃដើម្បីទ្រទ្រង់ជីវភាពមានបានដូចសព្វថ្ងៃដោយសារប្រទេស កម្ពុជាមានសន្តិភាពពេញលេញ។
សូមបញ្ជាក់ថាសម័យប្រជុំរដ្ឋសភាលើកទី៧នីតិកាលទី៦កាលពីព្រឹកថ្ងៃព្រហស្បតិ៍ទី២៨ខែកក្កដានេះបានធ្វើការពិភាក្សា និងអនុម័តសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រា១៩ ថ្មី (មួយ) មាត្រា៨៩ មាត្រា៩៨ ថ្មី មាត្រា១០២ ថ្មី មាត្រា១១៩ ថ្មី (មួយ) និងមាត្រា១២៥ ថ្មីនៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ ថ្មី និងមាត្រា៤ ថ្មីនៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិ ក្នុងសំឡេង១០៥លើ
១០៦សំឡេង។
សូមជម្រាបថា គណៈរដ្ឋមន្ត្រីបានបញ្ជូនសេចក្តីព្រាងច្បាប់ធម្មនុញ្ញស្តីពីវិសោធនកម្មមាត្រាមួយចំនួនទៅរដ្ឋសភាកាលពីថ្ងៃទី១៣ ខែកក្កដាបន្ទាប់ពីកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាកាលពីថ្ងៃទី៨ខែកក្កដាបាន សម្រេចអនុម័តទាំងស្រុងនិងការបញ្ជាក់អំពីធម្មនុញ្ញភាពដោយក្រុមប្រឹក្សាធម្មនុញ្ញកាលពីថ្ងៃទី១៣ខែកក្កដា ផងដែរ។
គួរបញ្ជាក់ថា កាលពីថ្ងៃទី១៣ខែកក្កដា ក្រុមប្រឹក្សាធម្មនុញ្ញបានក្រាបបង្គំទូលថ្វាយព្រះមហាក្សត្រដោយផ្អែកលើមាត្រា១៥៣ថ្មី (ពីរ មាត្រា១៥១ថ្មី) មាត្រា១៥៤ថ្មី (ពីរ មាត្រា ១៥២ថ្មី) និងមាត្រា១៥៥ថ្មី (ពីរ មាត្រា១៥៣ថ្មី) នៃរដ្ឋធម្មនុញ្ញការស្នើសុំធ្វើវិសោធនកម្មមាត្រា១៩ថ្មី(មួយ) មាត្រា៨៩ មាត្រា៩៨ ថ្មី មាត្រា១០២ ថ្មី មាត្រា១១៩ ថ្មី(មួយ) និងមាត្រា១២៥ ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា៣ ថ្មី និងមាត្រា៤ ថ្មី នៃច្បាប់ធម្មនុញ្ញបន្ថែមសំដៅធានានូវដំណើរការជាប្រក្រតីនៃស្ថាប័នជាតិអាចធ្វើទៅបាន គឺស្របតាមបរិបទនៃសភាពការណ៍ជាក់ស្ដែង និងពុំមានអ្វីប៉ះពាល់ដល់ប្រព័ន្ធប្រជាធិបតេយ្យ សេរីពហុបក្ស និងរបបរាជានិយមអាស្រ័យដោយរដ្ឋធម្មនុញ្ញព្រមទាំងធ្វើឡើងនៅពេលប្រទេសជាតិមិនឋិតក្នុងភាពអាសន្ន។
ដោយឡែកកាលពីរសៀលថ្ងៃទី១៤ ខែកក្កដា ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ក៏បានធ្វើសន្និសីទសារព័ត៌មានមួយដើម្បីបង្ហាញដល់អ្នកសារព័ត៌មាន ក៏ដូចជាសាធារណជនអំពីគោលបំណង និងខ្លឹមសារនៃសេចក្តីព្រាងច្បាប់ធម្មនុញ្ញ ដែលជាសំណើធ្វើវិសោធនកម្មលើកទី១០ នៃរដ្ឋធម្មនុញ្ញនៃព្រះរាជាណាចក្រកម្ពុជា៕ដោយ៖ពលជ័យ
សូមជូនសេចក្តីថ្លែងការណ៍៖
